#Coronavirus டொனால்டு டிரம்ப் பரிந்துரை செய்த மத்திரைகளை சாப்பிட்ட பலருக்கு இதயத்தில் பாதிப்பு ….!

Read Time:3 Minute, 40 Second

கொரோனா வைரசுக்கு பயனளிக்கும் என டொனால்டு டிரம்ப் பரிந்துரை செய்த மாத்திரைகளை சாப்பிட்ட பலருக்கு இதயத்தில் பாதிப்பு நேரிட்டு உள்ளது என செய்திகள் வெளியாகியுள்ளது.

உலகம் முழுவதும் உயிர்க்கொல்லி நோயான கொரோனா வைரஸ் வேகமாக பரவி, மனிதர்களின் உயிரை குடித்து வருகிறது. வைரசில் இருந்து தற்காத்துக்கொள்ள ஒவ்வொரு நாடும் போராடி வருகிறது. இதற்கிடையே இருப்பில் இருக்கும் மருந்துகளையும் மருத்துவர்கள் சிகிச்சைக்கு பயன்படுத்துகிறார்கள். இவ்வரிசையில் மலேரியா எதிர்ப்பு மருந்தான ஹைட்ராக்ஸிகுளோரோகுயின் மாத்திரைகள் முக்கியத்துவம் பெற்று உள்ளது.

இம்மாத்திரைகள் வைரசுக்கு எதிராக செயல்படுகிறது என்று சில தரப்பில் கூறப்பட்டாலும் பக்கவிளைவுகள் பற்றி அதிகமான கவலை எழுப்பப்பட்டு வருகிறது.

இது உண்மையிலே சிகிச்சைக்கு பயனளிக்கிறதா என்பது மருத்துவ ஆய்வினால் அறியப்படாத போதிலும், அமெரிக்க அதிபர் டொனால்ட் டிரம்ப் மலேரியா எதிர்ப்பு மருந்தான ஹைட்ராக்ஸிகுளோரோகுயின் கொரோனா வைரஸ் தொற்றுநோய்க்கு எதிரான போராட்டத்தில் பயனளிக்கிறது என்று பிரசாரம் செய்து வருகிறார். ஆனால், அவருடைய இந்த கூற்று பலரை மாத்திரைகளை தவறாக எடுக்க கூடும் என விமர்சனம் எழுகிறது. “இம்மாத்திரைகளை மருத்துமனையில் சிகிச்சை பெறும் நோயாளி மருத்துவர்களின் கண்காணிப்பில் அவர்களுடைய பரிந்துரையில் எடுக்கலாம்,” என விஞ்ஞானிகள் தரப்பில் தெரிவிக்கப்படுகிறது.

இதற்கிடையே மாத்திரைகள் தொடர்பாக கண்மூடித்தனமான பிரசாரம் செய்யப்படுகிறது.

இந்நிலையில் கொரோனா வைரசுக்கு பயனளிக்கும் என டொனால்டு டிரம்ப் பரிந்துரை செய்த மாத்திரைகளை சாப்பிட்ட பலருக்கு இதயத்தில் பாதிப்பு நேரிட்டு உள்ளது என செய்திகள் வெளியாகியுள்ளது.

பிரான்சில் மார்ச் 27 முதல் கொரோனா வைரஸ் பாதிப்புக்கு மலேரியா மாத்திரைகளை பயன்படுத்தியவர்களில் சுமார் 100 பேருக்கு சுகாதார பிரச்சனைகள் தொடர்பான சம்பவங்கள் நேரிட்டுள்ளது. இதில் 4 இறப்புகளும் அடங்கும் என அந்நாட்டின் தேசிய மருந்து பாதுகாப்பு நிறுவனமான ஏ.என்.எஸ்.எம் வெள்ளிக்கிழமை தன்னுடைய அறிக்கையில் தெரிவித்துள்ளது. கொரோனா வைரஸ் நோயாளிகளுக்கு ஹைட்ராக்ஸிகுளோரோகுயின் மாத்திரைகள் மூலம் சிகிச்சை பெற்ற 43 பேருக்கு இதய கோளாறு தொடர்பான சம்பவங்கள் நேரிட்டு இருப்பதாக பிரான்ஸ் தெரிவித்துள்ளது.

ஹைட்ராக்ஸிகுளோரோகுயின் பக்கவிளைவுகள் முக்கியமாக பார்க்கப்படுகிறது. இது, கொரோனா நோயாளிகளை விரைவாக மீட்க உதவியிருக்கலாம், ஆனால் மருந்து சில கடுமையான பக்க விளைவுகளை ஏற்படுத்தும் என்று அறியப்படுகிறது.