#IndiaFightsCorona தமிழகத்தில் ஒரே நாளில் 74 பேருக்கு கொரோனா தொற்று உறுதியானது, பாதிப்பு எண்ணிக்கை 485 ஆக அதிகரிப்பு

Read Time:2 Minute, 34 Second

தமிழகத்தில் கொரோனாவினால் பாதிக்கப்பட்டவர்களின் எண்ணிக்கை நேற்று 411 ஆக உயர்ந்தது. இதில் 364 பேர் டெல்லி இஸ்லாமிய மாநாட்டில் பங்கேற்றவர்கள் என தெரிவிக்கப்பட்டது.

இந்நிலையில் இன்று தமிழகத்தில் ஒரே நாளில் 74 பேருக்கு கொரோனா தொற்று உறுதிசெய்யப்பட்டுள்ளது. இதனால் பாதிப்பு எண்ணிக்கை 485 ஆக அதிகரித்துள்ளது.

தமிழக சுகாதாரத்துறை செயலாளார் பீலா ராஜேஷ் செய்தியாளர்களிடம் பேசுகையில், தமிழகத்தில் 90 ஆயிரத்து 541 பேர் வீட்டுக்கண்காணிப்பில் உள்ளனர். 54,315 பேர் 28 நாள் வீட்டுத்தனிமையில் இருந்து விடுபட்டுள்ளனர். இதுவரை பரிசோதனை செய்யப்பட்டவர்களின் எண்ணிக்கை 4,248 ஆகும். இன்று 74 பேருக்கு கொரோனா வைரஸ் பாதிப்பு உறுதி செய்யப்பட்டுள்ளது. இந்த 74 பேரில் 73 பேர் டெல்லி இஸ்லாமிய மாநாட்டுக்கு சென்றுவிட்டு வந்தவர்கள், அவர்களுடன் தொடர்பில் இருந்தவர்கள்.

மற்றொருவர் சென்னையை சேர்ந்தவர். அவர் வெளிநாட்டிலிருந்து வந்தவருடன் தொடர்பில் இருந்துள்ளார். இதன் மூலம் நேற்றைய எண்ணிக்கையான 411 பேருடன் இன்றைய தொற்று உறுதிப்படுத்தப்பட்ட 74 பேரையும் சேர்த்தால் தமிழகத்தில் கொரோனா தொற்று பாதிப்பு எண்ணிக்கை 485 ஆக அதிகரித்து உள்ளது. இதில் 422 பேர் டெல்லி சென்று திரும்பியவர்கள் மற்றும் அவர்களுடன் தொடர்பில் உள்ளவர்கள். கட்டுப்பாட்டு நடவடிக்கைகள் அதிகப்படுத்தப்பட்டுள்ளது.

தேசிய தொற்று நோயியல் மையம் ஆராய்ச்சி மாணவர்கள் கொண்ட குழுவிடம் தொற்று நோயியல் ஆய்வு எடுக்க சொல்லி இருக்கிறோம். எப்படி இது பரவியது என்பது குறித்து ஆராயக் கூறி உள்ளோம் எனக் கூறினார்.

இதற்கிடையே தமிழகத்தில் கொரோனாவினால் பலியானோர் எண்ணிக்கை 3 ஆக உயர்ந்துள்ளது. தேனியில் 53 பெண் ஒருவரும், விழுப்புரத்தில் டெல்லி மாநாட்டுக்கு சென்று திரும்பிய 51 வயது நபரும் உயிரிழந்து உள்ளனர் என தெரிவிக்கப்பட்டுள்ளது.