#IndiaFightsCorona கேரளாவில் ஊரடங்கு கட்டுப்பாடுகள் தளர்த்திய விவகாரத்தில் மத்திய – மாநில அரசு இடையிலான மோதல் போக்கு ஏன்…?

Read Time:4 Minute, 59 Second
Page Visited: 45
#IndiaFightsCorona கேரளாவில் ஊரடங்கு கட்டுப்பாடுகள் தளர்த்திய விவகாரத்தில் மத்திய – மாநில அரசு இடையிலான மோதல் போக்கு ஏன்…?

இந்தியாவில் முதன் முதலாக கேரளாவில் தான் கொரோனா வைரஸ் தொற்றின் தாக்கம் அதிகமாக இருந்தது. ஆனால், அம்மாநில அரசு மேற்கொண்ட தீவிர நடவடிக்கைகளின் காரணமாக கொரோனா வைரசால் பாதிக்கப்படுபவர்களின் எண்ணிக்கை அங்கு வெகுவாக குறைந்தது.

இந்தநிலையில் நாடு முழுவதும் மே 3-ம் தேதி வரை ஊரடங்கு நீட்டிக்கப்பட்டு, 20-ம் தேதி (நேற்று) முதல் சில கட்டுப்பாடுகள் தளர்த்தப்படும் என்று மத்திய அரசு அறிவித்தது.

என்றாலும் எந்தெந்த பகுதிகளில் என்னென்ன கட்டுப்பாடுகளை தளர்த்துவது? என்பது பற்றி மாநில அரசுகளே முடிவு செய்து கொள்ளலாம் என்றும், தேவைப்பட்டால் சில கட்டுப்பாடுகளை கடுமையாக்கலாம் என்றும் மத்திய உள்துறை அமைச்சகம் கூறியிருந்தது. இதுதொடர்பாக உள்துறை அமைச்சக செயலாளர் அஜய் பல்லா அனைத்து மாநில மற்றும் யூனியன் பிரதேச தலைமைச் செயலாளர்களுக்கு கடிதம் எழுதி இருந்தார்.

இந்த நிலையில் கேரளாவில் கொரோனா பாதிப்பு குறைந்தது காரணமாக 2 மண்டலங்களில் அந்த மாநில அரசு நேற்று முதல் சில கட்டுப்பாடுகளை தளர்த்தி இருக்கிறது. அந்த பகுதிகளில் ஓட்டல்களை திறக்கவும், தனியார் வாகனங்களை ஒற்றைப்படை எண், இரட்டைப்படை எண் என்ற அடிப்படையில் ஒருநாள் விட்டு ஒருநாள் இயக்கவும் அனுமதி வழங்கப்பட்டது. இதற்கு மத்திய அரசு எதிர்ப்பு தெரிவித்தது.

இதுதொடர்பாக உள்துறை செயலாளர் அஜய் பல்லா, கேரள தலைமைச் செயலாளர் டாம் ஜோசுக்கு கடிதம் ஒன்றை எழுதினார். அதில், ஊரடங்கு கட்டுப்பாடுகளை தளர்த்துவது தொடர்பாக மத்திய அரசு வெளியிட்ட திருத்தப்பட்ட வழிகாட்டு நெறிமுறைகளுக்கு மாறாக கேரள அரசு சில கட்டுப்பாடுகளை தளர்த்தி இருக்கிறது.

நகராட்சி பகுதிகளில் உள்ள சிறு, குறு மற்றும் நடுத்தர தொழில் நிறுவனங்கள், ஓட்டல்கள், புத்தக கடைகள், சலூன்கள் செயல்படவும், 60 கி.மீ. தூரம் வரையிலான நகரங்களுக்கு இடையே பஸ்களை இயக்கவும், கார்கள், ஸ்கூட்டர்களை ஓட்டவும் அனுமதித்து இருப்பது ஊரடங்கு கட்டுப்பாடுகளை நீர்த்துப் போகச் செய்வதாகும். இது உச்சநீதிமன்றம் தெரிவித்த கருத்துக்கு எதிராகவும் அமைந்து இருக்கிறது. எனவே, மத்திய அரசு வெளியிட்ட வழிகாட்டு நெறிமுறைகளை பின்பற்றி ஊரடங்கு கட்டுப்பாடுகளை கேரள அரசு தீவிரமாக அமல்படுத்த வேண்டும் என்று கூறியிருந்தார்.

இதுபற்றி திருவனந்தபுரத்தில் நிருபர்களிடம் கருத்து தெரிவித்த கேரள சுற்றுலாத்துறை அமைச்சர் கடகம்பள்ளி சுரேந்திரன், ஊரடங்கு கட்டுப்பாடுகளை நீர்த்துப் போக செய்யும் வகையில் கேரள அரசு நடந்து கொள்ளவில்லை என்று குறிப்பிட்டார்.
மத்திய அரசு வெளியிட்ட வழிகாட்டு நெறிமுறைகளின்படிதான் நாங்கள் சில கட்டுப்பாடுகளை தளர்த்தி இருக்கிறோம் எனவும் குறிப்பிட்டார்.

ஊரடங்கு கட்டுப்பாடுகளை தளர்த்துவது தொடர்பாக மத்திய அரசு வெளியிட்ட வழிகாட்டு நெறிமுறைகளுக்கு மாறாக கேரள அரசு சில கட்டுப்பாடுகளை தளர்த்தியதாக மத்திய அரசு குற்றம் சாட்டிய நிலையில், விவகாரம் தொடர்பாக கேரள தலைமை செயலாளர் டாம் ஜோசுடன் முதல்வர் பினராயி விஜயன், தீவிர ஆலோசனை நடத்தி உள்ளார். இதனை தொடர்ந்து ஊரடங்கு கட்டுப்பாடுகளை தளர்த்துவதில் சில மாற்றங்களை பினராயி விஜயன் அறிவித்தார். அதன்படி மாநிலம் முழுவதும் பஸ்கள் ஓடாது என்றும் ஓட்டல்கள் மூடப்பட்டிருக்கும் என்று குறிப்பிட்டார்.

0 0
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %