#IndiaFightsCorona இந்தியாவில் கொரோனா அதிகரிக்க வழிவகுத்த 10 மையங்கள் கண்டுபிடிப்பு.! மத்திய அரசு தீவிர கண்காணிப்பு!

Read Time:5 Minute, 28 Second

இந்தியாவில் கொரோனா வைரசை கட்டுப்படுத்தும் வகையில் மத்திய மாநில அரசுக்கள் நடவடிக்கைகளை மேற்கொண்டன. ஊரடங்கு உத்தரவு அமல்படுத்தப்பட்டு சிறப்பு கண்காணிப்பு மேற்கொள்ளபட்டது. ஆனால், கடந்த ஒரு வார காலத்தில் கொரோனா வைரஸ் பரவல் அதிகரித்தது. இந்நிலையில் கொரோனா வைரஸ் பரவலுக்கு மையமான திகழ்ந்த 10 இடங்களை மத்திய அரசு அடையாளம் கண்டுள்ளது. அங்கு தனி கவனம் செலுத்தி வருகிறது.

இப்பட்டியலில் டெல்லி, கேரளா, உத்தரபிரதேசம், மராட்டியம் ஆகிய மாநிலங்களில் தலா 2 இடங்களும், குஜராத், ராஜஸ்தான் ஆகிய மாநிலங்களில் தலா ஒரு இடமும் உள்ளது.

டெல்லி

நிஜாமுதின் மேற்கு

தெற்கு டெல்லியில் அமைந்துள்ள நிஜாமுதின் பகுதியில் கடந்த மாதம் 1-ம் தேதி முதல் 15-ம் தேதிவரை நடந்த இஸ்லாமிய மாநாட்டில் வெளிநாட்டினர் உள்பட ஆயிரக்கணக்கானோர் கலந்து கொண்டனர். நாடு முழுவதும் அதிக அளவில் நோய் பரவ அந்நிகழ்ச்சி வழிவகுத்து விட்டது.

தில்ஷத் கார்டன்

வடகிழக்கு டெல்லியில் உள்ள தில்ஷத் கார்டன் பகுதியை சேர்ந்த பெண் ஒருவருக்கு கொரோனா வைரஸ் பாதிப்பு இருந்தது. சவுதி அரேபியாவுக்கு சென்று திரும்பியவர். அவருடைய மகளுக்கும், 2 உறவினர்களுக்கும் பரவியது. அப்பெண்ணுக்கு சிகிச்சை அளித்த மருத்துவருக்கும், மருத்துவர் மூலமாக அவருடைய மனைவிக்கும் பரவியது. அந்த பகுதியில் அடங்கிய சகாத்ரா மாவட்டத்தில் 11 பேருக்கு நோய் உறுதி ஆகியுள்ளது.


உத்தரபிரதேசம்

நொய்டா

டெல்லியை ஒட்டியுள்ள நொய்டா மாவட்டத்தின் கவுதமபுத்தா நகரில் 38 பேருக்கு கொரோனா உறுதி செய்யப்பட்டுள்ளது. இங்கு 24 பேருக்கு நோய் பரவ நொய்டாவில் உள்ள ஒரு தனியார் நிறுவனமே காரணமாக இருந்துள்ளது. அதனால், அந்த நிறுவனத்துக்கு சீல் வைக்கப்பட்டது.

மீரட்

மேற்கு உத்தரபிரதேசத்தில் உள்ள மீரட் மாவட்டத்தில் 19 பேருக்கு பாதிப்பு உறுதி செய்யப்பட்டுள்ளது. இவர்களில் 4 பேர், மராட்டிய மாநிலத்துக்கு சென்று வந்த ஒருவரின் குடும்பத்தை சேர்ந்தவர்கள் என்பது தெரியவந்துள்ளது.


மராட்டியம்

மும்பை

மும்பையில் 167 பேருக்கு கொரோனா பாதிப்பு உறுதி செய்யப்பட்டுள்ளது. 8 பேர் பலியாகி உள்ளனர். மும்பை ஒர்லியின் கோலிவாடா பகுதியையும், கோரிகான் புறநகர் பகுதியையும் கொரோனா மையப்புள்ளிகளாக மாநில அரசு அறிவித்து உள்ளது.

புனே

மராட்டிய மாநிலத்தில் முதலில் புனே நகரில்தான் 2 பேருக்கு கொரோனா உறுதி செய்யப்பட்டது. தற்போது, அங்கு 46 கொரோனா தொற்று நோயாளிகள் உள்ளனர். ஆயிரக்கணக்கானோர் கண்காணிப்பில் உள்ளனர்.


கேரளா

காசர்கோடு

இந்தியாவில் கொரோனாவினால் மிக மோசமாக பாதிக்கப்பட்ட மாவட்டங்களில் காசர்கோடும் ஒன்று. 99 பேர் பாதிக்கப்பட்டுள்ளனர். வெளிநாட்டில் இருந்து திரும்பியவர்களும், அவர்களுடன் பழகியவர்களுமே இதற்கு காரணம் என்பது தெரியவந்துள்ளது.

பத்தனம்திட்டா

பத்தனம்திட்டாவில் 5 பேர் கொரோனா வைரசுக்கு பாதிக்கப்பட்டபோதிலும், 7 ஆயிரத்துக்கும் மேற்பட்டோர் கண்காணிப்பில் உள்ளனர்.


குஜராத்

ஆமதாபாத்

குஜராத் மாநிலம் ஆமதாபாத் மாவட்டத்தில் 23 பேர் கொரோனாவால் பாதிக்கப்பட்டு உள்ளனர். 3 பேர் உயிரிழந்துள்ளனர். ஆமதாபாத் நகரம், மையப்புள்ளியாக அறிவிக்கப்பட்டு உள்ளது.


ராஜஸ்தான்

பில்வாரா

ராஜஸ்தான் மாநிலத்தில் பில்வாரா என்ற ஜவுளி நகரில் 26 பேருக்கு கொரோனா உறுதி செய்யப்பட்டு உள்ளது. முதலில், ஒரு டாக்டருக்குத்தான் நோய் கண்டறியப்பட்டது. பெரும்பாலும், மருத்துவமனை ஊழியர்களோ அல்லது அங்கு சிகிச்சைக்கு சென்ற நோயாளிகளோ நோயின் பிடியில் சிக்கி உள்ளனர்.


இந்தியாவில் கொரோனா வைரஸ் பாதிக்கப்பட்டவர்கள் எண்ணிக்கையில் திடீர் உயர்வு ஏற்பட்டதற்கு டெல்லியில் நிஜாமுதின் பகுதியில் நடந்த இஸ்லாமிய மாநாட்டில் பங்கேற்றவர்கள், நாடு முழுவதும் பயணம் செய்ததே இதற்கு காரணம் என மத்திய அரசு தெரிவிக்கிறது. எனவே, அங்கிருந்து திரும்பியவர்களையும், அவர்கள் தொடர்பு கொண்டவர்களையும் கண்டறிந்து பரிசோதிக்குமாறும், கொரோனா அறிகுறி உள்ளவர்களை மருத்துவமனைக்கு அனுப்பி வைக்குமாறும் மாநிலங்களை மத்திய அரசு கேட்டுக்கொண்டுள்ளது.