#Coronavirus அமெரிக்காவில் ஹைட்ராக்சிகுளோரோகுயின் மாத்திரையால் அதிகமானோர் உயிரிழந்ததாக தகவல்…!

Read Time:4 Minute, 56 Second

எதை தின்றால் பித்தம் தெளியும் என யோசிப்பது போன்று இப்போது எதை சாப்பிட்டால் கொரோனா வைரசிடம் இருந்து தப்பிக்கலாம் என்ற நிலையே உலகம் ஏற்பட்டுள்ளது.

உலகம் முழுவதும் வேகமாக பரவும் இந்த கொரோனா வைரஸ் தொற்றுக்கு எதிர்ப்பு மருந்து எதுவும் கிடையாது. தற்போது பிறநோய்களுக்கு பயன்படுத்தப்பட்டு வரும் மருந்துகள் தடுப்பு சிகிச்சைக்கு பயன்படுத்தப்படுகிறது. இதில் மலேரியாவிற்கு பயன்படுத்தப்படும் ஹைட்ராக்சிகுளோரோகுயின் மாத்திரைகள் முக்கிய பங்கு பெற்று உள்ளது. இந்த மாத்திரைகள் சிகிச்சைக்கு பலன் அளிப்பதாக கூறப்படுகிறது. வைரசை நுரையீரல் செல்லவிடாமல் மூச்சுக்குழாய் பகுதியில் தடுக்கிறது எனவும் வைரசின் வீரியத்தை கட்டுப்படுத்துகிறது எனவும் தெரிவிக்கப்பட்டது.

ஆனால், அறிவியல்பூர்வமாக இந்த மாத்திரைகள் பயனளிக்கிறது என தெரிவிக்கப்படவில்லை. ஒருதடுப்பு நடவடிக்கையாக எப்படியாக தடுக்க வேண்டும் என்ற முயற்சியில் இந்த மாத்திரைகள் லைப் லைட்டிற்கு வந்தது. இந்த மாத்திரைகளால் மிகவும் பக்க விளைவுகள் ஏற்படும் என விஞ்ஞானிகள் எச்சரிக்கை தெரிவித்தனர். இந்த மாத்திரைகளால் பிரான்சில் பலர் இதய நோய்க்கு உள்ளானதாக தகவல் வெளியாகியது.

இதற்கிடையே அமெரிக்க அதிபர் டொனால்டு டிரம்ப், ஹைட்ராக்சிகுளோரோகுயின் மாத்திரைகள் பலனளிக்கிறது என கூவி கூவி பிரசாரம் மேற்கொண்டார். இதனை பல்வேறு விஞ்ஞானிகள் விமர்சனம் செய்தனர். இந்நிலையில் அமெரிக்காவிலிருந்து ஒரு அதிர்ச்சிகரமான தகவல் வெளியாகியுள்ளது. அதாவது, ஹைட்ராக்சிகுளோரோகுயின் மாத்திரையால் அதிகமானோர் உயிரிழந்ததாக ஆய்வு தகவல் வெளியாகியுள்ளது.

நியூ இங்கிலாந்து மருந்து இதழில் வெளியாகியுள்ள ஆய்வு கட்டுரையில், ஹைட்ராக்சிகுளோரோகுயின் மருந்துகள் கோவிட்-19 நோயாளிகளின் வெண்டிலேட்டர் பயன்பாடுகளை தவிர்க்கப் பயன்படுகிறதா என்பதற்கு எந்தஒரு ஆதாரமும் இல்லை என தெரிவிக்கப்பட்டுள்ள்ளது. அமெரிக்காவின் நேஷனல் இன்ஸ்டிட்யூட் ஆப் ஹெல்த் (National Institute of Health) நிறுவனத்தால் நிதியுதவி செய்யப்பட்டு மேற்கொள்ளப்பட்ட ஆய்வில், ஹைட்ராக்சிகுளோரோகுயின் மூலம்தான் மரண விகிதம் அதிகரித்துள்ளதாக கூறப்பட்டுள்ளது.

என்.ஐ.எச். அறிக்கையில், ‘கொரோனா வைரஸ் சிகிச்சைக்கான தெளிவுகள் தற்போது ஆய்வுகளில் உள்ளன. ஹைட்ராக்சிகுளோரோகுயின் அல்லது குளோரோகுயின் கொரோனா வைரஸ் சிகிச்சையில் பயன்படுத்தலாமா வேண்டாமா என்பது பற்றி மருத்துவ ஆய்வு தரவுகள் போதுமான அளவு இல்லை. குளோரோகுயின் அல்லது ஹைட்ராக்சிகுளோரோகுயின் அளித்தால் நோயாளியை மருத்துவர்கள் உன்னிப்பாக கண்காணித்து மோசமான விளைவுகள் பக்க விளைவுகள் ஏற்படுகிறதா? என்பதை தீர்மானிக்க வேண்டும்’ என்று எச்சரித்துள்ளது.

என்.ஐ.எச். நிபுணர்கள் ஹைட்ராக்சிகுளோரோகுயின் மற்றும் அசித்ரோமைசின் ஆகியவற்றை சேர்த்து கொடுப்பதை கண்டிக்கின்றனர்.

இதனால் நச்சுத்தன்மை அதிகரிக்கலாம் என்று எச்சரித்து உள்ளனர். டொனால்டு டிரம்ப் இந்த மாத்திரைக்காக பிரசாரம் செய்வதை அந்நாட்டு எம்.பி.க்கள், விஞ்ஞானிகள் கடுமையாக விமர்சனம் செய்கின்றனர். ஆனால் டொனால்டு டிரம்ப், எனக்கு இந்த ஆய்வு பற்றி எதுவும் தெரியாது. சில நல்ல ஆய்வு முடிவுகளும் உள்ளது. இது அதுபோன்ற நல்ல ஆய்வாக தெரியவில்லை. இது தொடர்பாக நாம் ஒருகட்டத்தில் முடிவெடுப்போம் எனக் குறிப்பிட்டுள்ளார்.

அமெரிக்காவில் டொனால்டு டிரம்ப் நிர்வாகம் 30 மில்லியன் டோஸ்கள் ஹைட்ராக்சிகுளோரோகுயினை இருப்பு வைத்துள்ளது, இதில் பெருமளவு இந்தியாவிலிருந்து ஏற்றுமதி செய்யப்பட்டவையாகும்.