#IndiaFightsCorona கொரோனா ஊரடங்கு 2.0 வழிகாட்டு நெறிமுறைகள்: 20-ம் தேதி முதல் விவசாய பணிகளுக்கு அனுமதி… எது கட்டாயம்…? எதற்கு தடை…? விபரம்:-

Read Time:4 Minute, 26 Second

கொரோனா வைரஸ் பரவலை கட்டுப்படுத்தும் வகையில் மத்திய அரசு மே 3-ம் தேதி வரையில் 19 நாட்களுக்கு ஊரடங்கை நீட்டித்து உள்ளது. ஊரடங்குக்கு மத்தியில் கொரோனா வைரஸ் பரவல் அதிகரித்து காணப்படுவதால் மக்கள் கடைபிடிக்க வேண்டிய கட்டுப்பாட்டுகளை மத்திய அரசு கடினமாக்க வேண்டிய சூழ்நிலை ஏற்பட்டுள்ளது. மறுபுறம் உணவுப்பொருட்கள் தட்டுப்பாடின்றி கிடைக்க செய்ய வேண்டிய கட்டாயமும் ஏற்பட்டுள்ளது.

இந்நிலையில் கொரோனா ஊரடங்கு 2.0 வழிகாட்டு நெறிமுறைகளை மத்திய அரசு வெளியிட்டுள்ளது. கொரோனா வைரசை கட்டுப்படுத்த அரசாங்கங்கள் மற்றும் அமைச்சகங்கள் மற்றும் துறைகள் எடுக்க வேண்டிய நடவடிக்கைகள் குறித்து திருத்தப்பட்ட வழிகாட்டுதல்கள் வெளியிடப்பட்டுள்ளது.


அதன்படி ஏப்ரல் 20-ம் தேதி முதல் விவசாய, வேளாண்மை பணிகள், விவசாய பொருட்கள் கொள்முதல் மற்றும் விற்பனை நடவடிக்கைகளுக்கு அனுமதி.


விவசாயத்திற்கான இயந்திரங்கள், அதன் உதிரி பாகங்கள் (விநியோகச் சங்கிலி உட்பட) மற்றும் பழுதுபார்ப்பு போன்ற நடவடிக்கைகளுக்கு ஏப்ரல் 20-ம் தேதி முதல் அனுமதி அளிக்கப்படுகிறது. அதோடு பண்ணை இயந்திரங்கள் (விவசாய இயந்திரங்களை வாடகைக்கு வழங்கும் மையங்கள்) தொடர்பான நடவடிக்கைகளுக்கும் அனுமதி வழங்கப்படுகிறது.


ஏப்ரல் 20 முதல் மருந்துகள், மருத்துவ சாதனங்களை உற்பத்தி செய்யும் மையங்கள் திறந்திருக்கும்.


ஆம்புலன்ஸ் தயாரித்தல் உள்ளிட்ட மருத்துவ உள்கட்டமைப்புகளை நிர்மாணிக்கவும் அனுமதிக்கப்பட்டுள்ளது.


இருப்பினும், ஏப்ரல் 20 முதல் வழங்கப்படும் பல்வேறு விலக்குகள் கொரோனா வைரஸ் பரவலின் மையப்பகுதிகள் அல்லது கட்டுப்பாட்டு மண்டலங்களிலோ பொருந்தாது என்று அமைச்சகங்கள் தரப்பில் வெளியிடப்பட்ட வழிகாட்டுதலில் தெளிவுபடுத்தப்பட்டுள்ளது.

* திருத்தப்பட்ட வழிகாட்டுதல்களின்படி, விமானம், ரெயில் மற்றும் சாலை வழியாக பயணம், கல்வி மற்றும் பயிற்சி நிறுவனங்களின் செயல்பாடு, தொழில்துறை மற்றும் வணிக நடவடிக்கைகள், விருந்தோம்பல் சேவைகள், சினிமா அரங்குகள் மற்றும் வணிக வளாகங்கள் மூடப்பட்டிருக்கும்.

*அனைத்து சமூக, அரசியல் மற்றும் பிற நிகழ்வுகளுக்கு தடை தொடரும். அனைத்து மத வழிபாட்டு இடங்கள் ஊரடங்கு முடிவும் வரையில் மூடப்பட்டிருக்கும்.

* பணியிடங்கள் மற்றும் பொது இடங்களில் வீட்டில் தயாரிக்கப்படும் முககவசம் அணிவது கட்டாயமாக்கப்பட்டுள்ளது. திருத்தப்பட்ட வழிகாட்டுதல்களின்படி, திறக்கப்படும் சில அலுவலகங்களில் சானிடிசர்களை வழங்கவும், சமூக விலகல் கட்டுப்பாட்டை உறுதிப்படுத்தவும், காய்ச்சல் அறிகுறியை கண்டறியவும் தேவையான நடவடிக்கைகளை எடுக்க வேண்டும்.

நாடு முழுவதும் பொது இடங்களில் மக்கள் முககவசம் அணிவது கட்டாயம் ஆக்கப்பட்டுள்ளது. பொது இடங்களில் துப்பினால் ரூ.500 அபராதம் விதிக்கப்படும் எனவும் தெரிவிக்கப்பட்டுள்ளது.

வெறுமனே மத்திய, மாநில அரசுக்கள் ஊரடங்கை நீட்டிப்பதால் மட்டும் கொரோனாவை விரட்டிவிட முடியாது. மக்களாகிய நாம் கொரோனாவிற்கு எதிரான போரில் வெற்றிபெற அரசுடன் துணை நிற்க வேண்டும். அதற்கு தேவையில்லாமல் வீட்டைவிட்டு வெளியேறுவதை தவிர்த்து அரசின் விதிமுறைகளை கடைபிடிக்க வேண்டும். முக்கியமாக கூட்டமாக கூடுவதை தவிருங்கள். அடிக்கடி சோப்பினால் கைகளை கழுவுங்கள். வெளியே செல்லும் போது முகக்கவசம் அணியுங்கள்…