#IndiaFightsCorona ஒரேநாளில் மேலும் 77 கொரோனா பாதிப்பு உறுதி… தமிழகத்தில் கொரோனா பாதிப்பு 2-வது கட்டத்தில்தான் உள்ளது என அரசு தகவல்

Read Time:6 Minute, 7 Second

தமிழகத்தில் கொரோனா வைரஸ் தாக்கம் ஒவ்வொரு நாளும் அதிகரித்து காணப்படுகிறது.

வைரஸ் பாதிப்பு தொடர்பான தகவல்கள் ஒவ்வொருநாள் மாலையிலும் அரசு தரப்பில் தெரிவிக்கப்பட்டது. நேற்று மாலை தமிழக தலைமைச் செயலாளர் கே.சண்முகம் செய்தியாளர்களிடம் பேசுகையில் விபரங்களை வெளியிட்டார்.

அப்போது நேற்று ஒரேநாளில் 77 பேருக்கு கொரோனா வைரஸ் பாதிப்பு நேரிட்டதாக தெரிவித்தார். இதில் 70 பேர் ஒரே குழுவை சேர்ந்தவர்கள் மற்றும் அவர்களுடன் தொடர்பில் இருந்தவர்கள் என தெரிவிக்கப்பட்டுள்ளது. அரசு தரப்பில் பெயர் குறிப்பிடப்பட வில்லை என்றாலும், இது மார்ச் மாதத்தில் டெல்லியில் நடைபெற்ற தப்லிக் ஜமாத் மாநாட்டில் கலந்துக்கொண்டவர்கள் மூலம் ஏற்பட்ட பாதிப்பை குறிப்பதாக பரவலாக புரிந்து கொள்ளப்படுகிறது.

இதனால் தமிழகத்தில் மொத்தமாக பாதிக்கப்பட்டவர்களின் எண்ணிக்கை 834-ல் இருந்து 911 ஆக உயர்ந்து உள்ளது. இதற்கிடையே தூத்துக்குடியில் கொரோனா வைரஸ் பாதிப்பு காரணமாக 71 வயது மூதாட்டி உயிரிழந்து உள்ளார். இதனால் தமிழகத்தில் கொரோனாவினால் உயிரிழந்தவர்கள் எண்ணிக்கை 9 ஆக உயர்ந்து உள்ளது.

கே.சண்முகம் பேசுகையில், கொரோனா வைரஸ் தொற்று நோய் தடுப்பது குறித்து கடுமையான நடவடிக்கையை அரசு எடுத்து வருகிறது. வைரஸ் தொற்றை கட்டுப்படுத்த தான் ஊரடங்கு நடவடிக்கை எடுத்து வருகிறோம். இதுவரை கட்டுப்படுத்தப்பட்ட பகுதியை தவிர வேறு எங்கும் கொரோனா பாதிப்பு வந்துவிடாத வகைக்கு நடவடிக்கை எடுக்கப்பட்டு வருகிறது. அந்த வகையில் 10-ந்தேதி 77 பேர் கொரோனா வைரஸ் தொற்றால் பாதிக்கப்பட்டு உள்ளனர்.

இவர்கள் ஏற்கனவே கொரோனாவால் பாதிக்கப்பட்ட 5 பேரிடம் இருந்து தொற்று பரவி உள்ளது. மேலும் தமிழகத்தில் கொரோனா வைரஸ் பாதிப்பு சமூக பரவலாக மாறுகிறதா? என்பதை கண்காணிக்க குழு அமைக்கப்பட்டு உள்ளது. ஊரடங்கு மூலம் மக்களுக்கு ஏற்படும் பாதிப்புகள் அனைத்தையும் முதல்-அமைச்சர் ஆய்வு செய்து அதற்கான நடவடிக்கையை எடுத்து வருகின்றார். முதல்-அமைச்சர் 12 குழுக்கள் அமைத்து அவர்களின் கருத்துக்களை கேட்டார்கள்.

