#IndiaFightsCorona மும்பையில் 26 செவிலியர்கள், 3 மருத்துவர்களுக்கு கொரோனா தொற்று… ‘அலட்சியமாக செயல்பட்ட’ வொக்கார்டு மருத்துவமனைக்கு அதிகாரிகள் சீல்…!

Read Time:3 Minute, 33 Second

இந்தியாவில் கொரோனா வைரசினை கட்டுப்படுத்த மத்திய, மாநில அரசுக்கள் நடவடிக்கையை எடுத்து வருகின்றன.

இருப்பினும் கொரோனா வைரசின் பாதிப்பு ஒவ்வொருநாளும் அதிகரித்த வண்ணம் செல்கிறது. இந்தியாவில் மராட்டிய மாநிலத்தில் அதிகமானோருக்கு கொரோனா வைரஸ் பாதிப்பு ஏற்பட்டுள்ளது.

அங்கு 700 பேர் வரையில் கொரோனாவிற்கு பாதிக்கப்பட்டு உள்ளனர் என தெரிவிக்கப்பட்டுள்ளது.

இந்நிலையில் கொரோனாவின் மையப்புள்ளியாக மும்பையில் பிரபல மருத்துவமனையே மாறியுள்ளது. மும்பை வொக்கார்டு மருத்துவமனையில் பணியாற்றிய 26 செவிலியர்கள் மற்றும் 3 மருத்துவர்களுக்கு கொரோனா வைரஸ் பாதிப்பு ஏற்பட்டுள்ளது. அவர்கள் அரசு மருத்துவமனையில் தனிமைப்படுத்தப்பட்டு சிகிச்சையில் உள்ளனர். மேலும், மருத்துவமனையில் பணியாற்றிய 300 பேரை அரசு தனிமைப்படுத்தி கண்காணிப்பில் வைத்து உள்ளது. மருத்துவமனையை மும்பை மாநகராட்சி சீல் வைத்து உள்ளது. மருத்துவமனையில் கொரோனா இவ்வளவு வேகமாக பரவுவதற்கு மருத்துவமனையின் அலட்சியமே முக்கிய காரணம் என்ற குற்றச்சாட்டு எழுந்து உள்ளது.

மருத்துவமனைக்கு சீல் வைத்த மாநகராட்சி சுகாதாரத்துறை அதிகாரி சுரேஷ் ககானி பேசுகையில், “முன்னெச்சரிக்கை நடவடிக்கையை எடுக்காதது மருத்துவமனை நிர்வாகத்தின் தவறாகும். இதன் விளைவாக கிட்டத்தட்ட 300 ஊழியர்கள் தனிமைப்படுத்தப்பட்டு உள்ளனர். ஒரு மருத்துவமனையில் இவ்வளவு பேருக்கு வைரஸ் எவ்வாறு பரவியது என்பதை ஆராய ஒரு குழுவையும் நாங்கள் அமைத்துள்ளோம், ” என்று கூறியுள்ளார்.

மார்ச் 20-ம் தேதியன்று கஸ்தூரிபா காந்தி மருத்துவமனையில் இருந்து சந்தேகத்திற்கிடமான மற்றும் கொரோனா வைரசினால் பாதிக்கப்பட்ட நோயாளிகள் வொக்கார்டு கொண்டு செல்லப்பட்டுள்ளனர். அதில் கொரோனா உறுதி செய்யப்பட்டவர்கள் தனிமைப்படுத்தப்பட்ட வார்டுகளில் வைக்கப்பட்டுள்ளனர். அதே நேரத்தில் பாதிப்பு இருக்கலாம் என சந்தேகிக்கப்பட்டவர்கள் பொது ஐ.சி.யூ வார்டுகளில் வைக்கப்பட்டனர். அங்கு கொரோனா வைரஸ் பாதிப்பு இல்லாத சிகிச்சை வழங்கப்பட்டுள்ளது. இதனையடுத்து அவர்களுக்கு சிகிச்சை அளித்த இரண்டு செவிலியர்களுக்கு கொரோனா வைரஸ் பாதிப்பு ஏற்பட்டுள்ளது.

பின்னர் அவர்களிடம் இருந்து பிற செவிலியர்களுக்கும், 3 மருத்துவர்களுக்கும் பரவியுள்ளது. இதனையடுத்து மாநகராட்சி நிர்வாகம் மருத்துவமனையில் பணியாற்றிய 300 பேரை தனிமைப்படுத்தியுள்ளது. மருத்து அலட்சியம் காரணமாக நடவடிக்கையை மேற்கொண்டுள்ளது.

மருத்துவமனைக்கு எதிராக நடவடிக்கை எடுக்க செவிலியர்கள் சங்கம் மாநகராட்சி ஆணையரிடம் புகார் அளித்துள்ளது.