#IndiaFightsCorona செயற்கை சுவாச கருவிகள் தயாரிக்க வாகன உற்பத்தியாளர்களுக்கு மத்திய அரசு அழைப்பு

Read Time:2 Minute, 33 Second

இந்தியாவில் கொரோனா பாதிப்பு அதிகரித்து வருவதால், செயற்கை சுவாச கருவிகளை தயாரிக்க வாகன உற்பத்தி நிறுவனங்களுக்கு மத்திய அரசு அழைப்பு விடுத்துள்ளது.

இதுதொடர்பாக மத்திய சுகாதாரத்துறை அமைச்சக டுவிட்டர் பகுதியில் வெளியிட்டுள்ள செய்தியில் கூறியிருப்பதாவது:-

நாட்டில் தற்போது இருப்பில் உள்ள 14 ஆயிரம் செயற்கை சுவாச கருவிகள் (வென்டிலேட்டர்) நாடு முழுவதும் உள்ள மருத்துவமனைகளில் நோயாளிகளின் பயன்பாட்டுக்கு ஒதுக்கப்பட்டு உள்ளன. இந்தியாவில் கொரோனா பாதிப்பு அதிகரித்து வருவதால், வாகன உற்பத்தி நிறுவனங்கள் தங்கள் தொழிற்சாலைகளில் செயற்கை சுவாச கருவிகளை உற்பத்தி செய்யுமாறு கேட்டுக் கொண்டுள்ளோம். அவர்களும், அதற்கான ஏற்பாடுகளை செய்து வருகின்றனர்.

இன்னும் 2 மாதத்தில் 30 ஆயிரம் செயற்கை சுவாச கருவிகள் உற்பத்தி செய்ய பொதுத்துறை நிறுவனமான ‘பெல்’லை கேட்டுக் கொண்டுள்ளோம். ஒரு மாதத்தில் 10 ஆயிரம் செயற்கை சுவாச கருவிகளை உற்பத்தி செய்யுமாறு நொய்டாவை சேர்ந்த ஒரு நிறுவனத்துக்கு ஆர்டர் வழங்கப்பட்டு உள்ளது. ஏப்ரல் 2-வது வாரம், இந்த கருவிகள் வர தொடங்கும். தற்போது, 11 லட்சத்து 95 ஆயிரம் முக கவசங்கள் இருப்பில் உள்ளன. கடந்த 2 நாட்களில் மட்டும் 5 லட்சம் முக கவசங்கள் வினியோகிக்கப்பட்டு உள்ளன. நேற்று ஒரு லட்சத்து 40 ஆயிரம் முக கவசங்கள் அனுப்பப்பட்டன.

பாதுகாப்பு ஆராய்ச்சி மற்றும் மேம்பாட்டு நிறுவனம், நாள்தோறும் 20 ஆயிரம் முகக்கவசங்கள் தயாரிக்கும் பணியை அடுத்த வாரம் தொடங்க உள்ளது. 2 உள்நாட்டு நிறுவனங்கள், நாள்தோறும் 50 ஆயிரம் முக கவசங்களை தயாரித்து வருகின்றன. அடுத்த வாரத்தில் இது ஒரு லட்சமாக உயரும். செஞ்சிலுவை சங்கம், 10 ஆயிரம் தனிநபர் கவச சாதனங்களை நன்கொடையாக அளித்து உள்ளது. அதை நேற்று வினியோகிக்க தொடங்கினோம் என தெரிவிக்கப்பட்டு உள்ளது.