#Coronavirus வெளிமாநில தொழிலாளர்களுக்கு உதவ பறக்கும் கேரள புல்லட் பெண் காவல்படை…

Read Time:3 Minute, 6 Second

இந்தியாவில் கொரோனா வைரஸ் பரவலை தடுக்கும் வகையில் முதல்கட்டமாக ஏப்ரல் 14-ம் தேதி வரையில் ஊரடங்கு அமல்படுத்தப்பட்டது. பின்னர் மே 3-ம் தேதி வரையில் நீட்டிக்கப்பட்டது.

இந்த ஊரடங்கால் வெளிமாநிலங்களில் கூலி வேலை செய்யும் தொழிலாளர்கள் பெரிதும் பாதிக்கப்பட்டு உள்ளனர். வேலையில்லாமலும், கையில் பணம் இல்லாமலும் சிரமத்திற்கு உள்ளாகியுள்ளனர்.

பலர் தங்களது சொந்த கிராமங்களுக்கு நடந்தே சென்ற அவல நிலையும் காணப்பட்டது. இவ்விவகாரத்தில் மத்திய அரசு மீது கடுமையான விமர்சனங்கள் எழுந்தது. பிரதமர் மோடியும் சிரமத்திற்கு மன்னிப்பு கோரினார். இதற்கிடையே மாநில அரசுக்கள் தேவையான நடவடிக்கைகளை மேற்கொள்ள உத்தரவிடப்பட்டது. மாநில அரசுக்களும் தங்கள் மாநிலங்களில் உள்ள பிற மாநில தொழிலாளர்களுக்கு தங்குவதற்கான ஏற்பாடு, உணவு வழங்குதலுக்கான ஏற்பாடுகளை செய்தன. இருப்பினும் எங்களுடைய சொந்த ஊருக்கு செல்ல வேண்டும் என்றே தொழிலாளர்கள் கூறிவருகிறார்கள்.

புல்லட் பெண் காவல்படை

இந்நிலையில் சமூக ஆர்வலர்களும் அவர்களுக்கு உதவி செய்து வருகிறார்கள். இந்நிலையில் கேரளத்தில் வெளிமாநில தொழிலாளர்களுக்கு உதவ பறக்கும் புல்லட் பெண் காவல்படை செயல்பட்டு வருகிறது. திருச்சூர் மாநகரக் காவல் கண்காணிப்பாளர் ஆதித்யாவின் கனவுத்திட்டமான புல்லட் பெண் காவல் படை திட்டம் ஊரடங்குக்கெல்லாம் முன்பே வடிவமைக்கப்பட்டது.

இதற்கென்று மாநகர ஆளுகைக்கு கீழ் இருக்கும் காவல் நிலையங்களில் இருந்து 16 பெண் போலீசாரை கொண்டு பிரத்யேகமான படை உருவாக்கப்பட்டது. அது செயல்பாட்டுக்கு வரும் முன்பே கொரோனா காரணமாக ஊரடங்கு வந்துவிட, தொடக்க விழா எதுவும் இன்றி அவசரம் கருதி உடனே செயல்பாட்டுக்கு வந்திருக்கிறது.

இப்போது திருச்சூரில் இருக்கும் வெளிமாநில தொழிலாளர்களுக்கு அடிப்படை வசதிகளை செய்துகொடுக்கும் பணியில் இந்த புல்லட் படை ஈடுபட்டுள்ளது. இதேபோல் திருச்சூரில் தனிமையில் இருக்கும் முதியோர்களின் பட்டியலைப் பெற்று அவர்களின் இல்லங்களுக்கு தேடிப்போய் அத்தியாவசிய பொருள்கள், மருந்து, மாத்திரைகள் அவர்களிடம் இருக்கிறதா? எனவும் விசாரிக்கின்றனர். தேவை இருக்கும் பட்சத்தில் அதையும் வாங்கிக் கொடுத்தும் உதவுகின்றனர். இவர்களின் பணிகளை பலரும் பராட்டி வருகின்றனர்.