#IndiaFightsCorona மும்பையில் தாஜ் ஓட்டல் ஊழியர்கள் 6 பேருக்கும், தி டைம்ஸ் செய்தி நிறுவன ஊழியர்கள் 6 பேருக்கும் கொரோனா வைரஸ் பாதிப்பு…

Read Time:2 Minute, 46 Second

இந்தியாவிலே மராட்டிய மாநிலம் தான் கொரோனா வைரஸ் பாதிப்பில் முதலிடத்தில் உள்ளது. அங்கு கொரோனா பாதிப்பு எண்ணிக்கை 1,895 ஆக உள்ளது. மராட்டியத்தில் வருகிற 30-ந் தேதி வரை ஊரடங்கை நீட்டிப்பதாக அம்மாநில முதல்வர் உத்தவ் தாக்கரே நேற்று (ஏப்ரல் -11) அறிவித்தார்.

இக்கட்டான நிலையிலும் கொரோனாவை கட்டுப்படுத்துவதில் மராட்டியம் முதன்மை மாநிமாக உள்ளது எனவும் குறிப்பிட்டார்.

அப்போது, மும்பையை பொறுத்த வரை கொரோனா தொற்று ஏற்பட்டவர்களில் 60 முதல் 70 சதவீதம் பேர் லேசான மற்றும் மிக லேசான பாதிப்புக்கு உள்ளானவர்கள். இறப்புக்கு ஆளானவர்கள் வேறு சில நோய் பாதிப்புக்கும் உள்ளானவர்கள். பலர் நோய் தாக்கத்தின் கடைசி கட்டத்தில் ஆஸ்பத்திரிக்கு வந்தவர்கள். கொரோனாவால் பாதிக்கப்பட்டவர்கள் எண்ணிக்கை நாளுக்கு நாள் அதிகாிக்கிறது. அனைவரும் வீடுகளில் தான் உள்ளனர்.

என்ன செய்வது என்று எங்களுக்கு தெரியவில்லை. கொரோனாவை கண்டு மக்கள் பயப்பட வேண்டாம். ஆனால் நாம் கொரோனாவை விரட்ட ஒன்றுப்பட்டு போராட வேண்டும் என்று கூறியிருந்தார். மராட்டியத்தில் கொரோனாவினால் பாதிக்கப்பட்டவர்களுக்கு சிகிச்சையளிக்கும் மருத்துவர்களுக்கு பல தரப்பும் உதவி செய்து வருகிறது.

இந்நிலையில், மும்பை தாஜ் ஓட்டலில் கொரோனா நோயாளிகளுக்கு சிகிச்சையளிக்கும் மருத்துவர்கள் தங்கலாம் என்று சிறப்பு அனுமதி வழங்கப்பட்டது. அதன் பிறகு பல மருத்துவர்கள் இந்த ஓட்டலுக்கு வந்து தங்கினர். இத்தகைய சூழ்நிலையில், ஓட்டலின் 6 ஊழியர்கள் கொரோனாவால் பாதிக்கப்பட்டு உள்ளனர் என்பது பரிசோதனையில் உறுதியாகியுள்ளது.

இதற்கிடையே தி டைம்ஸ் நெட்வோர்க் நிறுவனத்தின் 6 ஊழியர்களுக்கு கொரோனா வைரஸ் பாதிப்பு உறுதி செய்யப்பட்டுள்ளது. பாதுகாப்பு மற்றும் முன்னெச்சரிக்கை நடவடிக்கைகள் எடுக்கப்பட்டும் வைரஸ் பாதிப்பு நேரிட்டுள்ளது என அந்நிறுவனம் தரப்பில் தெரிவிக்கப்பட்டுள்ளது. இந்நிலையில் இவர்களுடன் தொடர்பில் இருந்தவர்கள் யார் என்பதை அடையாளம் காணும் பணி தொடங்கியுள்ளது.