தொற்று கட்டுக்குள் வந்த பிறகு தான் ஊரடங்கை விலக்கினால் பிரச்சினை வராது அனைவரின் பொதுவான கருத்தாகும். இல்லை என்றால் இதுவரை எடுத்த முயற்சி எல்லாம் வீணாகிவிடும் என்றும் கூறினார்கள். இதுகுறித்து முதல்-அமைச்சர் கவனமாக பரிசீலனை செய்து வருகிறார். இன்று பிரதமருடன் காணொலி காட்சி ஆய்வுக் கூட்டம் இருக்கிறது. அதன்பின்னர் இதுபற்றி சரியான முடிவை அமைச்சரவை கூட்டத்தில் ஆலோசித்து அறிவிப்பார்.

துரித பரிசோதனை உபகரணங்கள் (ராப்பிட் கிட்) வருவதில் தாமதம் ஏற்பட்டு உள்ளது. மத்திய அரசு துரித பரிசோதனை உபகரணங்கள் வாங்கி அதில் ஒரு பகுதியை நமக்கு தருவதாக தெரிவித்து உள்ளது. அது ஓரிரு நாளில் வந்துவிடும். மருத்துவ உபகரணங்களை தனிமனித பாதுகாப்பு உடை, முக கவசங்கள், ‘வெண்டிலேட்டர்கள்’ உள்ளிட்டவைகளை மத்திய அரசிடம் எதிர்பார்ககாமல், திருப்பூரில் உள்ள சில உற்பத்தியாளர்களை தொடர்பு கொண்டு அவர்களிடம் நேரடியாகவே கொள்முதல் செய்கிறோம்.

மத்திய அரசு நிதி வழங்குவது குறித்து பரிசோதனை செய்து வருகிறது. மத்திய அரசு தரப்பில் ஏற்கனவே முன்கூட்டியே ரூ.510 கோடி ஒதுக்கி உள்ளது. தற்போது ரூ.314 கோடி தேசிய சுகாதார ‘மிஷன்’ நிதியில் இருந்து ஒதுக்கப்பட் உள்ளது. தமிழகத்தில் மருத்துவமனையில் சிகிச்சை பெற்று வந்தவர்களில் 44 பேர் டிஸ்சார்ஜ் செய்யப்பட்டு உள்ளனர்.

தற்போது உள்ள புள்ளிவிவரங்கள் அடிப்படையில் தமிழகம் கொரோனா வைரஸ் தொற்று பாதிப்பில் 2-வது கட்டத்தில்தான் உள்ளது. கண்டறிய முடியாத நிலையில் பலருக்கு பரவுவது தான் 3-வது கட்டமாகும். இந்த 3-வது கட்டத்துக்கு செல்லாமல் தடுப்பதற்காக தான் கடுமையான நடவடிக்கை எடுக்கப்பட்டு வருகிறது. இதுவரையில் தமிழகத்தில் கொரோனா வைரஸ் தடுப்பு பணியில் ஈடுபடுபவர்களுக்கு, கொரோனா வைரஸ் தொற்று பாதிப்பு ஏற்படவில்லை.

அரசு மருத்துவர்கள் யாருக்கும் ஏற்படவில்லை. ஈரோட்டில் பணிபுரிந்த மருத்துவருக்கு மட்டும் வந்துள்ளது. அந்த டாக்டர் கொரோனா பாதித்தவர் என தெரியாமல் சாதாரண காய்ச்சல் உள்ளவர்களை கவனிப்பது போன்று கவனித்து உள்ளார். அதனால்தான் அவருக்கு வந்து உள்ளது. தற்போது அனைத்து டாக்டர்களுக்கும் காய்ச்சல், அதிக மூச்சுத்திணறல் உள்ளவர்களை முறையான பாதுகாப்பு உடை அணிந்து தான் பரிசோதனை செய்ய வேண்டும் என உத்தரவிட்டுள்ளோம் எனக் கூறினார்.

தமிழகத்தில் கொரோனாவால் பாதிக்கப்பட்டவர்களில் 832 பேர் டெல்லி இஸ்லாமிய மாநாட்டில் கலந்து கொண்டவர்கள் மற்றும் அவர்களுடன் தொடர்பில் இருந்தவர்கள்.