#Corona ஊரடங்குக்கு இடையில் பி.எப். தொகையை வரி இல்லாமல் பெறலாம்… எவ்வளவு தொகையை எடுக்கலாம்…? விண்ணப்பிப்பது எப்படி…?

Read Time:4 Minute, 42 Second

கொரோனா வைரஸ் பரவலை அடுத்து இந்தியா முழுவதும் ஊரடங்கு உத்தரவு அமல்படுத்தப்பட்டு உள்ளது.

இந்த காலக்கட்டத்தில் இ.பி.எப். தொகையை வரியில்லாமல் எடுக்க மத்திய அரசு அனுமதியளித்து உள்ளது. மனித தலையீடு இல்லாமல் ஆன் -லைனிலே தொகையை பெறும் வகையில் நடவடிக்கை மேற்கொள்ளப்பட்டு உள்ளது. மத்திய தொழிலாளர் நல அமைச்சகம் வெளியிட்ட செய்தி அறிக்கையில், 3 மாத அடிப்படை சம்பளம் மற்றும் அகவிலைப்படி அல்லது இ.பி.எப். கணக்கில் உள்ள பணத்தில் 75 சதவீதம், இதில் எது குறைவாக உள்ளதோ அதனை உறுப்பினர்கள் பெற்றுக்கொள்ளலாம் என தெரிவிக்கப்பட்டது.

கொரோனா வைரஸ் தொற்று நோய் காரணமாக பல சம்பள வாங்கும் நபர்கள் எதிர்கொள்ளக்கூடிய நிதி சுமையை கருத்தில் கொண்டு, 2020 மார்ச் 20 அன்று ஊழியர்களின் வருங்கால வைப்பு நிதியம் (EPF) கணக்கிலிருந்து தொகையை பெறுவதற்கான சிறப்பு ஏற்பாட்டை அரசாங்கம் அனுமதித்தது. அறிவிக்கப்பட்டதிலிருந்து ஊழியர்களின் வருங்கால வைப்பு நிதி அமைப்பு (EPFO) சுமார் 1.37 லட்சம் கோரிக்கைகளை ஏற்று சுமார் ரூ. 2.8 பில்லியன் நிதியை வழங்கும் பணியை தொடங்கியது என தெரிவிக்கப்பட்டுள்ளது.

இப்போது கொரோனா ஊரடங்குக்கு மத்தியில் இபிஎஃப் கணக்கிலிருந்து நிதியை எடுக்க நீங்கள் முடிவு செய்தால், வரிவிதிப்பிலிருந்து விலக்கு அளிக்கப்படுகிறது. எவ்வளவு மற்றும் எப்படி நீங்கள் நிதிகளை திரும்பப் பெறலாம் என்பதை இங்கே பார்க்கலாம்…

நீங்கள் எவ்வளவு தொகையை திரும்ப பெறலாம்?

3 மாத அடிப்படை சம்பளம் மற்றும் அகவிலைப்படி அல்லது இபிஎப் கணக்கில் உள்ள பணத்தில் 75 சதவீதம், இதில் எது குறைவாக உள்ளதோ அதனை பெற்றுக்கொள்ளலாம் என தெரிவிக்கப்பட்டு உள்ளது. உதாரணமாக, உங்கள் இபிஎஃப் இருப்பு ரூ. 3 லட்சமாகவும், உங்கள் அடிப்படை சம்பளம் மற்றும் அகவிலைப்படி மாதத்திற்கு ரூ. 30 ஆயிரமாகவும் இருப்பின் நீங்கள் ரூ. 90,000 (3 மாத சம்பளம்) அல்லது ரூ. 2.25 லட்சம் (ஈபிஎஃப் இருப்பில் 75%) இதில் எது குறைவோ அதனை திரும்பப்பெற தகுதியுடையவர், அதாவது நீங்கள் ரூ. 90,000 வரையில் வட்டியின்றி திரும்பப் பெறலாம். உங்களுக்கு குறைந்த தொகை தேவைப்பட்டால் அதற்கேற்ப கோரிக்கையை வைக்கலாம்.

பணம் திரும்பப் பெறுவது எப்படி?

உங்கள் இபிஎஃப் கணக்கிலிருந்து நிதியை திரும்பப் பெற விரும்பினால், முதலில் உங்கள் பொதுக் கணக்கு எண் (UAN) மற்றும் பாஸ்வேர்டை பயன்படுத்தி உங்கள் இபிஎஃப் கணக்கிற்கு செல்ல வேண்டும். பின்னர் ஆன்-லைன் சேவைகள் பகுதிக்கு சென்று ‘Claim’ பகுதியை கிளிக் செய்ய வேண்டும். Claim (Form-31,19,10C & 10D) -ல் உங்கள் இபிஎஃப் கணக்கில் ஆதார் எண்ணை நீங்கள் புதுப்பித்திருந்தால் மட்டுமே நீங்கள் மேலும் தொடர முடியும். உங்கள் ஆதார் இபிஎஃப் கணக்கில் புதுப்பிக்கப்பட்டிருந்தால், சரிபார்ப்புக்காக உங்கள் வங்கி கணக்கின் நான்கு இலக்கங்களை உள்ளிடுமாறு அது கேட்கும். வங்கி கணக்கை சரிபார்த்த பிறகு “ஆன்லைனில் பணத்தை திரும்பப்பெறுதலை தொடரவும்” என்ற விருப்பத்தை கிளிக் செய்யவும்.

அடுத்தது திரும்பப் பெறுவதற்கு பொருந்தக்கூடிய படிவத்தை தேர்ந்தெடுப்பதாகும். அதாவது, கீழ்தோன்றும் பட்டியலில் இருந்து படிவம் 31-ல் “Outbreak of pandemic (COVID-19)” என்பதை தேர்வு செய்யவும். இதற்கு பின்னர் காசோலை அல்லது பாஸ் புத்தகத்தின் ஸ்கேன் செய்யப்பட்ட நகலை பதிவேற்றவேண்டும். மேலும் தொடர “ஆதார் OTP-ஐ பெறு” என்பதை கிளிக் செய்து, ஆதாருடன் இணைக்கப்பட்ட மொபைலில் பெறப்பட்ட OTP-ஐ அளிக்க வேண்டும். பின்னர் மூன்று வேலை நாட்களில் கோரிக்கையை தீர்ப்பதாக EPFO நிறுவனம் தெரிவிக்கிறது.