Zoom செயலி பாதுகாப்பானது இல்லை – மத்திய உள்துறை அமைச்சகம் எச்சரிக்கை..!

Read Time:2 Minute, 52 Second

ஊரடங்கு காலத்தில் பிரபலமாகியுள்ள Zoom செயலி பாதுகாப்பானது இல்லை என மத்திய உள்துறை அமைச்சகம் எச்சரிக்கையை விடுத்து உள்ளது.

இந்தியாவில் கொரோனா வைரசை கட்டுப்படுத்தும் வகையில் 21 நாள் ஊரடங்கு ஏப்ரல் 14-ம் தேதியுடன் முடிந்ததும், மேலும் 19 நாட்கள் ஊரடங்கு அமல்படுத்தப்பட்டுள்ளது. ஊரடங்கு காலத்தில் பல்வேறு நிறுவனங்கள் வீட்டிலிருந்து வேலை பார்க்க ஊழியர்களுக்கு அனுமதியை வழங்கியுள்ளது. ஊழியர்கள் மொத்தமாக அலுவலக மீட்டிங்கை ஆன்-லைனில் மேற்கொள்ள வீடியோ மூலமான Zoom செயலி கவனம் பெற்றது.

ஊரடங்கை அடுத்து இந்த செயலியின் பயன்பாடு அதிகரித்து உள்ளது. கடந்த மார்ச் மாதம் இறுதியில் மட்டும் 62 மில்லியன் தரவிறக்கத்தை பெற்றுள்ளது. தனிப்பட்ட செய்தி அனுப்புதல், வீடியோ காலிங் என அனைத்து விதமான வசதிகளையும் கொண்ட இச்செயலியில் புதியதாக கணக்கு தொடங்க வேண்டியது இல்லை, எளிதாக பயன்படுத்தலாம் என பலரும் பயன்படுத்த தொடங்கினர். ஆனால், செயலியை பயன்படுத்துபவரின் தகவல்களை திருட வாய்ப்பு உள்ளது என்ற எச்சரிக்கை நிலவுகிறது. அரசு மற்றும் தனியார் நிறுவனங்கள் மற்றும் சுய தகவல்களை திருட வாய்ப்பு உள்ளது என சைபர் பாதுகாப்பு அமைப்புக்கள் எச்சரிக்கையை விடுத்தன.

இந்தியாவில் ஆன்லைன் தகவல் திருட்டை தடுக்கும் அமைப்புகளில் ஒன்றான CERT-IN (India’s Computer Emergency Response Team) Zoom செயலி சைபர் தாக்குதலுக்கு வாய்ப்பு உள்ளது என மார்ச் 30-ம் தேதி தெரிவித்தது. இதற்கிடையே இச்செயலியை பயன்படுத்த பலதரப்பில் எச்சரிக்கை எழுந்தது. சிங்கப்பூரில் மாணவர்களுக்கு ஆன்-லைன் மூலமாக பாடம் நடந்த இச்செயலி பயன்படுத்தப்பட்டுள்ளது. ஆனால், இடையே ஆபாச படம் வெளியானதால், சைபர் தாக்குதல் கண்டுபிடிக்கப்பட்டது. இதனையடுத்து அந்நாட்டில் செயலியை பயன்படுத்த தடை விதிக்கப்பட்டது.

இந்நிலையில் செயலியை பயன்படுத்தி 5 லட்சம் கணக்குகள் ஹேக்கர்களால் திருடப்பட்டுள்ளதாக தகவல் வெளியானது.

தற்போது ஊரடங்கு காலத்தில் பிரபலமாகியுள்ள Zoom செயலி பாதுகாப்பானது இல்லை என மத்திய உள்துறை அமைச்சகம் எச்சரிக்கையை விடுத்து உள்ளது. இதனை யாரும் பயன்படுத்த வேண்டாம் என்றும் கேட்டுக் கொண்டுள்ளது.