TMP Explained: #Coronavirus தொற்று தடுப்பூசி எப்படி தயாரிக்கப்படுகிறது…? அதிக காலம் எடுப்பது ஏன்…?

Read Time:6 Minute, 5 Second
Page Visited: 77
TMP Explained: #Coronavirus தொற்று தடுப்பூசி எப்படி தயாரிக்கப்படுகிறது…? அதிக காலம் எடுப்பது ஏன்…?

கொரோனா வைரசுக்கு எதிரான ஒரு தடுப்பூசியை கண்டுபிடிப்பதற்காக உலக நாடுகள் போராடி வருகின்றன. இரண்டு மாதங்களுக்கும் மேலாக மனிதனின் சாதாரண வாழ்க்கையை நிறுத்திவிட்ட கொரோனா வைரஸ் மக்களின் உயிரையும் வேகமாக குடித்து வருகிறது.

London School of Hygiene and Tropical Medicine தடுப்பூசி மையத்தின் தகவலின்படி உலகெங்கிலும் பல்வேறுக்கட்ட பரிசோதனையில் 78 தடுப்பூசிகள் உள்ளன என தெரியவந்துள்ளது. இந்த பரிசோதனையில் ஆறு இந்திய நிறுவனங்களும் இடம்பெற்றுள்ளன. இந்நிலையில் ஒரு தடுப்பூசி என்றால் என்ன…? ஒன்றை தயாரிக்க எவ்வளவு நேரம் எடுக்கிறது…? என்பதை பார்க்கலாம்.

தடுப்பூசி என்றால் என்ன?

அடிப்படையில் ஒரு தடுப்பூசி சில குறிப்பிட்ட நோய்களுக்கு எதிராக உடலில் நோய் எதிர்ப்பு சக்தியை வலுப்படுத்த உதவுகிறது. பொதுவாக தடுப்பூசி, ஒரு குறிப்பிட்ட நோயை ஏற்படுத்தும் வைரசிடம் இருந்து உருவாக்கப்படுகிறது. குறிப்பாக வைரசில் பாதிப்பை ஏற்படுத்துதல் அல்லது அதனை இறக்க செய்தல் மூலம் மருந்து தயாரிக்கப்படுகிறது. உதாரணமாக, அம்மை நோய்க்கான தடுப்பூசியில் தட்டம்மை வைரஸ் உள்ளது. அதே நேரத்தில் போலியோ சொட்டு மருந்து போலியோ வைரஸிலிருந்து தயாரிக்கப்படுகின்றன.

சில தடுப்பூசிகளில் நோய் கிருமி அல்லது வைரஸின் ஒருபகுதி மட்டுமே இடம்பெறுகிறது. நோய்களுக்கு சிகிச்சையளிக்கும் அல்லது குணப்படுத்தும் பெரும்பாலான மருந்துகளை போல் அல்லாமல் தடுப்பூசிகள் அவற்றை தடுக்கும் வகையில் செயல்படுகிறது. இம்முறையில் பலன் இருக்கிறது. தடுப்பூசி காரணமாக உலகெங்கிலும் போலியோ போன்ற நோய்கள் கிட்டத்தட்ட அழிக்கப்பட்டுவிட்டது.

இருப்பினும், சில வைரஸ்கள் மிக வேகமாக ‘உருமாறும்’, வைரஸின் ஒவ்வொரு புதிய விகாரத்தையும் சமாளிக்க நீங்கள் தொடர்ந்து புதிய தடுப்பூசிகளை உருவாக்க வேண்டியது வரும். வைரஸ் தன்னுடைய உருவத்தை மாற்றி தாக்குதலை தொடுக்கும் போது அதற்கு ஏற்றவகையில் தடுப்பூசி அவசியமாக கண்டுபிடிக்க வேண்டியது உள்ளது. வைரசின் உருவத்தை அடிப்படையாக கொண்டே அவற்றை எப்படி அழிக்கலாம் என்பதை திட்டமிடலாம்.

உதாரணமாக, இன்ஃப்ளூயன்ஸா வைரஸ் உலகம் முழுவதும் தொடர்ச்சியாக பரவுகிறது. சில வெப்பமண்டல பகுதிகளில் பருவகால மற்றும் சில நேரங்களில் ஆண்டு முழுவதும் தொற்றுநோய்கள் ஏற்படுகின்றன. வைரஸ் தொடர்ந்து உருமாறும் என்பதால், தடுப்பூசிகளும் தொடர்ந்து புதுப்பிக்கப்பட வேண்டிய நிலை உள்ளது. வேறு வார்த்தைகளில் கூறுவதானால், இன்ஃப்ளூயன்ஸாவுக்கு உலகளாவிய தடுப்பூசி எதுவும் இல்லை.

கொரோனா வைரஸ் சார்ஸ் வைரஸின் குடும்பத்திலிருந்து வருகிறது, இது ஜலதோஷம் முதல் கடுமையான சுவாச நோய் அறிகுறிகளை ஏற்படுத்துகிறது. கொரோனா வைரஸ்கள் குடும்பத்தில் இடம்பெறும் வைரஸ்கள் பெரும்பாலும் விலங்குகளிலிருந்து பரவுகின்றன. விலங்குகளில் பரவும் போது தாக்கத்தை ஏற்படுத்தாது. அதுவே மனிதர்களுக்கு செல்லும் போதுபாதிப்பை ஏற்படுத்துகிறது. இந்த வைரஸ் சார்ஸ், மெர்ஸ், இன்ஃப்ளூயன்ஸா வைரஸ் போன்று இல்லாமல் தனித்துவமான குணாதிசயங்களை கொண்ட தனித்துவமான வைரசாக உள்ளது என உலக சுகாதார அமைப்பு தெரிவிக்கிறது.

அதிக காலம் எடுப்பது ஏன்..?

பெரும்பாலும் ஒரு தடுப்பூசிகள் உருவாக்க அதிக நேரம் எடுக்கும். ஆராய்ச்சிகளுக்கு அதிக காலம் எடுத்து மருந்துகள் தயரிக்கப்பட்டாலும், பொதுவான பயன்பாட்டிற்கு சான்றிதழ் பெறுவதற்கு முன்னர் நீட்டிக்கப்பட்ட மருத்துவ பரிசோதனைகள் அதிகமாக இருக்கும்.

மருந்தை விலங்குகளுக்கு கொடுத்து பரிசோதனை செய்தல் மற்றும் மனித சோதனைகளின் வெவ்வேறு கட்டங்களுக்கு உட்படுத்தப்பட வேண்டும் என்பதால் கால நேரம் அதிகமாக எடுக்கும். இதுபோக பக்க விளைவுகள் முக்கியமாக ஆராயப்படும். எனவே, சில தடுப்பூசிகள் உருவாக 10 ஆண்டுகள் அல்லது அதற்கு மேற்பட்ட ஆண்டுகள் ஆகும். COVID-19 கொரோனா வைரசை பொறுத்தவரையில் 2021-ம் ஆண்டின் பிற்பகுதியிலிருந்து ஒரு தடுப்பூசி பயன்பாட்டு வர ஆரம்பமாகலாம் என்று எதிர்பார்க்கலாம்.

0 0
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %