#IndiaFightsCorona மலிவு விலையில் சில நிமிடங்களில் கொரோனா தொற்றை கண்டுபிடிக்கலாம்… இந்திய விஞ்ஞானிகள் சாதனை.!

Read Time:3 Minute, 40 Second

கொரோனா வைரஸ் தொற்று நோய் தாக்குதலை பரிசோதித்து அறிவதற்காக மலிவு விலை சோதனை முறை ஒன்றை இந்திய விஞ்ஞானிகள் கண்டுபிடித்து சாதனை படைத்து உள்ளனர்.

ஒருவருக்கு கொரோனா வைரஸ் தொற்று நோய் உள்ளதா, இல்லையா என்பதை முதற்கட்டமாக பரிசோதித்து அறிவது மிகவும் முக்கியமான பணியாகும்.

உலகம் முழுவதும் வைரஸ் பாதிப்பு வேகம் எடுப்பதால் இந்த கருவிக்கான தேவை அதிகரித்து உள்ளது. உலக நாடுகள் பலவும் ‘ரேபிட் டெஸ்ட் கிட்’ என்று அழைக்கப்படுகிற துரித பரிசோதனை கருவியை பயன்படுத்துகின்றன. இதன்மூலம் கொரோனா வைரஸ் தொற்று நோய் தாக்குதலை விரைவாக கண்டுபிடிக்கலாம் என தெரிவிக்கப்படுகிறது. இந்த கருவிகளுக்காக சீனாவை உலக நாடுகள் சார்ந்திருக்க வேண்டிய அவலம் உள்ளது. சீனா வழங்கும் கருவிகள் தரமற்றவையாக உள்ளது.

இதனால் வைரஸ் தொற்று பரவும் அபாயமானது விஸ்தரித்து செல்கிறது.

இருப்பினும் சீனாவில் தயாரிக்கப்படுகிற இந்த கருவி ரூ.750-க்கும் அதிகமாக செலவு ஆகிறது.

இந்த நிலையில் இந்தியாவின் மத்திய அறிவியல் தொழில் நுட்பத்துறையின் அங்கமான சி.எஸ்.ஐ.ஆர். என்னும் அறிவியல், தொழில் துறை ஆராய்ச்சி கவுன்சிலின் ஜெனோமிக்ஸ் மற்றும் இன்டிகிரேடிவ் பயாலஜி இன்ஸ்டிடியூட் விஞ்ஞானிகள் மிகவும் மலிவான ஒரு சோதனை முறையை கண்டுபிடித்து உள்ளனர் என்ற மகிழ்ச்சிகரமான தகவல் வெளியாகியுள்ளது.

இம்முறையில் கொரோனா நோய் கிருமிகளை கண்டறிய விலை உயர்ந்த எந்தவொரு எந்திரமும் தேவைப்படாது என்பது மேலும் சிறப்பு வாய்ந்ததாக பார்க்கப்படுகிறது.

இந்த மலிவு கட்டண முறைக்கு மறைந்த திரைப்பட இயக்குனர் சத்யஜித்ரேயின் கதைகளில் வருகிற துப்பறியும் பாத்திரமான பெலுடாவின் பெயர் வைக்கப்பட்டு உள்ளது.

இதில், காகிதத்தின் அடிப்படையில் பரிசோதனையானது நிகழவிருக்கிறது.

இதுதொடர்பாக ஜெனோமிக்ஸ் மற்றும் இன்டிகிரேடிவ் பயாலஜி இன்ஸ்டிடியூட் இயக்குனர் அனுராக் அகர்வால் பேசுகையில், இந்த பரிசோதனை முறையும் தற்போது வழக்கத்தில் உள்ள ஆர்.டி.பி.சி.ஆர் முறையை போன்றது. ஆர்.என்.ஏ.வை பிரித்தெடுத்து, டியோக்ஸரிபோனுகிளரிக் அமிலமாக மாற்றும் முறைதான். ஒரு காகிதத்தில் புதுமையான வேதியியலைப்பின்பற்றி இந்த பரிசோதனை செய்யப்படுகிறது. பெண்களுக்கு கர்ப்ப பரிசோதனை செய்வது போல ஒரு சில நிமிடங்களில் இதில் முடிவு வந்து விடும். இந்த சோதனை முறை கண்டறிந்து இருப்பவர்கள் எங்கள் இன்ஸ்டிடியூட்டை சேர்ந்த விஞ்ஞானிகள் தேபஜோதி சக்கரவர்த்தியும், சவிக் மைத்தியும் ஆவார் எனக் கூறியுள்ளார்.

இந்த சோதனை முறை, நடைமுறைக்கு வருகிறபோது நிறைய பேருக்கு குறைவான செலவில் பரிசோதனை செய்வதற்கு வழிபிறக்கும் என்பது குறிப்பிடத்தக்கது.