#Coronavirus 2022 வரையில் சமூக விலகல் மிகவும் அவசியம் – விஞ்ஞானிகள் எச்சரிக்கை.!

Read Time:3 Minute, 2 Second

கொரோனா தொற்று பரவலை தடுக்க 2022 வரையில் சமூக விலகல் மிகவும் அவசியம் என விஞ்ஞானிகள் எச்சரிக்கையை விடுத்து உள்ளனர்.

உலகையே மிரட்டிவரும் கொரோனா வைரஸ் தொற்றிலிருந்து தப்பித்துக்கொள்ள வைரசினால் பாதிக்கப்பட்டிருப்பவர்களிடம் இருந்து தள்ளியிருப்பது மட்டுமே வழியாக உள்ளது. மேலும், வைரஸ் பரவலை தடுக்க சமூக விலகல் மிகவும் அவசியமாகும். இதனை உறுதிப்படுத்தும் வகையில் உலக நாடுகள் ஊரடங்கை அமல்படுத்தி உள்ளன. இருப்பினும், கொரோனா வைரசின் தாக்கம் அதிகரித்தே காணப்படுகிறது.

இதற்கிடையே வைரஸ் தொற்று தொடர்பாக ஆய்வாளர்கள் தொடர்ந்து ஆய்வை மேற்கொண்டு வருகின்றனர்.

கொரோனா வைரஸ் தொற்று பருவகால தொற்றாக மாறக்கூடும் என்று விஞ்ஞானிகள் எச்சரிக்கிறார்கள்.

இந்நிலையில் அமெரிக்காவின் ஹார்வர்ட் பல்கலைக்கழகத்தின் தொற்றுநோயியல் விஞ்ஞானிகள் கொரோனா வைரஸ் தொடர்பான ஆய்வை மேற்கொண்டுள்ளனர். இதுதொடர்பான ஆய்வு முடிவுகள் அறிவியல் இதழில் வெளியாகி உள்ளது.

அதில், கடந்த 2003-ம் ஆண்டு சிறிய அளவில் காணப்பட்ட சார்ஸ் வைரஸ் தொற்று ஒரு இடைவெளிக்கு பின்னர் பெறும் தொற்றாக வெடித்தது. அதேநிலை கொரோனா வைரஸ் தொற்றில் ஏற்படுவதற்கு முன்னதாக எதிர்ப்பு மருந்தை கண்டுபிடிப்பது அவசியமாகும் இல்லை என்றால் பிற கொரோனா வைரஸ் குடும்பத்தை சேர்ந்த வைரஸ்களை போன்று ஒவ்வொரு குளிர்காலத்திலும் இதனால் மீண்டும் தொற்று ஏற்பட வாய்ப்புகள் இருக்கிறது

கொரோனா வைரஸ் தொற்றுக்கான எதிர்ப்பு சக்தி தொடர்பாக இன்னும் பல புரியாத விஷயங்கள் இருந்து வருகிறது. நோய் எதிர்ப்பு சக்தி நிரந்தரமாக இல்லாவிட்டால் காய்ச்சல் போன்று மக்கள் மத்தியில் பரவும் ஒரு நோயாக இது மாறுவதற்கு வாய்ப்பு அதிகமாக உள்ளது. ஜப்பான் போன்ற சில நாடுகள் சமூக விலகல் விதிமுறைகளை தளர்த்திய பின்னர் இரண்டாவது முறையாகவும் கொரோனா வைரஸ் தொற்று ஏற்பட்டுள்ளது. எனவே, வரும் ஆண்டுகளில் தொற்றை கட்டுப்படுத்த தொடர்ச்சியான சமூக விலகல் மிகவும் அவசியாமானது.

கொரோனா வைரஸ் தொற்றுக்கு எதிராக தடுப்பூசி அல்லது பயனுள்ள சிகிச்சை இல்லாத பட்சத்தில் அதனை கட்டுப்படுத்துவதற்கு 2022-ம் ஆண்டு வரையில் சமூக விலகல் மிகவும் அவசியமானது என்று தெரிவிக்கப்பட்டுள்ளது.