#IndiaFightsCorona தமிழகத்தில் கொரோனா பாதிப்பு 1173 ஆக உயர்வு… மதுரையில் ஒரேநாளில் 14 பேருக்கு பாதிப்பு…

Read Time:3 Minute, 48 Second

தமிழகத்தில் கொரோனாவினால் பாதிக்கப்பட்டவர்கள் எண்ணிக்கை தொடர்ந்து உயர்ந்த வண்ணம் உள்ளது.

தமிழகத்தில் புதிதாக 98 பேருக்கு கரோனா வைரஸ் நோய்த் தொற்று உறுதி செய்யப்பட்டுள்ளதாக தமிழக சுகாதாரத் துறைச் செயலாளர் பீலா ராஜேஷ் செய்தியாளர்களிடம் பேசுகையில் தெரிவித்துள்ளார்.

அவர் இன்று செய்தியாளர்களிடம் பேசுகையில், தமிழகத்தில் வீட்டு கண்காணிப்பில் உள்ளவர்களின் எண்ணிக்கை 33,850 ஆகும். 136 பேர் அரசுக் கண்காணிப்பில் உள்ளனர். இதில் 28 நாள்கள் கண்காணிப்பு முடித்தவர்கள் 63,380 ஆவர். தமிழகத்தில் 25 அரசு ஆய்வகங்கள், 9 தனியார் ஆய்வகங்கள் உருவாக்கப்பட்டு உள்ளன. இதுவரை 12,746 பேருக்கு கொரோனா தொற்று பரிசோதனை செய்யப்பட்டு உள்ளது. அதில், நேற்று வரையில் 1,075 பேருக்கு தொற்று உறுதி செய்யப்பட்டிருந்தது.

இன்றைக்கு புதிதாக 98 பேருக்கு கொரோனா வைரஸ் நோய் தொற்று இருப்பது உறுதி செய்யப்பட்டு உள்ளது. இந்த 98 பேரில் 91 பேருக்கு நேரடியாக பாதிப்பு உருவாகியுள்ளது. மீதமுள்ள 7 பேர் பாதிப்புடையவர்களுடன் தொடர்பில் இருந்தவர்கள்.

மாநிலத்தில் மொத்தம் பாதிப்பு: 1,173, உயிரிழப்பு: 11, குணமடைந்தோர்: 58. பாதிக்கப்பட்டவர்களில் இன்றைய நிலவரப்படி யாரும் வென்டிலேட்டரில் இல்லை என்று தெரிவித்து உள்ளார்.

இன்று புதியதாக பதிவாகியுள்ள 96 பாதிப்புகளில் அதிகமாக திருப்பூர் (18), கரூர் (15), மதுரை (14), சென்னை (9) யில் பதிவாகியுள்ளது என அரசு வெளியிட்டுள்ள தகவலில் தெரிவிக்கப்பட்டுள்ளது. கொரோனா பரவலில் மாநில அரசு மாவட்டங்களை சிவப்பு, ஆரஞ்சு, மஞ்சள் என்று பிரித்து உள்ளது. வேகமாக ‘கொரோனா’ பரவும் மாவட்டங்கள் சிவப்பு நிறத்தில் பட்டியலில் இடம்பெற்றிருந்தது. இதில் சென்னை, கோவை, திருப்பூர், திருநெல்வேலி, மதுரை தூத்துக்குடி உள்பட 17 மாவட்டங்கள் இடம்பெற்று உள்ளன.

இதில் மதுரை மாவட்டம் சிவப்பு பட்டியலில் வேகமாக ‘கொரோனா’ பரவும் மாவட்டங்கள் பட்டியலில் இடம்பெற்றுள்ளது. மதுரையில் ஒரே நாளில் 14 பேர் பாதிக்கப்பட்டிருப்பதாக அறிவிக்கப்பட்டுள்ளது. அதனால், மதுரை மாவட்டத்தில் இந்த நோயால் பாதிக்கப்பட்டவர் எண்ணிக்கை 25 லிருந்து 39 ஆக உயர்ந்து உள்ளது. கடந்த 3 நாட்களாக மதுரை மாவட்டத்தில் இந்த நாட்களில் ஒரு நோயாளிக்கு கூட இந்த தொற்று நோய் உறுதி செய்யப்படவில்லை.

மாவட்டத்தில் ஏற்கெனவே இந்த தொற்று உறுதி செய்யப்பட்ட பகுதிகள் ‘சீல்’ வைக்கப்பட்டு அங்குள்ள மக்கள் வெளியேற முடியாதப்படிக்கும், வெளியாட்கள் அந்த பகுதிக்கு வராதப்படிக்கு தடை செய்யப்பட்டது. மதுரை மாவட்டம் ஏற்கனவே சிவப்பு பட்டியலில் இருந்தாலும் ஒரளவு ‘கொரோனா’ கட்டுக்குள் இருப்பதாக மாவட்ட மக்கள் நம்பிக்கையுடன் இருந்தது. இந்நிலையில் புதியதாக 14 பேருக்கு பாதிப்பு உறுதி செய்யப்பட்டு உள்ளது அதிர்ச்சியை ஏற்படுத்தியுள்ளது.