#IndiaFightsCorona இந்தியாவில் கொரோனா வேகமாக பரவுகிறது; ஊரடங்கு மே 3 வரை நீட்டிப்பு – பிரதமர் மோடி!

Read Time:4 Minute, 15 Second
Page Visited: 54
#IndiaFightsCorona இந்தியாவில் கொரோனா வேகமாக பரவுகிறது; ஊரடங்கு மே 3 வரை நீட்டிப்பு – பிரதமர் மோடி!

இந்தியாவில் கொரோனா வைரஸ் வேகமாக பரவும் நிலையில் ஊரடங்கு மே 3-ம் தேதி வரையில் நாடும் முழுவதும் நீட்டிக்கப்படுகிறது என பிரதமர் நரேந்திர மோடி அறிவித்து உள்ளார்.

இந்தியாவில் கொரோனா வைரஸ் தொற்றை தடுக்கும் வகையில் மார்ச் மாதம் 25-ம் தேதி முதல்கட்டமாக 21 நாட்கள் ஊரடங்கை பிரதமர் மோடி அறிவித்தார். இன்றுடன் 21 நாட்கள் முடிவடைந்தது. இருப்பினும் இந்தியாவில் கொரோனா வைரசின் தாக்கம் குறையவில்லை. ஊரடங்கு அமல்படுத்தப்பட்ட போது 500-ஐ தாண்டிருந்த கொரோனா வைரஸ் பாதிப்பு தற்போது 10 ஆயிரத்தை கடந்து உள்ளது. கொரோனா வைரசின் தாக்கம் அதிகமாக காணப்படுவதால் ஊரடங்கை நீட்டிக்க வேண்டும் என்ற கோரிக்கை மத்திய அரசுக்கு வைக்கப்பட்டது.

இதற்கிடையே தெலுங்கானா, தமிழகம், பஞ்சாப், மராட்டியம், மேற்குவங்காளம் ஆகிய மாநிலங்கள் ஊரடங்கை ஏப்ரல் 30-ம் தேதி வரையில் நீட்டித்தன. இந்நிலையில் பிரதமர் மோடி இன்று (ஏப்ரல் -14) நாட்டு மக்களிடம் உரையாற்றுவார் என தெரிவிக்கப்பட்டது.

அதன்படி இன்று நாட்டு மக்களுக்கு உரையாற்றிய பிரதமர் மோடி, கொரோனா வைரசை கட்டுப்படுத்த கொண்டுவரப்பட்டுள்ள ஊரடங்கால் மக்களுக்கு பல்வேறு சிரமங்கள் இருப்பதை நான் அறிகிறேன். வீட்டுக்குள்ளே இருப்பதாலும் பல்வேறு சிரமங்களை சந்தித்து வருகிறீர்கள். கொரோனாவுக்கு எதிரான போராட்டத்தில் மக்கள் ஒழுக்கத்தையும், தியாகத்தையும் வெளிப்படுத்தி போர் வீரர்கள் போல் செயல்பட்டு வருகிறார்கள். அதற்கு நான் தலை வணங்குகிறேன். கொரோனா தொற்று நாடு முழுவதும் வேகமாக பரவி வருகிறது.

எனவே இதனை கட்டுப்படுத்துவதில் அடுத்த வரும் வாரம் மிகவும் முக்கியமானது. வரும் நாட்களில் ஊரடங்கு மிகவும் தீவிரமாக கடைபிடிக்கப்படும், விதிமுறைகள் கடுமையாக்கப்படும். வரும் 20-ம் தேதிவரையில் ஊரடங்கு கடுமையாக்கப்படும். அதன்பின்னர் கொரோனா வைரஸ் பரவல் இல்லாத இடங்கள் அடையாளம் காணப்பட்டு அங்கு அத்தியாவசிய பொருட்கள் கிடைப்பதற்காக சில தளர்வுகள் செய்யப்படும். அதற்கான வழிகாட்டி நெறிமுறைகள் பற்றி நாளை விரிவாக அறிவிக்கப்படும்.

ஒற்றுமையான அணுகுமுறையால் இந்தியா கொரோனா வைரஸை வெற்றிகரமாக கட்டுப்படுத்தி வருகிறது. கொரோனா வைரஸை கட்டுப்படுத்தும் வகையில் 21 நாட்கள் ஊரடங்கால் நாம் பெரிய பயனை பெற்று உள்ளோம், குறைவான வளங்களுடன் சூழலை சிறப்பாக எதிர்கொண்டோம். பல மாநிலங்களில் இன்று தாய்மொழி புத்தாண்டு கொண்டாடப்பட்டு வருகிறது. மக்கள் மிகுந்த ஒழுக்கத்துடன் புத்தாண்டை வீட்டுக்குள்ளேயே கொண்டாடி வருகிறார்கள். அவர்களுக்கு பாராட்டு தெரிவிக்கிறேன்.

நாம் சமூக விலக்கல், ஒழுக்கம், ஊரடங்கு மூலம் கொரோனா தொற்றை கட்டுப்படுத்தி உள்ளோம். வரும் நாட்கள் மிகவும் முக்கியமானது. எனவே, மே 3-ம் தேதிவரை ஊரடங்கு நீட்டிக்கப்படுகிறது என்றார்.

0 0
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %