#IndiaFightsCorona இந்தியாவில் பாதிக்கப்பட்டவர்கள் எண்ணிக்கை 1600 -ஐ தாண்டியது; மாநிலம் வாரியாக பாதிப்பு விபரம்:-

Read Time:5 Minute, 41 Second
Page Visited: 32
#IndiaFightsCorona இந்தியாவில்  பாதிக்கப்பட்டவர்கள் எண்ணிக்கை 1600 -ஐ தாண்டியது; மாநிலம் வாரியாக பாதிப்பு விபரம்:-

இந்தியாவின் கொரோனா வைரசால் பாதிக்கப்பட்டவர்களின் எண்ணிக்கை இன்று 1600-ஐ தாண்டியது. கடந்த 24 மணி நேரத்தில் மட்டும் நாடு முழுவதும் 200-க்கும் மேற்பட்டோருக்கு புதியதாக கொரோனா வைரஸ் பாதிப்பு பதிவாகியுள்ளது. COVID-19 கொரோனா வைரஸ் பாதிப்பில் மராட்டியம் மற்றும் ஆந்திரா உச்சம் தொட்டுள்ளன. இந்தியாவில் மொத்த கொரோனா வைரஸ் நோயாளிகளின் எண்ணிக்கை 1,637 ஆக உயர்ந்துள்ளதாக மத்திய சுகாதாரத்துறை அமைச்சகம் தெரிவித்துள்ளது.

COVID-19 கொரோனா வைரஸ் பாதிப்பு தொடர்பான இறப்புகளின் எண்ணிக்கையும் 38 ஆக உயர்ந்துள்ளது. நாட்டில் 1,466 கொரோனா வைரஸ் நோயாளிகள் உள்ளனர். இந்த நோயிலிருந்து இதுவரை மொத்தம் 133 நோயாளிகள் குணம் அடைந்துள்ளனர். இந்தியாவின் நிதி தலைநகரான மும்பை நாட்டில் மிகவும் பாதிக்கப்பட்ட நகரமாகும். மும்பையில் இருந்து 160-க்கும் மேற்பட்டோருக்கு கொரோனா வைரஸ் பாதிப்பு உறுதி செய்யப்பட்டுள்ளது. கொரோனா வைரஸ் என்ற கொடிய வைரஸ் மராட்டியத்தில் மொத்தம் 302 பேரை பாதித்துள்ளது. மராட்டியத்தில் இறந்தவர்களின் எண்ணிக்கை 11 இறப்புகளாக உயர்ந்துள்ளது.

இந்தியாவில் முதல் முறையாக ஜனவரி 30-ம் தேதி கேரளாவில் கொரோனா வைரஸ் பாதிப்பு தெரியவந்தது. இப்போது கேரளாவில் மொத்த கொரோனா வைரஸ் நோயாளிகள் எண்ணிக்கை 241 ஆக உயர்ந்துள்ளது.

இந்த வாரம் கொரோனா வைரஸ் பாதிப்பு எண்ணிக்கையில் டெல்லி புதிய உயர்வை கண்டுள்ளது. தேசிய தலைநகரான டெல்லியில் 120 கொரோனா வைரஸ் நோயாளிகள் உள்ளனர். டெல்லியின் நிஜாமுதீன் பகுதி இந்தியாவில் கொரோனா நோய் தொற்றின் மையமாக மாறியுள்ளது. மார்ச் மாதம் மத்தியில் அங்கு நடைபெற்ற இஸ்லாமிய மாநாட்டில் கலந்துக்கொண்டவர்கள் மூலம் இந்தியாவின் பல்வேறு பகுதிகளுக்கு கொரோனா வைரஸ் சென்றுள்ளது.

ஆந்திராவில் 83 பேருக்கு கொரோனா வைரஸ் பாதிப்பு உறுதி செய்யப்பட்டுள்ளனர். கடந்த 12 மணி நேரத்தில் 40க்கும் மேற்பட்டவர்களுக்கு புதியதாக கொரோனா வைரஸ் பாதிப்பு இருப்பதை அரசு கண்டுள்ளது. இந்த புதிய நோயாளிகளில் பெரும்பாலோர் டெல்லியின் நிஜாமுதீன் இஸ்லாமிய மாநாட்டில் கலந்துக்கொண்டவர்கள் என்று தெரிவிக்கப்பட்டுள்ளது. தமிழகத்தில் 124 பேருக்கு கொரோனா வைரஸ் பாதிப்பு ஏற்பட்டுள்ளது. கர்நாடகாவிலும் கொரோனாவால் பாதிக்கப்பட்டவர்கள் எண்ணிக்கை 100-ஐ தாண்டிவிட்டது. தெலுங்கானாவில் 94 பேருக்கு கொரோனா வைரஸ் பாதிப்பு உள்ளது.

கடந்த 24 மணி நேரத்தில் இந்தூரில் 15-க்கும் மேற்பட்டோருக்கு புதியதாக கொரோனா வைரஸ் பாதிப்பு உறுதி செய்யப்பட்டுள்ளது. இதனையடுத்து மத்திய பிரதேசத்தில் பாதிக்கப்பட்டவர்கள் மொத்த எண்ணிக்கை 47 ஆக உயர்ந்துள்ளது. குஜராத்தில் இதுவரை 74 பேருக்கும், ராஜஸ்தானில் 94 பேருக்கும், உத்தரபிரதேசத்தில் 103 பேருக்கும், அரியானாவில் 43 பேருக்கும் கொரோனா வைரஸ் பாதிப்பு உள்ளது.

கொரோனா வைரஸ் பாதிப்பு பீகாரில் 23 ஆகவும், சத்தீஸ்காரில் 9 ஆகவும், சண்டிகரில் 13 ஆகவும், உத்தரகண்டில் 7 ஆகவும் உள்ளது. கொரோனா வைரஸ் தொற்று ஜம்மு-காஷ்மீரில் 55 பேருக்கும், லடாக்கில் 13 பேருக்கும் ஏற்பட்டுள்ளது. மேற்கு வங்கத்தில் இதுவரை 26 பேருக்கு கொரோனா வைரஸ் பாதிப்பு ஏற்பட்டுள்ளது. இந்தியாவில் கொரோனா வைரஸ் சமூக பரவலாக மாறுவதை தடுக்க மத்திய மாநில அரசுக்கள் நடவடிக்கைகளை மேற்கொண்டு வருகின்றன. டெல்லி இஸ்லாமிய மாநாட்டில் கலந்துக்கொண்டவர்கள் அடையாளம் காணும் பணி தொடர்ந்து தீவிரமாக நடக்கிறது. இதற்கிடையே, மாநாட்டில் கலந்துக்கொண்டவர்கள் தாமாக முன்வந்து பரிசோதனை செய்துக்கொள்ள வேண்டும் என மத்திய, மாநில அரசுக்கள், மாநில நிர்வாகங்கள் கேட்டுக்கொண்டுள்ளன.

0 0
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %