#IndiaFightsCorona கொரோனா பாதிப்பு எண்ணிக்கை 571 ஆக உயர்வு; தமிழகம் மூன்றாவது கட்டத்துக்கு செல்கிறதா…?

Read Time:2 Minute, 18 Second

தமிழகத்தில் இன்று 86 பேருக்கு கொரோனா பாதிப்பு உறுதியாகி உள்ளது. இதனால் பாதிப்பு எண்ணிக்கை 485-ல் இருந்து 571 ஆக உயர்ந்து உள்ளது. கொரோனாவினால் உயிரிழந்தவர்கள் எண்ணிக்கை 5 ஆக உயர்ந்து உள்ளது.

இன்று பாதிப்பு உறுதி செய்யப்பட்ட 86 பேரில் 85 பேர் டெல்லி இஸ்லாமிய மாநாட்டுக்கு சென்று திரும்பியவர்கள். ஒருவர் துபாயிலிருந்து வந்தவர் என அரசு தரப்பில் தெரிவிக்கப்பட்டுள்ளது.

டெல்லி போய் வந்தவர்கள் குறித்து 3 துறைகள் மற்றும் எங்களது கள அலுவலர்கள் இணைந்து எடுத்த எண்ணிக்கை 1246 பேராகும். அதையும் உறுதியாக எங்களால் கணிக்க முடியவில்லை. 3 துறையும் சேர்ந்து எடுக்கப்படும் ஆய்வு முடிவில் சரியான எண்ணிக்கை வரும் என தமிழக சுகாதாரத்துறை செயலாளர் இன்று செய்தியாளர்களிடம் பேசுகையில் தெரிவித்து உள்ளார்.

கொரோனா பாதிப்பு நிலை 2-ல் இருந்து 3-க்கு போகாமல் இருப்பதை தடுக்க வேண்டும் என்று ஒவ்வொரு தமிழனும் நினைக்க வேண்டிய அவசியம் உள்ளது. அதற்காகத்தான் ஒவ்வொரு துறையும் ஒவ்வொரு அலுவலர்களும் இரவு பகல் பாராமல் உழைத்து வருகிறார்கள். அதனால் தான் கட்டுப்பாட்டு நடவடிக்கைகள் மிகவும் முக்கியமானது. பிசிஆர் டெஸ்ட் எடுத்து முடிவுவர குறைந்தது 6 மணி நேரம் ஆகும்.

அது என்னவென்றால் ஒருவரின் சளித்தொற்றை எடுத்து வைரஸின் தாக்கம் எந்த அளவு என்று வைரஸின் ஆர்என்ஐயை சோதிக்கிறோம். சில நேரம் குறைத்து காட்டும் சில நேரம் அதிகரித்து காட்டும், சில நேரம் சரியாக காட்டாது. அதனால் தான் மறுபடியும் அவர்களுக்கு சோதனை தேவைப்படுகிறது. அதில் 100 % உறுதியானால்தான் நாம் சொல்ல முடியும்,. இதற்கு டைம் எடுக்க வேண்டியுள்ளது எனவும் கூறியுள்ளார்.