#IndiaFightsCorona தமிழகத்தில் கொரோனா பாதிப்பு 1,242 ஆக உயர்வு; 22 மாவட்டங்களை சிவப்பு மண்டலமாக அறிவித்தது மத்திய அரசு….

Read Time:2 Minute, 29 Second

இந்தியாவில் கொரோனா வைரஸ் பாதிப்பு அதிகமாக கொண்ட மாநிலங்களில் தமிழகமும் ஒன்று.

தமிழகத்தில் ஒவ்வொருநாளும் கொரோனாவினால் புதியதாக பாதிக்கப்படுபவர்கள் எண்ணிக்கை பதிவாகி வருகிறது. நேற்று (ஏப்ரல் 14) 31 பேருக்கு கொரோனா தொற்று உறுதி செய்யப்பட்டுள்ளதாக தெரிவிக்கப்பட்டது. இன்று சுகாதாரத்துறை அமைச்சர் விஜயபாஸ்கர் செய்தியாளர்களிடம் பேசுகையில், 38 பேருக்கு கொரோனா தொற்று உறுதி செய்யப்பட்டுள்ளது என தெரிவித்து உள்ளார்.

இதன்மூலம், தமிழகத்தில் கொரோனா பாதித்தவர்கள் எண்ணிக்கை 1,242 ஆக உயர்ந்துள்ளது.

நேற்றும், இன்றும் கொரோனாவின் பாதிப்பு சற்று குறைந்துள்ளதாக அரசின் புள்ளி விபரங்கள் தெரிவிக்கிறது.

இதற்கிடையே தமிழகத்தில் கொரோனா பாதிப்பால் இன்று 2 பேர் உயிரிழந்து உள்ளனர். இதன் மூலம், உயிரிழந்தோரின் எண்ணிக்கை 14 ஆக அதிகரித்து உள்ளது. அதே வேளையில் தமிழகத்தில் கொரோனா பாதிப்பில் இருந்து இதுவரை 117 பேர் குணம் அடைந்து வீடு திரும்பியுள்ளனர் என அரசு தரப்பில் தெரிவிக்கப்பட்டுள்ளது.

சிவப்பு மண்டலம்

இந்தியா முழுவதும் ஊரடங்கு உத்தரவு மே 3-ம் தேதி வரையில் நீட்டிக்கப்பட்டுள்ளது. ஏப்ரல் 20-ம் தேதிக்கு பின்னர் கொரோனா வைரஸ் பரவல் சற்று குறைவாக இருக்கும் மாவட்டங்களில் கட்டுப்பாட்டில் புதிய விதிமுறைகளை கொண்டுவர மத்திய அரசு முனைகிறது.

இந்நிலையில் தமிழகத்தில் கொரோனா பாதிப்பு அதிகமுள்ள 22 மாவட்டங்கள் சிவப்பு மண்டலங்களாக மத்திய அரசு அறிவித்துள்ளது. சென்னை, கோவை, ஈரோடு, நெல்லை, தூத்துக்குடி, திருவாரூர், சேலம், ஈரோடு, வேலூர், திருப்பூர், தேனி நாமக்கல், செங்கல்பட்டு, மதுரை, விருதுநகர், கரூர், திருவள்ளூர், கடலூர், கன்னியாகுமரி, நாகை, திருவாரூர், விழுப்புரம் ஆகிய 22 மாவட்டங்கள் சிவப்பு மண்டல பகுதிகளாக அறிவிக்கப்பட்டுள்ளது.