#IndiaFightsCorona தென்காசியில் கொரோனா வைரஸ் பாதிப்பு அதிகரிப்பு; அத்தியாவசிய பொருட்கள் வாங்க வாரத்தில் 2 நாட்கள் மட்டுமே வெளியே செல்லலாம்…

Read Time:4 Minute, 55 Second
Page Visited: 207
#IndiaFightsCorona தென்காசியில் கொரோனா வைரஸ் பாதிப்பு அதிகரிப்பு; அத்தியாவசிய பொருட்கள் வாங்க வாரத்தில் 2 நாட்கள் மட்டுமே வெளியே செல்லலாம்…

நெல்லை, தென்காசி மாவட்டங்களில் கொரோனா வைரஸ் தொற்று பரவி உள்ளது.

தென்காசி மாவட்டத்தில் ஏற்கனவே 22 பேருக்கு கொரோனா வைரஸ் தொற்று ஏற்பட்டிருந்தது. அவர்களில் 19 பேர் புளியங்குடியை சேர்ந்தவர்கள் என தெரிவிக்கப்பட்டிருந்தது. இந்த நிலையில் புளியங்குடியில் நேற்று மேலும் 4 பேருக்கு கொரோனா தொற்று உறுதி செய்யப்பட்டது. அவர்கள் 4 பேரும் சிகிச்சைக்காக பாளையங்கோட்டை ஐகிரவுண்டு அரசு மருத்துமனையில் உள்ள கொரோனா சிறப்பு வார்டுக்கு அனுப்பி வைக்கப்பட்டு உள்ளனர்.

இதையடுத்து தென்காசி மாவட்டத்தில் கொரோனா வைரசால் பாதிக்கப்பட்டோர் எண்ணிக்கை 26 ஆக உயர்ந்து உள்ளது.

தென்காசி மாவட்டத்தில் கொரோனா தொற்று அதிகரித்து வரும் நிலையில், போலீஸ் கண்காணிப்பு தீவிரப்படுத்தப்பட்டு உள்ளது. அனைத்து பகுதிகளிலும் போலீசார் கண்காணிப்பு பணியில் ஈடுபட்டு, தேவையின்றி வீட்டை விட்டு வெளியே வருபவர்கள் மீது நடவடிக்கை எடுத்து வருகின்றனர். தென்காசி மாவட்டத்தில் 144 தடை உத்தரவை மீறியதால் இதுவரை 1015 வழக்குகள் பதிவு செய்யப்பட்டு 1312 பேர் கைது செய்யப்பட்டு உள்ளனர்.

இந்நிலையில் தென்காசி நகராட்சி பகுதியில் வசிக்கும் பொதுமக்கள் அத்தியாவசியப் பொருட்கள் வாங்க வாரத்தில் 2 நாட்கள் மட்டும் வெளியேவர அனுமதி அளிக்கும் வகையில் அட்டை வழங்கப்படுகிறது என தெரிவிக்கப்பட்டு உள்ளது.

தென்காசி நகராட்சி ஆணையாளர் (பொறுப்பு) ஹசீனா வெளியிட்டுள்ள செய்திக்குறிப்பில், கொரோனா வைரஸ் தொற்று தடுப்பு நடவடிக்கைகள் தென்காசி நகராட்சிப் பகுதிகளில் தீவிரமாக செயல்படுத்தப்பட்டு வருகிறது. தற்போது நாடு முழுவதும் ஊரடங்கு அமல்படுத்தப்பட்டிருப்பினும் பொதுமக்கள் தங்களின் அத்தியாவசிய தேவைகளுக்காக வெளியில் வருவதால் காய்கறி சந்தைகள், பலசரக்கு கடைகள் போன்ற அத்தியாவசிய பொருட்கள் விற்பனை செய்யும் கடைகளில் கூட்டம் ஏற்படுகிறது.

இந்நிலையை தவிர்க்கும் வகையில், பொதுமக்கள் வாரத்துக்கு 2 நாட்களில் மட்டும் வெளியில் வருவதற்கு அனுமதி அட்டை வழங்க முடிவு செய்யப்பட்டு உள்ளது. ‘பிங்க்’ நிறத்திலான அட்டை திங்கள் மற்றும் வியாழக்கிழமைகளில் மட்டும் வெளியில் வருவதற்கும், நீல நிறத்திலான அட்டை செவ்வாய் மற்றும் வெள்ளிக்கிழமைகளுக்கும், இளம் பச்சை நிறத்திலான அட்டை புதன் மற்றும் சனிக்கிழமைகளுக்கும் தயார் செய்யப்பட்டு உள்ளது.

இன்று தென்காசி நகராட்சி பகுதியிலுள்ள வீடுகளுக்கு அனுமதி அட்டைகள் வழங்கப்படும். நாளை முதல் அத்தியாவசிய பொருட்கள் வாங்குவதற்கு அனுமதி அட்டையுடன் வீட்டுக்கு ஒருவர் காலை 6 மணி முதல் மதியம் 1 மணி வரை வரலாம். மருத்துவ அவசரத்துக்கு விலக்கு அளிக்கப்படுகிறது. தனிமனித இடைவெளியை கடைபிடித்து, அனைவரும் கட்டாயம் முகக்கவசம் அணிந்துதான் வெளியேவர வேண்டும்.

அத்தியாவசிய பொருட்கள் விற்பனை செய்யும் வியாபார நிறுவனங்கள் பொதுமக்களிடம் உள்ள அடையாள அட்டையை சரிபார்த்து அந்த நாளில் அனுமதிக்கப்பட்டவர்களுக்கு மட்டும் பொருட்களை விற்பனை செய்ய வேண்டும். இதனை மீறுபவர்கள் மீது காவல்துறை மூலம் நடவடிக்கை எடுக்கப்படும் என தெரிவித்து உள்ளார். இதையடுத்து வீடுவீடாக அடையாள அட்டைகள் விநியோகம் செய்யும் பணி நடைபெற்று வருகிறது.

0 0
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %