#IndiaFightsCorona தமிழகத்தில் ஒரே நாளில் 17 பேருக்கு கொரோனா வைரஸ் தொற்று, பாதிக்கப்பட்டோரின் எண்ணிக்கை 67 ஆக உயர்வு

Read Time:5 Minute, 9 Second

தமிழ்நாட்டில் கொரோனா பரவாமல் தடுக்க போர்க்கால அடிப்படையில் நடவடிக்கை எடுக்கப்படுகிறது. பொதுமக்கள் ஊரடங்கு விவகாரத்தில் அரசுக்கு முழு ஒத்துழைப்பு வழங்காத நிலை தொடர்கிறது. இந்நிலையில் வைரஸ் பரவலும் பரவலாக அதிகரித்து காணப்படுகிறது. நேற்று முதல்- அமைச்சர் எடப்பாடி பழனிசாமி தலைமையில் பல்வேறு துறைகளின் மூலம் மேற்கொள்ளப்பட்டு வரும் தொடர் பாதுகாப்பு நடவடிக்கைகள் குறித்த ஆய்வு கூட்டம் நடைபெற்றது.

அதன்பின்னர் செய்தியாளர்களிடம் பேசிய முதல்-அமைச்சர் பழனிசாமி, தமிழகத்தில் 29-ம் தேதி வரை 50 பேருக்கு கொரோனா வைரஸ் பாதிப்பு கண்டறியப்பட்டு அவர்களுக்கு உரிய சிகிச்சை அளிக்கப்பட்டு வருகிறது. இப்போது, மேலும் கூடுதலாக 17 பேர் இந்த வைரஸ் நோயால் பாதிக்கப்பட்டு இருக்கிறார்கள். அவர்களையும் சேர்த்து 67 பேருக்கு கொரோனா தொற்று நோய் ஏற்பட்டு இருக்கிறது. அவர்கள், முழுமையாக மருத்துவமனையில் தனிமைப்படுத்தப்பட்டு உரிய சிகிச்சை அளிக்கப்பட்டு வருகிறது.

தமிழகத்தில் கொரோனா வைரஸ் தொற்றுக்கு சிகிச்சையளிக்கும் வகையில் அரசு மருத்துவமனை, தனியார் மருத்துவமனைகளோடு இணைந்து 17 ஆயிரத்து 89 படுக்கை வசதிகள் தயார் நிலையில் இருக்கிறது. தனியாரையும் சேர்த்து இன்றைக்கு இருக்கும் வெண்டிலேட்டர்களின் எண்ணிக்கை 3,018. நோயாளிகளுக்கு சோதனை செய்வதற்காக அரசும், தனியாரும் சேர்ந்து 14 மையங்களில் ஆய்வக வசதி ஏற்படுத்தியிருக்கிறோம். விரைவில் மேலும் 3 ஆய்வு மையங்கள் ஏற்படுத்தப்பட உள்ளன என கூறினார்.

கொரோனா தொற்று நோய் கண்டறியப்பட்டு உரிய முறையில் சிகிச்சை அளிக்கப்பட்டு 5 பேர் குணமாகி வீட்டிற்கு திரும்பியுள்ளனர் எனவும் தெரிவித்தார். ஒன்றரை கோடி முககவசங்களை வெளியில் இருந்து வாங்குவதற்கு ஆர்டர் செய்யப்பட்டு இருக்கிறது. 25 லட்சம் என்-95 முகக்கவசம், 11 லட்சம் பாதுகாப்பு கவசம், 2,500 வெண்டிலேட்டர், 30 ஆயிரம் சோதனை கருவிகள் வாங்கப்பட உள்ளன.
பாதிக்கப்பட்ட மக்களுக்கு தேவையான உதவிகளை செய்வதற்காக பல்வேறு துறைகளைச் சேர்ந்த அதிகாரிகள் தலைமையில் 11 குழுக்கள் அமைக்கப்பட்டுள்ளன. இந்த குழுக்கள் ஒவ்வொன்றும் தனித்தனி பணிகளை மேற்கொள்ளும் எனவும் குறிப்பிட்டா பழனிசாமி.

கொரோனா தொற்றால் பாதிக்கப்பட்டோர் எண்ணிக்கை ஒரே நாளில் 17 அதிகரித்ததற்கு என்ன காரணம்? என்ற கேள்விக்கு முதல்-அமைச்சர் பழனிசாமி பதில் அளிக்கையில், டெல்லிக்கு 1,500 பேர் குழுவாக சென்று இருக்கிறார்கள். அந்த குழுவில் சென்றவர்களுக்குத்தான் இந்த தொற்று எண்ணிக்கை அதிகமாக உள்ளது. ஈரோட்டில் 24 பேருக்கு இருக்கிறது. அதேபோல, இந்த குழுவில் சென்ற 1,500 பேரில் 981 பேர் வந்துவிட்டார்கள். அந்த 981 பேரையும் பரிசோதனை செய்து கொண்டு இருக்கிறார்கள். இந்த குழுவில் இடம் பெற்று சென்றவர்களால்தான் இவ்வளவு தொற்று எண்ணிக்கை அதிகரித்து இருக்கிறது எனக் கூறியுள்ளார்.

14 மாவட்டங்களில் பாதிப்பு

தமிழ்நாட்டில் 14 மாவட்டங்களில் 67 பேருக்கு கொரோனா நோய் பாதிப்பு ஏற்பட்டு உள்ளது. அதிகபட்சமாக ஈரோடு மாவட்டத்தில் 24 பேரை இந்த வைரஸ் தாக்கிஉள்ளது. நேற்றைய நிலவரப்படி, தமிழகத்தில் 38 மாவட்டங்களில், 14 மாவட்டங்களில் 67 பேரை கொரோனா நோய் தாக்கி உள்ளது. நேற்று ஒரு நாள் மட்டும் 17 பேர் கொரோனா நோயால் பாதிக்கப்பட்டுள்ளனர். அதிகபட்சமாக ஈரோடு மாவட்டத்தில் 24 பேர் பாதிக்கப்பட்டுள்ளனர். 2-வது இடத்தில் இருக்கும் சென்னையில் 22 பேர் கொரோனா நோய் தாக்குதலுக்கு உள்ளாகி உள்ளனர். அடுத்ததாக சேலம் மாவட்டத்தில் 6 பேரும், மதுரை மாவட்டத்தில் 4 பேரும், செங்கல்பட்டு மாவட்டத்தில் 2 பேரும், விருதுநகர், காஞ்சீபுரம், கோவை, திருப்பூர், தஞ்சாவூர், வேலூர், திருநெல்வேலி, ராணிப்பேட்டை, கரூர் ஆகிய மாவட்டங்களில் தலா ஒருவரும் பாதிக்கப்பட்டு உள்ளனர்.