#IndiaFightsCorona இந்தியாவில் முதல் மாநிலமாக ஒடிசா ஊரடங்கை 30-ம் தேதி வரையில் நீட்டித்தது

Read Time:2 Minute, 4 Second

இந்தியாவில் கொரோனா காட்டுத்தீ போல் வேகமாக பரவ தொடங்கியதால், அதை கட்டுப்படுத்தும் வகையில் நாடு முழுவதும் 21 நாள் ஊரடங்கை மத்திய அரசு கடந்த 24-ம் தேதி இரவு அறிவித்தது. அப்போது இந்தியாவில் கொரோனா வைரசால் பாதிக்கப்பட்டவர்கள் எண்ணிக்கை 519 ஆக இருந்தது. ஊரடங்கை தொடர்ந்து மாநில, மாவட்ட எல்லைகள் சீல் வைக்கப்பட்டு ஏராளமான கட்டுப்பாடுகள் அமலில் வந்தது.

இருப்பினும் கொரோனா வைரஸ் பாதிப்பு மற்றும் உயிரிழப்பு ஒவ்வொரு நாளும் அதிகரித்துச் செல்கிறது.

21 ஊரடங்கு வரும் செவ்வாய் கிழமையுடன் முடிவடைகிறது. இருப்பினும் கொரோனா வைரஸ் பாதிப்பை கட்டுப்படுத்த முடியாத நிலையே நிலவுகிறது. இந்நிலையில், மத்திய அரசு ஊரடங்கை நீட்டிக்க வேண்டும் என மாநில அரசுக்கள் கோரிக்கை விடுக்க தொடங்கின. இவ்விவகாரம் தொடர்பாக பிரதமர் மோடி சனிக்கிழமை மாநில முதல்வர்களுடன் ஆலோசனையை மேற்கொள்கிறார்.

இந்நிலையில் இந்தியாவில் முதல் மாநிலமாக ஒடிசா ஊரடங்கை மேலும் 15 நாட்களுக்கு நீட்டித்து உள்ளது. ஏப்ரல் 30-ம் தேதி வரையில் அம்மாநிலத்தில் ஊரடங்கு நீட்டிக்கப்படுவதாக அம்மாநில முதல்வர் நவீன் பாட்நாயக் கூறியுள்ளார். மாநில அமைச்சரவை கூட்டத்தில் மக்கள் உயிருக்கு மிகவும் முக்கியத்துவம் கொடுக்க வேண்டும் எனக் இம்முடிவு எடுக்கப்பட்டதாக தெரிவிக்கப்பட்டது. மத்திய அரசையும் இந்தியா முழுவதும் 30-ம் தேதி வரையில் ஊரடங்கை உத்தரவை நீட்டிக்க கேட்டுக்கொள்வோம் எனவும் பட்நாயக் கூறியுள்ளார்.