#IndiaFightsCorona இந்தியாவில் ஊரடங்கை நீட்டிக்க வேண்டும் என்ற கோரிக்கையை பிரதமர் மோடி ஏற்றார்… எந்த நேரமும் அறிவிப்பு வெளியாகலாம்…

Read Time:1 Minute, 50 Second

இந்தியாவில் கொரோனா வைரஸ் பரவுவதை தடுக்க மத்திய அரசு கடந்த மாதம் 24-ம் தேதி நாடு முழுவதும் முழு ஊரடங்கு அமல்படுத்தியது. வரும் 14-ம் தேதியுடன் ஊரடங்கு காலம் முடிகிறது. ஆனால், இந்தியாவில் தற்போது கொரோனாவால் பாதிக்கப்பட்டோர் எண்ணிக்கை தொடர்ந்து அதிகரித்து வருகிறது. இந்நிலையில் ஊரடங்கை நீட்டிப்பது மட்டுமே கொரோனாவை கட்டுப்படுத்த பயனுள்ளதாக இருக்கும் என வலியுறுத்தப்பட்டு வருகிறது.

இதற்கிடையே ஒடிசா மற்றும் பஞ்சாப் மாநிலங்கள் ஊரடங்கை ஏப்ரல் 30-ம் தேதி வரையில் நீட்டித்துவிட்டன. ஊரடங்கை நீட்டிப்பது தொடர்பாக இன்று பிரதமர் மோடி மாநில முதல்வர்களுடன் ஆலோசனையை மேற்கொண்டார். அப்போது, ஊரடங்கை நீட்டிக்க வேண்டும் என்ற கோரிக்கை பல்வேறு மாநில முதல்வர்களால் முன்வைக்கப்பட்டு உள்ளது என தகவல் வெளியாகியது.

நாடுதழுவிய ஊரடங்கு மூலம் மட்டுமே கொரோனாவை கட்டுப்படுத்த முடியும் எனவும் தெரிவித்ததாக தகவல் வெளியாகியது. இதனையடுத்து பெரும்பாலான மாநில முதல்வர்களின் பரிந்துரையை ஏற்று ஏப்ரல் 30-ம் தேதி வரை ஊரடங்கு உத்தரவை நீட்டிப்பது என மத்திய அரசு முடிவெடுத்துள்ளதாக தகவல் வெளியாகி உள்ளது. மாநில முதல்வர்களின் கோரிக்கையை பிரதமர் மோடி ஏற்றுக்கொண்டுள்ளார். எனவே, விரைவில் அதிகாரபூர்வ அறிவிப்பு வெளியாகலாம் என எதிர்பார்க்கப்படுகிறது.