#Coronavirus அமேசான் பழங்குடி பெண்ணுக்கு கொரோனா வைரஸ்! ஆபத்தில் பழங்குடி மக்கள்..!

Read Time:2 Minute, 46 Second

சீனாவில் ஆரம்பித்து, தற்போது உலகமெங்கும் பரவி வரும் கொரோனா வைரஸ் தற்போது மனிதர்கள் அரிதாக வாழும் அமேசான் காட்டிலும் நுழைந்து விட்டது என்ற செய்தி பெரும் அதிர்ச்சியை ஏற்படுத்தியுள்ளது.

உலகின் மழைக்காடுகள் என வர்ணிக்கப்படும் அமேசான் காடுகள் பெரும் பகுதி பிரேசிலில் தான் உள்ளது. இந்த காடுகளில் பல ஆயிரக்கணக்கான பழங்குடியின மக்கள் வாழ்ந்து வருகின்றனர். இவர்கள் வெளி உலகத்தொடர்பு அதிகம் இல்லாமல் தங்களுக்கு தேவையான அத்தியாவசிய தேவைகளை தாங்களாகவே பூர்த்தி செய்து கொள்கின்றனர்.

தற்போது அமேசான் காட்டில் வாழும் ஒரு பழங்குடியின பெண்ணுக்‍கு கொரோனா நோய்த்தொற்று இருப்பதை பிரேசில் உறுதி செய்துள்ளது. 20 வயதாகும் பழங்குடியின பெண்ணுக்கு கொரோனா நோய்த்தொற்று உறுதி செய்யப்பட்டுள்ளதாக பிரேசில் சுகாதார அமைச்சகம் தெரிவித்துள்ளது.

அப்பெண் சுகாதாரப் பணியாளராக செயல்பட்டு வருகிறார். அந்த பழங்குடியின பெண் நகரத்திற்குள் சென்று மருத்துவர் ஒருவரை சந்தித்ததாகவும் அந்த மருத்துவருக்கு கொரோனா இருந்ததால் அந்தப் பெண்ணுக்கும் கொரோனா தொற்றி கொண்டதாகவும் செய்திகள் வெளிவந்துள்ளது.

கொரோனா இருப்பது தெரியவந்த பிறகு, அவரோடு தொடர்பிலிருந்த 27 பேரை தனிமைப்படுத்தி கண்காணிக்கப்பட்டு வருக்கிறது . அந்த 27 பேரில் கொகாமா இனத்தைச் சேர்ந்த இந்தப் பெண்ணும் ஒருவர் என்பது குறிப்பிடத்தக்கது.

அப்பெண் மூலமாக சுற்றுவட்டாரக் கிராமங்களில் கொரோனா தொற்றுக்குப் பாதிக்கப்பட்டவர்களின் எண்ணிக்கை அதிகரிக்கலாம் என்று அஞ்சப்படுகிறது.

பூர்வகுடியின மக்கள் மத்தியில் கொரோனா வைரஸ் பாதிப்பு முதன்முதலாகக் கண்டறியப்பட்டுள்ளதை அடுத்து, உடனடி நடவடிக்கைகளை பிரேசில் அரசு எடுக்க வேண்டுமென்று மருத்துவர்கள் குழு நேற்று கோரிக்கை வைத்துள்ளது. கொரோனா பரவாமல் கட்டுக்குள் வைப்பதற்கு அவசரகால நடவடிக்கையாக முன்னெடுக்க, பிரேசில் அரசாங்கத்தின் பூர்வகுடிப் பாதுகாப்பு அமைப்பு வற்புறுத்தியுள்ளது.