#IndiaFightsCorona டெல்லி இஸ்லாமிய மாநாட்டில் கலந்துகொண்டு தமிழகம் திரும்பிய மேலும் 74 பேருக்கு கொரோனா, பாதிக்கப்பட்டோர் எண்ணிக்கை 309 ஆக உயர்வு

Read Time:2 Minute, 33 Second

டெல்லி நிஜாமுதீன் பகுதியில் கடந்த மாதம் 13-ம் தேதி முதல் 15-ம் தேதி வரை தப்லிக் ஜமாத் மாநாடு நடைபெற்றது. இந்த மாநாட்டில் கலந்துக்கொண்டவர்களுக்கு கொரோனா வைரஸ் தொற்று இருப்பது தெரியவந்தது. இந்த மாநாட்டில் பங்கேற்ற அனைவரையும் சோதனை செய்ய தமிழக சுகாதாரத்துறை முடிவு செய்தது. தற்போது மேலும் பலருக்கு கொரோனா தொற்று உறுதி செய்யப்பட்டுள்ளது. இதுகுறித்து சுகாதாரத்துறை செயலாளர் டாக்டர் பீலா ராஜேஷ் செய்தியாளர்களிடம் பேசுகையில்,

75 பேருக்கு கொரோனா வைரஸ்

டெல்லி மாநாட்டில் கலந்துகொண்டவர்களில் நேற்று 110 பேருக்கு கொரோனா தொற்று உறுதி செய்யப்பட்ட நிலையில், தமிழகத்தில் இன்று மேலும் 75 பேருக்கு கொரோனா தொற்று உறுதி செய்யப்பட்டுள்ளது. இதன் மூலம் தமிழகத்தில் கொரோனாவால் பாதிக்கப்பட்டோர் எண்ணிக்கை 309 ஆக அதிகரித்து உள்ளது. கொரோனோ தொற்று உறுதிப்படுத்தப்பட்ட 75 பேரில் 74 பேர் டெல்லி மாநாட்டுக்கு சென்று வந்தவர்கள். ஒருவர் அவர்களுடன் தொடர்பில் இருந்தவர். இதன் மூலம் டெல்லி மாநாட்டில் பங்கேற்றவர்களில் 264 பேருக்கு கொரோனா தொற்று இருப்பது உறுதியாகி உள்ளது.

இதன் மூலம் கொரோனா தொற்று பாதிக்கப்பட்டவர்களின் எண்ணிக்கையில் இந்திய அளவில் இரண்டாவது இடத்தில் தமிழகம் உள்ளது.

இதுவரை பாதிக்கப்பட்டவர்கள் 19 மாவட்டங்களில் வசிப்பது தெரியவந்தது. தற்போது கூடுதலாக திருவள்ளூர் மாவட்டமும் இணைந்துள்ளது. தற்போது நம்மிடம் 12,000 பரிசோதனை உபகரணங்கள் உள்ளன. தமிழகத்தில் 86,312 பேர் வீட்டுக் கண்காணிப்பில் உள்ளனர். ஒரே நாளில் வீட்டுக் கண்காணிப்பில் இருப்போரின் எண்ணிக்கை 9000 பேர்கள் அதிகரித்து உள்ளனர். டெல்லியிலிருந்து திரும்பிய 1103 பேரும் தனிமைப்படுத்தப்பட்டு உள்ளனர். அவர்கள் அனைவருக்கும் ரத்த மாதிரி எடுத்தாகிவிட்டது. முடிவுகள் வர வர நான் தகவல் சொல்கிறேன் என தெரிவித்து உள்ளார்.