#Coronavirus உலக சுகாதார அமைப்புக்கான நிதி நிறுத்தம் “பணியை செய்வதில் தோல்வி…”? யாரை சொல்கிறார் டிரம்ப்…?

Read Time:3 Minute, 13 Second

கொரோனா வைரஸ் விவகாரத்தில் உலக சுகாதார அமைப்பு தனது அடிப்படை கடமையிலிருந்து தவறிவிட்டதாகவும், சீனாவுக்கு ஆதரவாக செயல்படுவதாகவும் குற்றம் சாட்டி வருகிறார் அமெரிக்க அதிபர் டொனால்டு டிரம்ப். இப்போது, அமெரிக்கா சார்பில் வழங்கும் உலக சுகாதார அமைப்புக்கு வழங்கும் நிதியை நிறுத்தி உத்தரவிட்டுள்ளார்.

இதுதொடர்பாக டிரம்ப் செய்தியாளர்களிடம் பேசுகையில், கொரோனா வைரஸ் பரவல் குறித்த தவறான தகவலையும், அதை தடுப்பது குறித்து சரியான நடவடிக்கைகளை கையாள தெரியாமல் இருந்ததால் உலக சுகாதார அமைப்புக்கு அமெரிக்கா சார்பில் வழங்கும் நிதியை நிறுத்தி வைக்க உத்தரவிட்டுள்ளேன். உலக சுகாதார அமைப்பு நடுநிலையாக செயல்பட்டு அனைத்து நாடுகளுக்கும் ஆலோசனை தெரிவிக்க வேண்டிய நிலையில் சீனாவுக்கு ஆதரவாக செயல்பட்டது.

உலக சுகாதார அமைப்பின் பேரழிவான, ஆபத்தான முடிவுகளில் ஒன்று சீனாவிலிருந்தும் மற்ற நாடுகளில் இருந்து வருவோருக்கு தடை விதிக்கும் போது அதற்கு உலக சுகாதார அமைப்பு எதிர்ப்பு தெரிவி்த்தது. நாங்கள் செய்த செயலுக்கு உலக சுகாதார அமைப்பு கடுமையாக எதிர்த்தது. சீனாவிலிருந்து வருவோருக்கு தடை விதிக்க வேண்டும் என தெரிவித்தேன், பல லட்சக்கணக்கான உயிர்களை காக்கவேண்டும் என்றேன். உலக சுகாதார அமைப்பு சரியான தகவல்களை மற்ற நாடுகளுக்கு உரிய நேரத்தில் பகிர தவறிவிட்டது.

தனது அடிப்படை கடமையிலிருந்து விலகிவிட்டது. அதற்கு அந்தஅமைப்பு பொறுப்பானதாகும் கொரோனா வைரஸ் விவகாரத்தில் உலக நாடுகளுக்கு உரிய நேரத்தில் சுகாதார அவசரநிலையை அறிவி்க்க உலக சுகாதார அமைப்பு தவறிவிட்டது எனக் கூறியுள்ளார். இக்கட்டான இந்நிலையில் அமெரிக்கா நிதியை நிறுத்தியதற்கு ஐ.நா. கவலையை தெரிவித்து உள்ளது.

உலக சுகாதார அமைப்பு மீது குற்றம் சாட்டும் டொனால்டு டிரம்ப், அமெரிக்காவில் கொரோனா வைரஸ் பரவ தொடங்கியதுமே ஊரடங்கை அமல்படுத்தி தனிமைப்படுத்தலை நடைமுறை படுத்த பல்வேறு தரப்பில் வலியுறுத்தப்பட்டது. ஆனால், டொனால்டு டிரம்ப் பொருளாதாரம் மீது கவலைக் கொண்டு ஒட்டுமொத்த மக்களையும் சோகத்திற்கு தள்ளியுள்ளார். இந்நிலையில் “பணியை செய்வதில் தோல்வி…”? என்று உலக சுகாதார அமைப்பை குற்றம் சாட்டுகிறாரா? அல்லது தன்னைத்தானே குற்றம் சாட்டிக்கொள்கிறாரா? என்ற கேள்வியே எழுகிறது.