#Coronavirus ஊரடங்கை நீக்கினால் மிகப்பெரிய பேரழிவு ஏற்படும்… உலக சுகாதார அமைப்பு எச்சரிக்கை

Read Time:3 Minute, 54 Second

கொரோனா வைரஸ் பரவலை கட்டுப்படுத்தும் வகையில் உலகம் முழுவதும் பல்வேறு நாடுகளில் ஊரடங்கு அமலில் உள்ளது. தொடர் ஊரடங்கு காரணமாக பொருளாதாரம் பாதிக்கப்பட்டு உள்ளது.

இதற்கிடையே சற்று கட்டுக்குள் கொண்டுவரப்பட்ட இடங்களில் ஊரடங்கு திரும்பப்பெறப்பட வேண்டும் என்ற கோரிக்கையும் நிலவுகிறது.

இந்நிலையில் உலக சுகாதார அமைப்பின் தலைவர் டெட்ராஸ் அதானாம் கெப்ரியேசஸ் ஜெனிவாவில் நேற்று செய்தியாளர்களிடம் பேசுகையில், ஊரடங்கை நீக்கினால் மிகப்பெரிய பேரழிவு ஏற்படும் என எச்சரிக்கையை விடுத்தார்.

அவர் பேசுகையில், கொரோனா வைரஸால் பாதிக்கப்பட்ட சிலநாடுகள் பாதிப்பை முழுமையாக கட்டுப்படுத்தும் முன்பே ஊரடங்கை நீ்க்கவோ அல்லது கட்டுப்பாடுகளை தளர்த்தவோ முடிவெடுக்கிறார்கள். ஆனால், இது மிகப்பெரிய பேரழிவுக்கு இட்டுச்செல்லும். கொரோனா வைரஸ் பரவலை தடுக்கும் வகையில்தான் ஊரடங்கு உத்தரவி்ட்டு மக்கள் வீட்டுக்குள் முடங்கி இருக்கிறார்கள். ஆனால், கொரோனா பாதிப்பு முழுமையாக கட்டுக்குள் வரும் முன் கட்டுப்பாடுகளை தளர்த்தினால், கொரோனா வைரஸ் மீள்எழுச்சி பெற்று மோசமான பேரழிவுகளை தரும்.

எனவே, கொரோனா வைரஸ் பாதிக்கப்பட்ட நாடுகளில் கட்டுப்பாடுகளை உடனடியாக தளர்த்தாதீர்கள், சிறிது சிறிதாக கட்டுப்பாடுகளை தளர்த்துங்கள் என உலக சுகாதார அமைப்பு அறிவுறுத்துகிறது. ஊரடங்கை நீ்க்கும் முன் உலக நாடுகள் கவனம் செலுத்த வேண்டிய 6 முக்கிய விஷயங்களை கவனத்தில் கொள்ள வேண்டியது அவசியம்.

* வைரஸ் பரவலை கட்டுப்படுத்தி இருக்க வேண்டும்.

* மக்களுக்கு போதுமான அளவு பொதுச்சுகாதார சேவையை தயாராக வைத்திருக்க வேண்டும்.

* வைரஸ் பாதிப்பில் சிகிச்சை பெற்றுவருபவர்கள் எண்ணிக்கை குறைந்திருக்க வேண்டும்.

* பணியிடங்களிலும், பள்ளி, கல்லூரிகளில் தடுப்பு நடவடிக்கைகள் இருக்க வேண்டும்.

* வைரஸ் பரவலை கட்டுப்படுத்த வெளிநாடுகளில் இருந்து வருபவர்களை சரியாக சோதனைக்கு உட்படுத்தும் வழிகளை கையாளவேண்டும்.

* அனைத்து மக்களுக்கும் விழிப்புணர்வு விஷயங்களையும், கொரோனா குறித்த விழிப்புணர்வு பிரச்சாரமும் சென்ற சேர்ந்திருக்க வேண்டும. இவை அனைத்தையும் முழுமையாக செய்த பின்னர்தான் கட்டுப்பாடுகளை தளர்த்த முடிவு செய்ய வேண்டும்

ஐரோப்பிய கண்டத்தில் ஸ்பெயின், இத்தாலி, பிரான்ஸ் போன்ற கொரோனா பாதி்த்த நாடுகளில் உயிரிழப்பு குறைந்து வருவதும், பரவல் கட்டுப்படுத்தப்பட்டு இருப்பதும் வரவேற்கத்தக்கது. அடுத்ததாக ஆப்பிரிக்க நாடுகளில் கொரோனா வைரஸ் பரவும் வாய்ப்புள்ளதாக அந்நாடுகள் மிகுந்த எச்சரிக்கையுடன் இருக்க வேண்டும். குறிப்பாக ஆப்பிரிக்க கிராமங்கள் விழிப்புடன் இருக்க வேண்டும். எங்களின் ஆய்வுகளின்படி கொரோனா பாதித்த 16 நாடுகளில் சமூகப் பரவல் இருப்பதை கண்டுபிடித்திருக்கிறோம் எனக் கூறியுள்ளார்.