#IndiaFightsCorona இந்தியாவில் பொதுமக்கள் ஒத்துழைப்பு இல்லாததே கொரோனா வைரஸ் பாதிப்பு அதிகரிப்புக்கு காரணம் மத்திய அரசு குற்றச்சாட்டு

Read Time:2 Minute, 26 Second

இந்தியாவில் பொதுமக்களின் போதிய ஒத்துழைப்பு இல்லாததே கொரோனா வைரஸ் பாதிப்பு அதிகரிப்புக்கு காரணம் என மத்திய அரசு குற்றம் சாட்டியுள்ளது.

இந்தியாவில் கொரோனா வைரசினை கட்டுப்படுத்த மத்திய, மாநில அரசுக்கள் தீவிர நடவடிக்கையை மேற்கொள்கின்றன. வைரஸ் பரவலை கட்டுப்படுத்தும் வகையில் 21 நாள் ஊரடங்கை மத்திய அரசு அறிவித்தது. ஆனால், பொதுமக்கள் மத்தியில் பொறுப்புணர்வுடன் ஒத்துழைப்பு என்பது வெளிப்படையாகவே அதிகமாக காணப்படவில்லை. பெரும்பாலான இடங்களில் வைரசின் தாக்கம் சீரியசாக எடுக்கப்படவில்லை. இந்நிலையில் வைரஸ் பரவல் எண்ணிக்கை அதிகரித்து உள்ளது.

டெல்லியில் நிஜாமுதீன் பகுதியில் இஸ்லாமிய மத மாநாட்டில் கலந்துக்கொண்ட ஆயிரக்கணக்கானோர் ஒரே இடத்தில் கூடியிருந்துள்ளனர். இப்போது, அங்கிருந்தவர்களுக்கு கொரோனா வைரஸ் பாதிப்பு ஏற்பட்டுள்ளதும், அங்கிருந்து நாட்டின் பிறபகுதிகளுக்கு சென்றவர்களுக்கு கொரோனா வைரஸ் பாதிப்பு ஏற்பட்டுள்ளதும் ஒட்டுமொத்த தேசத்தையும் அதிர்ச்சிக்கு உள்ளாக்கியுள்ளது.

இந்நிலையில் இந்தியாவில் பொதுமக்களின் போதிய ஒத்துழைப்பு இல்லாததே கொரோனா வைரஸ் பாதிப்பு அதிகரிப்புக்கு காரணம் என மத்திய அரசு குற்றம் சாட்டியுள்ளது.

இந்தியாவில் கொரோனா வைரஸ் பரவல் எண்ணிக்கை அதிகரிப்புக்கு, சில இடங்களில் பொதுமக்கள் ஆதரவு இல்லாததும், சரியான நேரத்தில் அதிகாரிகளுக்கு தகவல் தெரிவிக்க தவறியதும் காரணமாக உள்ளது என சுகாதாரத்துறை அமைச்சகத்தின் இணைச் செயலாளர் லாவ் அகர்வால் தெரிவித்துள்ளார். டெல்லி நிஜாமுதீன் பகுதியில் கொரோனா வைரஸ் பரவல் தொடர்பாக பேசுகையில், இது தவறை கண்டறியும் நேரமல்ல, வைரஸ் காணப்பட்ட இடங்களில் நடவடிக்கைகளை மேற்கொள்ள வேண்டிய நேரமாகும் எனக் கூறியுள்ளார்.