#IndiaFightsCorona இந்தியாவில் 24 மணி நேரங்களில் 1000-த்திற்கும் மேற்பட்டோருக்கு கொரோனா வைரஸ் பாதிப்பு; உயிரிழப்பு 239 ஆக உயர்வு; மாநிலம் வாரியாக பாதிப்பு விபரம்:-

Read Time:5 Minute, 0 Second

இந்தியாவில் கொரோனா வைரஸ் பாதிப்புக்குள்ளானோர் எண்ணிக்கை 7,500-ஐ நெருக்கியது.

இந்தியாவில் கடந்த வாரம் தொடங்கி கொரோனா வைரஸ் தொற்று தீவிரமாக பரவத் தொடங்கியுள்ளது. பாதிப்புக்கப்பட்டவர்கள் மற்றும் பலியானவர்கள் எண்ணிக்கை தொடர்ந்து ஏறுமுகத்தில் இருக்கிறது. மராட்டியம், தமிழ்நாடு, டெல்லி, ராஜஸ்தான், தெலுங்கானா, ஆந்திரா உள்ளிட்ட மாநிலங்களில் கொரோனா வைரஸ் தொற்று அதிகமாகி வருகிறது.

ஊரடங்கு மற்றும் பலத்த கட்டுப்பாடுகளுக்கு மத்தியில் பாதிப்பு எண்ணிக்கை 7 ஆயிரத்தை தாண்டியுள்ளது. கடந்த 24 மணி நேரத்தில் 1,000 க்கும் மேற்பட்ட பாதிப்புகளை மாநிலங்கள் உறுதி செய்து உள்ளனர். கொரோனா வைரஸ் தொற்றுநோய் ஏற்பட்ட பிறகு ஒரே நாளில் இந்தியா கண்ட அதிக எண்ணிக்கையிலான பாதிப்பு எண்ணிக்கை இதுவாகும்.

மத்திய சுகாதார அமைச்சகத்தின் புள்ளிவிவரம், இந்தியாவில் மொத்தம் 7,447 பேருக்கு கொரோனா வைரஸ் பரவி இருப்பதாக காட்டுகிறது தெரிவிக்கிறது. நாட்டில் செயலில் உள்ள கொரோனா வைரசின் எண்ணிக்கை 6,556 ஆக உள்ளது. குறைந்தது 643 நோயாளிகள் கொடிய நோயிலிருந்து மீட்கப்பட்டு உள்ளனர். கடந்த 24 மணி நேரத்தில் 40 இறப்புகள் பதிவாகி உள்ளன, இந்தியாவில் மொத்த இறப்புகளின் எண்ணிக்கை 239 ஆக உள்ளது என்று மத்திய அரசு தெரிவிக்கிறது.

மராட்டிய மாநிலம் அதிகமாக பாதிக்கப்பட்டு உள்ளது. இங்கு, 1,500 க்கும் மேற்பட்டோருக்கு கொரோனா வைரஸ் தொற்று உள்ளது. இந்தியாவின் நிதி தலைநகரான மும்பையில் 800க்கும் மேற்பட்ட கொரோனா வைரஸ் பாதிப்புக்கள் உறுதியாகியுள்ளது. மராட்டியத்தில் இறந்தவர்களின் எண்ணிக்கை 110 ஆக உயர்ந்தது, இது வேறு எந்த மாநிலத்திலும் இல்லாத அளவுக்கு அதிகமாகும். நாட்டில் 46% க்கும் மேற்பட்ட கொரோனா வைரஸ் இறப்புகள் மராட்டிய மாநிலத்திலிருந்தே பதிவாகியுள்ளது.

கடந்த சில நாட்களில் கொரோனா வைரஸ் பாதிப்பு தமிழகத்தில் கடுமையாக அதிகரித்துள்ளது. தமிழகத்தில் மொத்தம் 911 பேருக்கு கொரோனா வைரஸ் தொற்று உள்ளது. டெல்லியில் 903 பேருக்கு கொரோனா வைரஸ் பாதிப்பு ஏற்பட்டுள்ளது. உத்தரபிரதேசத்தில் வெள்ளிக்கிழமை 20-க்கும் மேற்பட்ட வழக்குகள் பதிவாகி உள்ளன, இது மாநிலத்தின் மொத்த எண்ணிக்கையை 431 ஆக செய்துள்ளது. ராஜஸ்தானில் மொத்த கொரோனா வைரஸ் பாதிப்பு எண்ணிக்கை 553 ஆக உயர்ந்துள்ளது. மத்தியப் பிரதேசத்தில் 435 பேருக்கு பாதிப்பு ஏற்பட்டுள்ளது. அங்கு 33 பேர் இறந்துள்ளனர். கேரளாவில் 364 பேருக்கு பாதிப்பு உள்ளது. கடந்த ஒரு நாளில் மட்டும் குஜராத்தில் குறைந்தது 67 பேருக்கு நோய் தொற்று உறுதி செய்யப்பட்டுள்ளது. குஜராத்தில் பாதிக்கப்ப்பட்டவர்களின் மொத்த எண்ணிக்கை 308 ஆக உயர்ந்துள்ளது.

கொரோனா வைரஸ் நாட்டில் பரவாமல் தடுக்க இந்தியா தற்போது ஏப்ரல் 14 வரை 21 நாள் நாடு தழுவிய ஊரடங்கின் கீழ் உள்ளது. கொரோனா வைரஸ் பரவல் காரணமாக ஒடிசா மற்றும் பஞ்சாப் ஊரடங்கை 30-ம் தேதி வரையில் நீட்டித்துள்ளன. பல மாநிலங்கள் இதனை நீட்டிக்கவே விருப்பம் தெரிவிக்கின்றன. கொரோனா வைரஸ் தொற்று இந்தியாவில் சமூக பரவலாகவில்லை என சுகாதார அமைச்சகம் மீண்டும் வலியுறுத்தி உள்ளது. மாநிலம் வாரியாக பாதிப்பு விபரம்:-

ஆந்திரா – – 363, அந்தமான் – 11, அருணாச்சல் பிரதேசம் – 1, அசாம் – 29, பீகார் – 60, சண்டிகார் – 18, சத்தீஷ்கார் – 18, டெல்லி – 903, கோவா – 7, குஜராத் – 308, அரியானா – 177, இமாச்சல பிரதேசம் – 28, ஜம்மு காஷ்மீர் – 207, ஜார்கண்ட் – 14, கர்நாடகா -207, கேரளா – 364, லடாக் – 15, மத்திய பிரதேசம் – 435, மராட்டியம் – 1574, மணிப்பூர் – 2, மிசோரம் – 1, ஒடிசா – 48, புதுச்சேரி – 5, பஞ்சாப்- 132, ராஜஸ்தான் – 553, தமிழகம் – 911, தெலுங்கானா- 471, திரிபுரா – 1, உத்தரகாண்ட் – 35, உத்தரபிரதேசம்- 431, மேற்கு வங்காளம் – 116.