#IndiaFightsCorona குஜராத் தலைநகர் அகமதாபாத்தில் மே மாத இறுதிக்குள் 8 லட்சம் பேருக்கு கொரோனா தொற்று ஏற்படலாம்… அதிகாரி சொல்வது என்ன…?

Read Time:3 Minute, 16 Second

இந்தியாவில் கொரோனாவில் வேகமாக பாதிக்கப்பட்டு வரும் மாநிலங்களில் குஜராத் மாநிலமும் ஒன்று. கொரோனாவினால் குஜராத் மாநிலத்தில் இதுவரையில் 2,815 பேர் பாதிக்கப்பட்டு உள்ளனர்.

மாநிலத்தில் அகமதாபாத் மற்றும் சூரத் நகரங்கள் மெல்ல, மெல்ல கொரோனாவின் பிடிக்குள் சிக்கிவருகிறது.

சமீபத்திய 4 நாட்களில் கொரோனாவை வைரஸ் பாதிப்பு இரட்டிப்பாகியுள்ளது, இதே நிலை தொடர்ந்தால் குஜராத்தின் அகமதாபாத் நகரில் COVID-19 கொரோனா வைரஸ் பாதிப்பு நோயாளிகளின் எண்ணிக்கை மே மாத இறுதிக்குள் எட்டு லட்சமாக உயரக்கூடும் என்று அகமதாபாத் நகராட்சி ஆணையர் விஜய் நெஹ்ரா வெள்ளிக்கிழமை (ஏப்ரல் 24) வெளியிட்ட வீடியோ செய்தியில் தெரிவித்து உள்ளார்.

இதுவரை, அகமதாபாத் நகரில் 1,638 பேருக்கு கொரோனா வைரஸ் பாதிப்பு பதிவாகி உள்ளன. 75 நோயாளிகள் உயிரிழந்து உள்ளனர், 105 பேர் குணமாகி உள்ளனர், 1,459 பேர் மருத்துவமனைகளில் சிகிச்சை பெற்று வருகிறார்கள் என விஜய் நெஹ்ரா தெரிவித்து உள்ளார்.

“தற்போது, அகமதாபாத்தில் பாதிப்பு நான்கு நாட்களில் இரட்டிப்பாகிறது, அதாவது ஒவ்வொரு நான்கு நாட்களுக்கும் வழக்குகள் இரட்டிப்பாகிறது. இந்த விகிதம் தொடர்ந்தால் மே 15-ம் தேதிக்குள் 50,000 பேருக்கு கொரோனா வைரஸ் பாதிப்பு இருக்கும், மே 31-ம் தேதிக்குள் 8 லட்சமாக இருக்கும்” என எச்சரிக்கிறார்.

“இந்த விகிதத்தை எட்டு நாட்களுக்கு குறைப்பதே எங்கள் இலக்காக உள்ளது. இது மிகவும் கடினமான பணியாக இருக்கும். ஏனெனில், மிகச் சில நாடுகள் மட்டுமே இந்த இலக்கை அடைந்து உள்ளன. அமெரிக்கா மற்றும் ஐரோப்பிய நாடுகள் தற்போது நான்கு நாட்கள் இரட்டிப்பு விகிதத்தை கொண்டு உள்ளன, தென் கொரியா மட்டுமே எட்டு நாள் வீதத்தை அடைந்துள்ளது.

வைரஸ் பாதிப்பு எண்ணிக்கை இரட்டிப்பாக்கும் விகிதத்தை எட்டு நாட்களாக குறைத்துவிட்டால், பாதிப்பு எண்ணிக்கை 50,000-க்கு பதிலாக மே 15-ம் தேதிக்குள் 10,000 மட்டுமே இருக்கும். அதேபோல், வழக்குகள் மதிப்பிடப்பட்ட எட்டு லட்சத்திற்கு பதிலாக மே 31-ம் தேதிக்குள் 50,000 ஆக இருக்கும். மாநகராட்சியின் தரப்பில் எடுக்கப்படும் நடவடிக்கைகளுக்கு மக்கள் ஒத்துழைப்பின் உதவியுடன் இந்த இலக்கை அடைவோம் என்று நாங்கள் நம்புகிறோம். மே 3-ம் தேதி ஊரடங்கு முடிவுக்கு வருவதற்கு முன்பு இரட்டிப்பு வீதத்தை குறைக்க வேண்டும் என்று விஜய் நெஹ்ரா வலியுறுத்தி உள்ளார்.