#IndiaFightsCorona மருத்துவர்களை தாக்கினால் 7 ஆண்டு சிறை… மத்திய அரசின் அவசர சட்டத்தின் சிறப்பு அம்சங்கள் என்ன…?

Read Time:5 Minute, 24 Second
Page Visited: 45
#IndiaFightsCorona மருத்துவர்களை தாக்கினால் 7 ஆண்டு சிறை… மத்திய அரசின் அவசர சட்டத்தின் சிறப்பு அம்சங்கள் என்ன…?

இந்தியாவில் கொரோனா வைரசினால் பாதிக்கப்படுபவர்கள் எண்ணிக்கை உயர்ந்து வருகிறது. பாதிக்கப்பட்டவர்களுக்கு மருத்துவர்களும், செவிலியர்களும், பிற மருத்துவ பணியாளர்களும் தங்கள் உயிரையும் பொருட்படுத்தாமல் சிகிச்சை அளிக்கும் பணியில் ஈடுபட்டு உள்ளனர். ஆனால், தன்னலமற்ற சேவையில் ஈடுபடும் அவர்கள் தாக்கப்படும் துரதிஷ்டவசமான சம்பவங்கள் நாடு முழுவதும் காணப்படுகிறது.

இதனையடுத்து, மருத்துவர்களுக்கும், மருத்துவ பணியாளர்களுக்கும் அரசு உரிய பாதுகாப்பு வழங்க வேண்டும் என்று இந்திய மருத்துவ சங்கம் கோரிக்கை விடுத்தது. மத்திய உள்துறை அமைச்சர் அமித்ஷா, அவர்களுக்கு உரிய பாதுகாப்பு வழங்கப்படும் என்று உறுதியளித்தார்.
இதனையடுத்து கொரோனா நோயாளிகளுக்கு சிகிச்சை அளிப்பவர்களுக்கு பாதுகாப்பு அளிக்கும் வகையில் அவசர சட்டம் கொண்டுவர மத்திய மந்திரி சபை ஒப்புதல் அளித்தது.

அவசர சட்டம் தொடர்பாக மத்திய தகவல் மற்றும் ஒலிபரப்பு துறை அமைச்சர் பிரகாஷ் ஜவடேகர் நேற்று (ஏப்ரல் 22) செய்தியாளர்களிடம் பேசுகையில், மருத்துவர்கள், மருத்துவ ஊழியர்கள், சுகாதாரப் பணியாளர்கள் தாக்கப்படுவதையும், துன்புறுத்தப்படுவதையும் ஒருபோதும் சகித்துக் கொள்ள முடியாது. நாகரிக சமுதாயத்தில் இப்படி நடைபெறுவதை அனுமதிக்க மாட்டோம். எனவே, மருத்துவர்கள் மற்றும் மருத்துவ பணியாளர்கள் தாக்கப்படுவதை தடுத்து நிறுத்தும் வகையில், 1897-ம் ஆண்டின் பெருந்தொற்று நோய்கள் தடுப்பு சட்டத்தில் திருத்தம் செய்யும் வகையில், அவசர சட்டம் கொண்டு வர மத்திய மந்திரிசபை கூட்டத்தில் ஒப்புதல் அளிக்கப்பட்டது என்றார்.

மருத்துவர்கள், செவிலியர்கள், சுகாதார பணியாளர்கள், உதவியாளர்கள், ‘ஆஷா’ பணியாளர்கள் உள்ளிட்ட மருத்துவ பணியாளர்களை, அவர்கள் வசிக்கும் மற்றும் பணிபுரியும் கட்டிடங்களில், வன்முறை தாக்குதல்களில் இருந்து பாதுகாக்க இந்த அவசர சட்டம் உதவும் என தெரிவித்தார்.

  • அவசர சட்டத்தின்படி, தாக்குதலில் காயம் அடைந்தவர்களுக்கும், சேதம் அடைந்த சொத்துகளுக்கும் நஷ்டஈடு வழங்கப்படும்.
  • மருத்துவர்கள், சுகாதார பணியாளர்களை தாக்குபவர்களை ஜாமீனில் வர முடியாத சட்டப்பிரிவின் கீழ் கைது செய்யப்படுவார்கள். அபராதமும், சிறை தண்டனையும் விதிக்கப்படும்.
  • மருத்துவர்கள், சுகாதார பணியாளர்களை தாக்கி லேசான காயம் ஏற்படுத்தினால் ரூ.50 ஆயிரம் முதல் ரூ.2 லட்சம் வரை அபராதம் விதிக்கப்படும். அதனுடன் 6 மாதங்கள் முதல் 5 ஆண்டுகள் வரையில் சிறை தண்டனை விதிக்கப்படும்.
  • மருத்துவர்கள், சுகாதார பணியாளர்களை தாக்கி பலத்த காயம் ஏற்படுத்தினால் ரூ.2 லட்சம் முதல் ரூ.5 லட்சம் வரை அபராதமும், அதிகபட்சமாக 7 ஆண்டுகள் வரையில் சிறை தண்டனையும் விதிக்கப்படும்.
  • இது தொடர்பான வழக்கு விசாரணைகள் 30 நாட்களுக்குள் முடிவடையும். தீர்ப்பு அதிகபட்சம் ஓர் ஆண்டுக்குள் வழங்கப்பட்டுவிடும்.
  • சுகாதார பணியாளர்களுக்கான காப்பீடு விரிவுபடுத்தப்படும்.
  • சுகாதார பணியாளர்கள் அனைவரையும் பாதுகாக்க வகை செய்யும் இந்த அவசர சட்டம் ஜனாதிபதியின் ஒப்புதலுக்காக விரைவில் அனுப்பி வைக்கப்படும் என பிரகாஷ் ஜவடேகர் தெரிவித்தார். ஜனாதிபதியின் ஒப்புதல் கிடைத்ததும் இந்த அவசர சட்டம் அமலுக்கு வரும்.

மேலும், பெருந்தொற்று தடுப்பு சட்டத்தில் செய்யப்படும் திருத்தங்கள், நாட்டில் கொரோனா வைரஸ் அச்சுறுத்தல் முடிந்த பிறகும் தொடர்ந்து நீடிக்குமா? என்று கேள்விக்கு பிரகாஷ் ஜவடேகர் பதில் அளிக்கையில், பெருந்தொற்று தடுப்பு சட்டத்தில் திருத்தம் செய்ய அவசர சட்டம் ஒப்புதல் அளிப்பதாகவும், இது ஒரு நல்ல தொடக்கம் என்றும் கூறினார்.

0 0
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %