#Coronavirus சீனா சொன்னதையெல்லாம் நம்பியதே இந்த நிலைக்கு காரணம்…!

Read Time:8 Minute, 7 Second
Page Visited: 72
#Coronavirus சீனா சொன்னதையெல்லாம் நம்பியதே இந்த நிலைக்கு காரணம்…!

சுவிட்சர்லாந்து நாட்டின் ஜெனீவா நகரை தலைமையிடமாக கொண்டு செயல்பட்டு வருகிறது உலக சுகாதார அமைப்பு. இது ஐ.நா.சபையின் துணை அமைப்பாக உள்ளது. உலகளவிலான சுகாதார விவகாரங்களை இந்த அமைப்பு கையாள்கிறது.

இந்தியா உள்பட 194 நாடுகள் இதில் உறுப்பினர்களாக உள்ளன. இருப்பினும் இவ்வமைப்பு செயல்படுவதற்கான முக்கிய நிதி பங்களிப்பை அமெரிக்காதான் வழங்கி வருகிறது.

தற்போது உலகமெங்கும் கொரோனா வைரஸ் அதிவேகமாக பரவி, பெருத்த உயிர்ச்சேதங்களையும் தொடர்ந்து ஏற்படுத்தி வருகிறது. உலகளவில் இந்த வைரஸ் தொற்றுக்கு லட்சத்திற்கும் அதிகமானோர் உயிரிழந்து உள்ளனர். இந்த வைரசால், உலகின் வேறு எந்த நாடுகளையும் விடவும் அமெரிக்கா கடுமையாக பாதிக்கப்பட்டு உள்ளது. அங்கு தான் அதிகளவிலான மக்கள் கொரோனா வைரஸ் தொற்றின் பிடியில் சிக்கி உள்ளனர்.

இதே போன்று இறப்பிலும் அதிக இறப்பு, அமெரிக்காவில் தான் நேர்ந்துள்ளது. அமெரிக்காவில் பாதிப்பு 7 லட்சத்தை நோக்கியும், உயிரிழப்பு 29 ஆயிரத்தை நோக்கியும் செல்கிறது. கொரோனா வைரஸ் சீனாவின் உகான் நகரில் கடந்த டிசம்பர் 1-ம் தேதி தோன்றியபோதும், இதில் அந்த நாடு வெளிப்படையாக நடக்கவில்லை, உண்மைகளை மறைத்து விட்டது என்று அமெரிக்கா தொடர்ந்து குற்றம் சாட்டி வந்தது. இதனால் தங்கள் நாட்டின் பொருளாதாரம் ஸ்தம்பித்துப்போய் விட்டது எனவும் அமெரிக்கா கருதுகிறது.

கொரோனா வைரஸ் விவகாரத்தில், சீனாவுக்கு உலக சுகாதார நிறுவனம் பக்க பலமாக இருந்து வருகிறது, சீனாவுக்கு ஆதரவாக ஒருதலைப்பட்சமாக உலக சுகாதார நிறுவனம் செயல்பட்டு வருகிறது என்றும் குற்றம்சாட்டி அமெரிக்கா தனது அதிருப்தியை வெளிப்படுத்தியது. இந்நிலையில் உலக சுகாதார நிறுவனத்துக்கு வழங்கி வந்த நிதியை டொனால்டு டிரம்ப் நிறுத்தியுள்ளார்.

நிதி நிறுத்தம்!

வாஷிங்டன் வெள்ளை மாளிகையில் செய்தியாளர்களிடம் பேசுகையில், உலக சுகாதார நிறுவனத்துக்கு வழங்கி வந்த நிதியை நிறுத்துமாறு எனது நிர்வாகத்துக்கு இன்று உத்தரவிட்டுள்ளேன். கொரோனா வைரஸ் பரவலை மூடி மறைத்து, தவறாக நிர்வகித்ததில் உலக சுகாதார நிறுவனத்தின் முக்கிய பங்களிப்பு தொடர்பாக ஆய்வு செய்யப்படுகிறது. அங்கு என்ன நடந்தது? என்பது அனைவருக்கும் தெரியும். அமெரிக்காவில் வரி செலுத்துவோர் ஒவ்வொரு ஆண்டும் உலக சுகாதார நிறுவனத்துக்கு 400 மில்லியன் டாலர் முதல் 500 மில்லியன் டாலர் வரையில் (சுமார் ரூ.3,000 கோடியில் இருந்து ரூ.3,750 கோடி வரையில்) வழங்குகின்றனர்.

ஆனால் சீனாவோ ஆண்டுக்கு 40 மில்லியன் டாலர் (சுமார் ரூ.300 கோடி) வழங்குகிறது. அதற்கும் குறைவாகக்கூட வழங்குகிறது. உலக சுகாதார நிறுவனத்துக்கு தேவைப்படுகிற நிதியில் முக்கிய பங்களிப்பு செய்கிற நாடு என்கிற முறையில், அதன் முழு பொறுப்பை வலியுறுத்த வேண்டிய கடமை அமெரிக்காவிடம் உள்ளது.

உலக சுகாதார அமைப்ப்பை நாடுகள் அனைத்தும் சார்ந்து இருக்கின்றன. உலக சுகாதார அமைப்பு என்பது அந்த நாடுகளுடன் இணைந்து செயலாற்ற வேண்டும். கொரோனா வைரஸ் விவகாரத்தில், துல்லியமான தகவல்களை உறுதிப்படுத்தி இருக்க வேண்டும். சர்வதேச அச்சுறுத்தல் பற்றி சரியான நேரத்தில் தகவல்களை பகிர்ந்து இருக்க வேண்டும். இந்த அடிப்படை கடமையில் இருந்து உலக சுகாதார நிறுவனம் தவறியது.

உகானில் இருந்து வந்த தகவல்களும், சீன அரசிடம் இருந்து வந்த தகவல்களும் முரணாக இருந்தது. அவற்றின் நம்பகத்தன்மையை விசாரிக்க உலக சுகாதார நிறுவனம் தவறியது. மனிதர்களிடம் இருந்து மனிதர்களுக்கு கொரோனா வைரஸ் பரவும் என்பதற்கான நம்பகமான தகவல்கள் டிசம்பரில் காணப்பட்டது. இதையும் உலக சுகாதார நிறுவனம் விசாரித்து இருக்க வேண்டும்.

ஆனால், உலக சுகாதார நெருக்கடி நிலையை உலக சுகாதார நிறுவனம் மிகவும் தாமதமாகவே அறிவித்தது. கொரோனா வைரஸ் மாதிரியை இன்று வரை உலக சுகாதார நிறுவனம் பெற இயலாமல்போனதால், அறிவியல் சமூகம் அது தொடர்பான அத்தியாவசியமான தரவுகளை பெற இயலவில்லை.

சீனாவில் நிலவி வந்த உண்மையான களநிலையை ஆராய்வதற்கும், சீனாவிடம் வெளிப்படைத்தன்மை இல்லாததை கூறுவதற்கும் மருத்துவ நிபுணர்களை அங்கு கொண்டு செல்வதற்கு உலக சுகாதார நிறுவனம் தனது கடமையை செய்திருக்க வேண்டும். அப்படி நடவடிக்கை எடுக்கப்பட்டு இருந்தால் மிகக் குறைவான உயிர்ப்பலியுடன் கொரோனா வைரஸ் கட்டுக்குள் கொண்டு வரப்பட்டிருக்கும்.

ஆனால் அதற்கு பதிலாக சீனாவின் உத்தரவாதங்களை அப்படியே உலக சுகாதார நிறுவனம் எடுத்துக் கொண்டது. சீன அரசின் நடவடிக்கைகளை பாதுகாத்தது அந்நாடு வெளிப்படைத்தன்மையுடன் செயல்படுவதாக பாராட்டவும் செய்தது. இந்த வைரஸ் தொடர்பான சீனாவின் தவறான தகவல்களை உலக சுகாதார அமைப்பு முன் வைத்தது.

இது தொற்றுநோய் அல்ல, இதற்காக பயண தடை விதிப்பது அவசியம் இல்லை என்றும் உலக சுகாதார அமைப்பு கூறியது. சீனா சொன்னதையெல்லாம் உலக சுகாதார அமைப்பு, நம்பியதின் வெளிப்பாடுதான் இன்றைக்கு இந்த வைரஸ் உலக அளவில் 20 மடங்கு பெருகி இருக்கிறது. இதைவிட அதிகமாக கூட பாதிப்பு இருக்கலாம். உண்மையாக நடந்து கொண்டிருந்தால் அது உலக சுகாதார நிறுவனத்துக்கு எளிதாக இருந்து இருக்கலாம். அவர்களின் தவறுகளால்தான் இவ்வளவு மரணங்கள் நேரிட்டு இருக்கின்றன. அர்த்தமுள்ள சீர்திருத்தங்களை உலக சுகாதார அமைப்பு செய்யுமா? என்பதை அறிவதற்காக தொடர்ந்து அதனுடன் செயல்படுவோம் எனக் கூறியுள்ளார்.

0 0
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %