#IndiaFIghtsCorona சென்னை ஸ்டான்லி மருத்துவமனையில் கொரோனா வைரஸ் நோயாளிகளுக்கு உதவ 3 ரோபோக்கள் அறிமுகம்

Read Time:3 Minute, 41 Second

சென்னை ஸ்டான்லி மருத்துவமனையில் கொரோனா வைரசால் பாதிக்கப்பட்ட நோயாளிகளுக்கு உதவ 3 ரோபோக்கள் அறிமுகம் செய்யப்பட்டுள்ளது.

உலகம் முழுவதும் கொரோனா வைரசினால் பாதிக்கப்பட்டவர்கள் மருத்துவமனைகளில் தனி வார்டுகளில் அனுமதிக்கப்பட்டு சிகிச்சை பெற்று வருகின்றனர். மருத்துவமனையில் இந்த நோயாளிகளுக்கு சிகிச்சை அளிக்கும் மருத்துவர்கள் மற்றும் செவிலியர்களுக்கு பாதிப்பு நேரிடும் அபாயம் அதிகமாக உள்ளது. இந்நிலையில் உலக நாடுகள் ரோபோக்களை பணியமர்த்துகிறது.

அந்தவகையில் சென்னை ஸ்டான்லி மருத்துவமனையில் கொரோனா வைரசால் பாதிக்கப்பட்ட நோயாளிகளுக்கு உதவ 3 ரோபோக்கள் அறிமுகம் செய்யப்பட்டுள்ளது. சென்னை ஸ்டான்லி அரசு மருத்துவமனை சிறப்பு வார்டில் அனுமதிக்கப்பட்டு உள்ள நோயாளிகள் மற்றும் அவர்களுக்கு சிகிச்சை அளிக்கும் டாக்டர்கள், பணியாளர்களுக்கு உதவிட 3 ரோபோக்களை தனியார் நிறுவனம் தயாரித்து வழங்கி உள்ளது. இந்த ரோபோக்களை சுகாதாரத்துறை அமைச்சர் விஜயபாஸ்கர் நேற்று (ஏப்ரல் 3)அறிமுகம் செய்து பயன்பாட்டுக்கு தொடங்கி வைத்தார்.

விஜயபாஸ்கர் அப்போது செய்தியாளர்களிடம் பேசுகையில், சென்னை அரசு ஸ்டான்லி மருத்துவமனையில் கொரோனா வைரசால் பாதிக்கப்பட்டவர்களுக்கு சிகிச்சை அளிக்க சிறப்பு வார்டுகள் அமைக்கப்பட்டு உள்ளன. இங்கு 500 படுக்கைகள் தயார் நிலையில் உள்ளது. அதில் 100 படுக்கைகளில் வெண்டிலேட்டர் வசதி உள்ளது. ஸ்டான்லி மருத்துவமனையில் மட்டும் கொரோனா வைரஸ் அறிகுறியுடன் 48 பேர் அனுமதிக்கப்பட்டு உள்ளனர். அவர்களுக்கு தேவையான மருத்துவ சிகிச்சைகள் அளிக்கப்பட்டு வருகிறது.

தற்போது முதல்கட்டமாக ஸ்டான்லி மருத்துவமனையில் கொரோனா வைரசால் பாதிக்கப்பட்ட நோயாளிகள் மற்றும் அவர்களுக்கு சிகிச்சை அளிக்கும் டாக்டர்கள், செவிலியர்களுக்கு உதவிடும் வகையில் 3 ரோபோக்கள் அறிமுகப்படுத்தப்பட்டு உள்ளன. இந்த ரோபோக்களை பயிற்சி பெற்ற செவிலியர்களே இயக்குவார்கள். மருத்துவமனைகளின் தேவைக்கேற்ப ரோபோக்களின் இயக்கம் அதிகப்படுத்தப்படும்.

தனியார் நிறுவனம் மூலம் இந்த ரோபோக்கள் தயாரிக்கப்பட்டு இருக்கிறது. இதேபோல் திருச்சிக்கு 5 ரோபோக்கள் வழங்க ஒப்புதல் அளிக்கப்பட்டு உள்ளது. இந்த ரோபோக்கள் மூலம் கொரோனா வைரஸ் சிறப்பு வார்டுகளில் பணியாற்றும் டாக்டர்கள் , மருத்துவ பணியாளர்கள் மற்றும் அங்கு சிகிச்சை பெறும் நோயாளிகளுக்கு தேவையான உணவு, குடிநீர், மருந்து, மாத்திரை உள்ளிட்டவைகளை வெளியில் இருந்து சிறப்பு வார்டுக்கு உள்ளே எடுத்து செல்லும் வகையில் தயாரிக்கப்பட்டுள்ளது.

இந்த ரோபோக்கள் 250 மீட்டர் முதல் ஒன்றரை கிலோமீட்டர் தூரம் வரையில் செல்லும் திறன் கொண்டவை ஆகும் எனக் கூறியுள்ளார்.