#IndiaFightsCorona தமிழகத்தில் கொரோனா பாதிப்பு எண்ணிக்கை 690 ஆக உயர்வு..!

தமிழகத்தில் கொரோனா வைரசால் பாதிக்கப்பட்டவர்களின் எண்ணிக்கை நாளுக்கு நாள் அதிகரித்து வருகிறது. வைரசினால் பாதித்தவர்களின் எண்ணிக்கை 690 ஆக உயர்ந்துள்ளது.

சென்னையில் சுகாதாரத்துறை செயலாளர் டாக்டர் பீலா ராஜேஷ் நேற்று செய்தியாளர்களிடம் பேசுகையில், தமிழகத்தில் 66 ஆயிரத்து 431 பேர் வீட்டு கண்காணிப்பில் இருந்து வருகின்றனர். மேலும் 253 பேர் அரசு கண்காணிப்பில் வைக்கப்பட்டு உள்ளனர். தமிழகத்தில் கூடுதலாக கொரோனா வைரஸ் கண்டறியும் 2 பரிசோதனை மையங்கள் அமைக்கப்பட்டு உள்ளன.

ஈரோடு மாவட்டம் பெருந்துறை ஐ.ஆர்.டி. அரசு மருத்துவக்கல்லூரி மருத்துவமனையில் ஒரு பரிசோதனை மையமும், மற்றொன்று தனியார் மருத்துவமனையிலும் தொடங்கப்பட்டு உள்ளது. தமிழகத்தில் கொரோனாவால் பாதிக்கப்பட்டவர்களின் எண்ணிக்கை 690 ஆக உயர்ந்துள்ளது. நேற்று ஒரே நாளில் மட்டும் 69 பேர் கொரோனா வைரஸ் தொற்றால் பாதிக்கப்பட்டு உள்ளனர். இதில் 63 பேர் டெல்லி இஸ்லாமிய மாநாட்டில் பங்கேற்றவர்கள் மற்றும் அவர்களுடன் தொடர்பில் இருந்தவர்கள் என தெரியவந்துள்ளது.

பாதிக்கப்பட்ட 69 பேரில், 3 பேர் ஒரே குடும்பத்தைச் சேர்ந்தவர்கள், ஒருவர் வெளிமாநிலம் பயணம் மேற்கொண்டுள்ளார் என்பது தெரியவந்து உள்ளது. மேலும் ஒருவர் வெளிநாட்டில் இருந்து வந்தவர்களுடன் தொடர்பில் இருந்து உள்ளார். இன்னொருவருக்கு கொரோனா எவ்வாறு ஏற்பட்டது? என்பது குறித்து கண்டறியும் பணி நடைபெற்று வருகிறது.

இதுவரை தமிழகத்தில் 34 மாவட்டங்களில் தொற்று நோய் கட்டுப்படுத்துதல் திட்டம் செயல்படுத்தப்பட்டு உள்ளது. இந்த திட்டத்தின் மூலம் 15 லட்சம் வீடுகள் கண்காணிக்கப்பட்டு வருகின்றன. இந்த வீடுகளில் இருந்த 53 லட்சம் பேருக்கு சோதனை செய்யப்பட்டு வருகிறது. தமிழக மருத்துவமனையில் கொரோனா வைரஸ் பாதிப்பால் சிகிச்சை பெற்றவர்களில் இதுவரை 19 பேர் நலமடைந்து வீடு திரும்பியுள்ளனர்.

டெல்லி மாநாட்டில் பங்கேற்றவர்கள் மற்றும் அவர்களுடன் தொடர்பில் இருந்தவர்கள் என 1,630 பேர் கண்டறியப்பட்டுள்ளனர். அவர்களின் ரத்தம் மற்றும் சளி மாதிரிகள் பரிசோதனை செய்யப்பட்டுள்ளது. அதில் 636 பேருக்கு கொரோனா தொற்று உள்ளது. மேலும் 961 பேருக்கு கொரோனா வைரஸ் பாதிப்பு இல்லை என தெரியவந்து உள்ளது. 33 பேருக்கு பரிசோதனை முடிவுகள் இன்னும் வரவில்லை. அவர்களுடன் தொடர்பில் இருந்தவர்களுக்கும் தொடர்ந்து பரிசோதனைகள் நடைபெற்று வருகிறது. இதில் சிலர் தாமாகவே முன்வந்து பரிசோதனைக்கு ஒத்துழைப்பு வழங்குகிறார்கள்.

பொதுமக்கள் அனைவரும் சமூக இடை வெளியை கடைப்பிடிக்க வேண்டியது மிகவும் அவசியம். இன்று பரிசோதனை செய்யப்பட்டு கொரோனா பாதிப்பு இல்லை என்று தெரியவந்த நபருக்கு நாளை தொற்று ஏற்படலாம். எனவே, சமூக இடைவெளி விட்டு இருக்க அறிவுறுத்துகிறோம். கொரோனா பாதிப்பு அறிகுறி இருப்பவர்கள் முடிந்த அளவு சீக்கிரமாக மருத்துவமனைக்கு வரவேண்டும் எனக் கூறினார்.

Next Post

#IndiaFightsCorona கொரோனா தடுப்பு நடவடிக்கைக்கு நடிகர் அஜித்குமார் ரூ.1¼ கோடி நிதி உதவி..!

Wed Apr 8 , 2020
இந்தியாவில் கொரோனா வைரஸ் தனது கொடிய கோர முகத்தை காட்ட துவங்கி உள்ளது. குறிப்பாக தமிழகத்தில் கொரோனா வைரஸ் பாதிப்பு ஒவ்வொரு நாளும் அதிகமாகி செல்கிறது. இந்த வைரஸ் பாதிப்பில் இருந்து மீள்வதற்காக மத்திய, மாநில அரசுகள் போர்க்கால அடிப்படையில் நடவடிக்கைகளை மேற்கொண்டு உள்ளன. வைரஸ் தடுப்பு நடவடிக்கைக்காக பிரதமர் நரேந்திர மோடியும், தமிழக முதல்-அமைச்சர் எடப்பாடி பழனிசாமியும் பொதுமக்களிடம் நிதி திரட்டி வருகிறார்கள். பொதுமக்களும் நிதியுதவி அளித்து வருகிறார்கள். […]

அதிகம் வாசிக்கப்பட்டவை