#Coronavirus உயிர்காக்கும் வென்டிலேட்டர்கள் செயல்படுவது எப்படி…?

Read Time:4 Minute, 2 Second

உலகம் முழுவதும் கொரோனா வைரஸ் வேகமாக பரவி வருகிறது.

மூக்கு, கண் மற்றும் வாய் வழியாக மனித உடலுக்குள் செல்லும் கொரோனா வைரஸ் செல்களுக்குள் நுழைகிறது.

கொரோனா வைரசின் மேல் பகுதியில் காளான்கள் போலிருக்கும் ஸ்பைக் புரதம் வாயிலாக வைரஸ் மனித செல்களுக்குள் நுழைகிறது. ஸ்பைக் புரதத்தை மனித உடலில் இருக்கும் புரதம் என்று செல் ஏற்கும் போது வைரஸ் தன்னுடைய வேலையை காட்டுகிறது. செல்களுக்குள் நுழையும் வைரஸ் மனிதனின் சுவாச மண்டலத்திற்குள் தன்னுடைய ஆதிக்கத்தை பெருக்கி படிப்படியாக நுரையீரலை சென்றடைகிறது.

நுரையீரலுக்குள் செல்லும் வைரஸ் தன்னுடைய இனப்பெருக்கத்தை பெருக்கி தொற்றை ஏற்படுத்துகிறது. நுரையீரலில் காளான்கள் போன்ற புடைப்பு ஏற்படுகிறது. இதனையடுத்து நிமோனியா காய்ச்சலை உருவாக்குகிறது. கொரோனா வைரஸ் விவகாரத்தில் நிமோனியா காய்ச்சல் ஏற்பட்டுவிட்டால் உயிர்பிழைப்பது கடினம் என்பதுதான் உலக விஞ்ஞானிகளின் கருத்தாக உள்ளது. அப்போது மருத்துவ சிகிச்சையுடன் போராடும் போது, வென்டிலேட்டர்கள் எனப்படும் செயற்கை சுவாச கருவிகள் மூலம் ஆக்சிஜன் அனுப்பப்படும்.

சுருக்கமாக சொல்லப்போனால், நோய்த்தொற்றால் நுரையீரல் பாதிக்கப்பட்ட நோயாளியின் ஒட்டுமொத்த சுவாச செயல்பாட்டை மேற்கொள்வது இதுவாகும். இது, நோயாளிக்கு தொற்றுநோயை எதிர்த்து போராடி அதிலிருந்து மீண்டு வருவதற்கு உதவி செய்கிறது.

நோயாளியின் மொத்த சுவாச செயல்பாட்டையும் வென்டிலேட்டர் மேற்கொள்வதால் இடைப்பட்ட காலத்தில் நோயாளியின் சுவாச தசைகள் ஓய்வெடுக்க வாய்ப்பு கிடைக்கிறது. சிக்கலான பிரச்சனையை கையாள்வதற்கு பயன்படுத்தப்படும் வென்டிலேட்டர்கள், உயர் அளவு ஆக்சிஜன் மிக்க காற்றை நுரையீரலுக்குள் செலுத்த பயனாக உள்ளது. வென்டிலேட்டர்களில் ஈரப்பதமூட்டியும் இருப்பதால் அவை செயற்கையாக செலுத்தப்படும் காற்றிலுள்ள வெப்பம் மற்றும் ஈரப்பதத்தை நோயாளியின் உடல் வெப்பநிலைக்கு ஏற்றவாறு மாற்றியமைத்து சரியாக பராமரிக்கிறது.

நோய்த்தொற்றுக்குரிய லேசான அறிகுறிகள் தென்படுபவர்களுக்கு முகக்கவசங்கள், நாசிவழி கவசங்கள் அல்லது வாய்வழி கவசங்கள் வாயிலாக காற்றோ அல்லது பலதரப்பட்ட வாயுக்களின் கலவையோ நுரையீரலுக்குள் செலுத்தப்படும். நோயின் தாக்கம் தீவிரம் கொண்டவர்களுக்கு வென்டிலேட்டர்கள் பயன்படுத்தப்படுகிறது. கொரோனா வைரஸ் நோயாளிகளுக்கு சிகிச்சையளிக்க, ஒரு வால்வு வழியாக அழுத்தப்பட்ட ஆக்சிஜன் செலுத்தப்படும் ஹுட்ஸ் ரக கருவிகள் பொதுவாக பயன்படுத்தப்படுகின்றன. இவை மூச்சு காற்றிலுள்ள திரவ துளிகளின் மூலமாக வைரஸ் காற்றின் வழியே பரவும் அபாயத்தை குறைக்கிறது.

இந்தியாவில் கொரோனா வைரஸ் பாதிப்பு அதிகரிக்கும் நிலையில், ஏற்கனவே வென்டிலேட்டர்கள் தயாரிப்பில் ஈடுபட்டுள்ள நிறுவனங்களை அதிகளவிலான கருவிகளை உற்பத்தி செய்யுமாறு மத்திய அரசு கேட்டுக்கொண்டு உள்ளது.