#IndiaFightsCorona மும்பையில் மட்டும் 1,600 பேர் பாதிப்பு… கடந்த 24 மணி நேரங்களில் 242 ‘பாசிடிவ்’ கேஸ்கள்…!

Read Time:2 Minute, 33 Second

இந்தியாவின் நிதி தலைநகர் மும்பையில் கொரோனா வைரஸ் கோரத் தாண்டவத்தை காட்டி வருகிறது. மும்பையில் வேகமாக பரவி வரும் கொரோனாவால் பாதிக்கப்படுபவர்கள் எண்ணிக்கையும், பலி எண்ணிக்கையும் நாளுக்கு நாள் அதிகரித்துச் செல்கிறது. இங்கு நாள்தோறும் சராசரியாக 100-க்கும் மேற்பட்டவர்கள் பாதிக்கப்பட்டு வந்துள்ளனர்.

இந்தநிலையில் நேற்று ஒரே நாளில் (24 மணி நேரங்களில்) மும்பையில் 242 பேர் கொரோனா தொற்றால் பாதிக்கப்பட்டது தெரியவந்துள்ளது. இதனால் மும்பையில் கொரோனாவால் பாதிக்கப்பட்டவர்கள் எண்ணிக்கை 1,600-ஐ கடந்து இருப்பதாக மும்பை மாநகராட்சி தெரிவித்து உள்ளது. இதேபோல மும்பையில் மட்டும் கொரோனாவுக்கு மேலும் 9 பேர் கொரோனாவுக்கு பலியான தகவல் வெளியிடப்பட்டது.

மராட்டியத்தில் கொரோனா வைரசுக்கு 160 பேர் உயிரிழந்துள்ளனர். இதில் மும்பையில் மட்டும் கொரோனாவுக்கு பலியானவர்கள் எண்ணிக்கை 101 ஆக உயர்ந்து உள்ளது. இதேபோல நேற்று மட்டும் கொரோனா தொற்றில் இருந்து மீண்ட 43 பேர் மருத்துவமனையில் இருந்து வீடு திரும்பி உள்ளனர். இதுவரை மும்பையில் மொத்தம் 141 பேர் சிகிச்சை முடிந்து வீடு திரும்பி உள்ளனர்.

மும்பையில் கொரோனா பரவலை தடுப்பதற்காக வீட்டை விட்டு வெளியே வரும் பொதுமக்கள் அனைவரும் முககவசம் அணிவதை மாநகராட்சி கட்டாயமாக்கி உத்தரவிட்டது. முககவசம் அணியாமல் வெளியே வருபவர்கள் மீது கைது நடவடிக்கை பாயும் எனவும் எச்சரிக்கப்பட்டது. இருப்பினும் ஆபத்தை உணராமல் அலட்சியத்துடன் பலரும் முககவசம் அணியாமல் வெளியில் செல்லும் நிலை காணப்படுகிறது. இந்நிலையில் இப்படி வருபவர்களை பிடித்து ரூ.1,000 அபராதம் விதிக்கும் நடவடிக்கையை மாநகராட்சி தொடங்கி உள்ளது.

சர்க்கரை நோய், உயர் ரத்த அழுத்தம், இருதய நோய் போன்ற பாதிப்பு உள்ளவர்கள் வீடுகளை விட்டு வெளியே வரவேண்டாம் என மும்பை மாநகராட்சி வலியுறுத்தியிருக்கிறது.