#Coronavirus சீனாவிடம் இருந்து இந்தியாவிற்கு வந்த 50,000 கொரோனா பரிசோதனை கருவிகள் தரமற்றவை என வீசப்பட்டது…!

Read Time:3 Minute, 55 Second

உலகம் முழுவதும் கொரோனா வைரஸ் பரவல் அதிகரித்து காணப்படுகிறது. இதனால் மருத்துவ உபகரணங்களின் தேவையும் அதிகரித்து உள்ளது. இந்நிலையில் சீனாவிலிருந்து அதிகமான மருத்துவ உபகரணங்கள் உடனடியாக தயாரிக்கப்பட்டு வர்த்தகம் செய்யப்படுகிறது. உலக நாடுகள் சீனாவை எதிர்பார்த்து நிற்கும் நிலையே காணப்படுகிறது. இந்தியாவிலும் கொரோனா வைரஸ் இந்தியாவில் தீவிரமாக பரவி வருவதையடுத்து அதை கட்டுப்படுத்தும் நோக்கில் மத்திய அரசும், மாநில அரசுகளும் பல்வேறு நடவடிக்கைகளை எடுத்து வருகின்றன.

அதில் முக்கியமாக சமூக விலகலைக் கடைப்பிடித்து, கொரோனா சங்கிலியை உடைக்கும் வகையில் லாக் டவுன் கடைப்பிடிக்கப்பட்டு வருகிறது. கொ ரோனா நோயாளிகளைக் கண்டறியும் விதமாக நாள்தோறும் பரிசோதனைகள் நடந்து வருகின்றன. இருப்பினும் தற்போது நடத்தும் பரிசோதனைகளின் அளவு போதாது என்ற நிலையே காணப்படுகிறது. இன்னும் கூடுதலாக நடத்தப்பட வேண்டும் என மருத்துவ வல்லுநர்கள் தெரிவிக்கிறார்கள்.

இந்நிலையில் சீனாவிடம் இருந்து இந்தியா பரிசோதனை உபகரணங்களை வாங்குகிறது. இதற்கிடையே சீனாவிலிருந்து வந்த பரிசோதனை கருவிகள் தரமற்றவை என்ற தகவல் வெளியாகியுள்ளது. தி எக்னாமிஸ் டைம்ஸ் வெளியிட்டுள்ள செய்தியில், ஏப்ரல் 5-ம் தேதி இந்தியாவிற்கு 1.7 லட்சம் கருவிகள் வந்துள்ளது. குவாலியரில் அரசு ஆய்வகத்தில் நடைபெற்ற ஆய்வில் சுமார் 50,000 தரபரிசோதனையில் தோல்வியுற்றது. இதனையடுத்து அந்த கருவிகள் பயன்படுத்ததாது அப்புறப்படுத்தப்பட்டது என தெரிவிக்கப்பட்டுள்ளது.

இருப்பினும், தர சோதனைகளில் தோல்வியை தழுவிய கருவிகள் சீன தனியார் நிறுவனங்களால் நன்கொடைகளாக இந்திய அரசுக்கு வழங்கப்பட்டவை எனவும் தெரிவிக்கப்படுகிறது. சீனாவிலிருந்து அனுப்படும் கருவிகளின் தரம் தொடர்பான கேள்விகள் தொடர்ந்து நிலவுகிறது. பல நாடுகள் தரமில்லை என கொள்முதல் செய்த பொருட்களை திரும்பவும் அனுப்பியுள்ளன.

இதற்கிடையே இந்தியா வாங்கும் 6.5 லட்சம் கருவிகள் சீனாவிலிருந்து வருகிறது. இதுதொடர்பாக இந்திய தூதர் விக்ரம் மிஸ்ரி செய்தியாளர்களிடம் பேசுகையில், “கொரோனா பரிசோதனைக்காக 20 லட்சம் பரிசோதனை கருவிகள் இந்தியா சார்பில் கொள்முதல் செய்யப்பட்டிருந்தன. இதில் 6.5 லட்சம் கருவிகள் இன்று அனுப்பி வைக்கப்படும். ரேபிட் ஆன்ட்டிபாடி டெஸ்ட், ஆர்என்ஏ எக்ஸ்ட்ராகஸன் கிட் ஆகியவை இன்று (ஏப்ரல் 16) குவாங்சு விமான நிலையத்திலிருந்து விமானம் மூலம் இந்தியா செல்லும்” எனத் தெரிவித்தார்.

கொரோனா வைரஸ் தாக்குதல் காரணமாக கடந்த 2 மாதங்களாக தொழிற்சாலைகள் மூடப்பட்டிருந்த நிலையில் இப்போது சீனாவில் தீவிரமாக செயல்பட்டு வருகின்றன. குறிப்பாக மருத்துவ கருவிகள், வென்டிலேட்டர்கள், மருத்துவர்களுக்கான பாதுகாப்பு கவசங்கள் போன்றவை உலக அளவில் பல்வேறு நாடுகளுக்கு ஏற்றுமதி செய்ய வேகமாக தயாரிக்கப்பட்டு வருகின்றன.