#IndiaFightsCorona இந்தியாவில் கொரோனாவின் வேகம் கூடுகிறது…! பாதிப்பு, பலி எண்ணிக்கை திடீர் உயர்வு: மாநிலம் வாரியாக பாதிப்பு எண்ணிக்கை விபரம்:-

Read Time:3 Minute, 16 Second

உலக நாடுகள் அனைத்தையும் பதம்பார்த்து வரும் கொரோனா வைரஸ் தொற்று, இந்தியாவிலும் பரவும் வேகத்தை கூட்டி வருகிறது. இந்தியாவில் வைரசால் பாதிக்கப்பட்டவர்கள் எண்ணிக்கை 24 ஆயிரத்தை கடந்துவிட்டது. மத்திய சுகாதாரத்துறை அமைச்சகம் இன்று காலை வெளியிட்ட புள்ளி விவரத்தில், கடந்த 24 மணி நேரங்களில் 1,429 பேருக்கு கொரோனா நோய்த்தொற்று உறுதி செய்யப்பட்டுள்ளதாக குறிப்பிடப்பட்டுள்ளது.

இந்தியாவில் மொத்தமாக கொரோனாவினால் பாதிக்கப்பட்டவர்கள் எண்ணிக்கை 24,506 ஆக உயர்ந்து உள்ளது. உயிரிழந்தவர்கள் எண்ணிக்கையிலும் உயர்வு காணப்படுகிறது.

கொரோனா வைரஸ் கடந்த 24 மணி நேரத்தில் 57 பேரை கொன்றது, இதனால் நாட்டில் வைரசினால் இறந்தவர்களின் எண்ணிக்கை 775 ஆக உயர்ந்து உள்ளது. இது தொற்றுநோய் தோன்றியதிலிருந்து இந்தியாவில் ஒரேநாளில் ஏற்பட்ட அதிக எண்ணிக்கையிலான அதிகப்பட்ச உயிரிழப்பாகும். மராட்டிய மாநிலம் மிகவும் அதிகமாக பாதிக்கப்பட்ட மாநிலமாக உள்ளது. அங்கு 6,817 பேருக்கு கொரோனா தொற்று ஏற்பட்டுள்ளது. மும்பையில் மட்டும் 3 ஆயிரத்திற்கும் அதிகமானோருக்கு வைரஸ் தொற்று பாதிப்பு உள்ளது.

மராட்டியத்தில் அதிக எண்ணிக்கையிலான இறப்புகள் 301 பதிவாகியுள்ளது. இதற்கு அடுத்தப்படியாக குஜராத் (127), மத்தியப் பிரதேசம் (92), டெல்லியில் (53) அதிகமான உயிரிழப்பு நேரிட்டுள்ளது. 5,000 க்கும் மேற்பட்டோர், அதாவது மொத்த பாதிப்பில் 21% பேர் நோயிலிருந்து மீண்டுள்ளதாக மத்திய அரசு தெரிவித்துள்ளது. தொற்றிலிருந்து குணமான நோயாளிகளின் எண்ணிக்கை மராட்டியத்தில் 840 ஆக உள்ளது. இதுவரை 857 நோயாளிகள் குணமாகி மருத்துவமனையில் இருந்து திரும்பிய நிலையில், டெல்லி நாட்டின் சிறந்த குணம் அடைவோர் விகிதங்களில் ஒன்றாக உள்ளது.

மாநிலம் வாரியாக பாதிப்பு விபரம்:-

அந்தமான் மற்றும் நிக்கோபார் தீவுகள் – 27, ஆந்திரா – 955, அருணாச்சல பிரதேசம் – 1, அசாம் – 36, பீகார் – 223, சண்டிகார் – 27, சத்தீஷ்கார் – 36, டெல்லி – 2,514, கோவா – 7, குஜராத் -2,815, அரியானா – 272, இமாச்சலப் பிரதேசம் – 40, ஜம்மு-காஷ்மீர் – 454, ஜார்க்கண்ட் – 57, கர்நாடகா – 474 ,கேரளா – 450, லடாக் – 20, மத்தியப் பிரதேசம் – 1,852, மகாராஷ்டிரா – 6,817, மணிப்பூர் – 2, மேகாலயா – 12, மிசோரம் – 1, ஒடிசா – 94, புதுச்சேரி – 7, பஞ்சாப் – 298, ராஜஸ்தான் – 2,034, தமிழ்நாடு – 1,755, தெலுங்கானா – 984, திரிபுரா – 2, உத்தரகண்ட் – 48, உத்தரபிரதேசம் – 1,621, மேற்கு வங்காளம் – 571.