TMP Explained: ‘சென்னையில் நிலைமை தீவிரமாக உள்ளது…’ மத்திய உள்துறை அமைச்சக எச்சரிக்கை என்ன…? மத்திய குழுவின் பணி என்ன…?

Read Time:8 Minute, 26 Second
Page Visited: 190
TMP Explained: ‘சென்னையில் நிலைமை தீவிரமாக உள்ளது…’ மத்திய உள்துறை அமைச்சக எச்சரிக்கை என்ன…? மத்திய குழுவின் பணி என்ன…?

இந்தியாவில் கொரோனா வைரஸ் பரவலை கட்டுப்படுத்த மத்திய மாநில அரசுக்கள் போர்க்கால அடிப்படையில் நடவடிக்கைகளை மேற்கொண்டன. இதனால் கொரோனா வைரசின் வேகம் கட்டுப்படுத்தப்பட்டது. இருப்பினும், வைரசின் பாதிப்பு ஒவ்வொரு நாளும் அதிகரித்து வருகிறது. வைரஸ் பரவலை கட்டுப்படுத்த கொண்டுவரப்பட்ட ஊரடங்கை மீறி பொறுப்பற்று பொதுமக்கள் இருப்பதால் இதுபோன்ற தொற்று பரவல் விஸ்தரிக்கிறது. டெல்லி, மும்பை, இந்தூர், ஆமதாபாத், சூரத், சென்னை, ஐதராபாத் உள்ளிட்ட முக்கிய நகரங்களில் வைரசின் ஆதிக்கம் ஒவ்வொருநாளும் அதிகரித்து வருகிறது. இங்கு வைரசினால் பாதிக்கப்படுபவர்கள் எண்ணிக்கை தொடர்ந்து உயர்ந்து வருகிறது.

ஐ.எம்.சி.டி. குழு

வைரஸ் பரவலை கட்டுப்படுத்தும் விவகாரத்தில் மாநில அரசுக்களுடன் மத்திய அரசு இணைந்து செயல்பட்டு வருகிறது. பாதிக்கப்பட்ட இடங்களுக்கு மத்திய அமைச்சரவை அதிகாரிகள் அடங்கிய குழு Interministerial Central Teams (ஐ.எம்.சி.டி.) அனுப்பி வைக்கப்படுகிறது.

மத்திய அரசின் குழுவில் மருத்துவ வல்லுநர்கள், பேரிடர் மேலாண்மை வல்லுநர்கள், கூடுதல் செயலாளர் அளவில் ஐஏஎஸ் அதிகாரிகள் ஆகியோர் இடம் பெற்று உள்ளனர். தற்போது தமிழகம், குஜராத், தெலங்கானா மாநிலங்களில் கொரோனா பரவல், ஊரடங்கு நிலவரம், சுகாதார நடவடிக்கைகள் போன்றவற்றை ஆய்வு செய்ய 4 குழுக்கள் அனுப்பி வைக்கப்பட்டு உள்ளன. இந்த குழுக்கள் அகமதாபாத், சூரத், ஐதராபாத், சென்னை ஆகிய முக்கிய நகரங்களை ஆய்வு செய்ய உள்ளது.

மோசமாக உள்ளது

இதுதொடர்பாக மத்திய உள்துறை அமைச்சகம் விரிவான அறிக்கையை வெளியிட்டுள்ளது. அதில், முக்கிய ‘ஹாட்ஸ்பாட்’ மாவட்டங்களில் (வைரஸ் தொற்று பரவல் மிகவும் அதிகமாக உள்ள இடங்கள்) அல்லது அகமதாபாத் மற்றும் சூரத் (குஜராத்), தானே (மராட்டியம்), ஐதராபாத் (தெலுங்கானா), மற்றும் சென்னை (தமிழகம்) போன்ற வளர்ந்து வரும் ‘ஹாட்ஸ்பாட்’ பகுதிகளில் கொரோனா வைரஸ் நிலைமை தீவிரமாக உள்ளது.”

நாட்டில் கொரோனா வைரஸ் ஹாட்ஸ்பாட் மாவட்டங்களின் நிலையை மதிப்பீட மத்திய அரசு ஏற்கனவே 10 இடைநிலை மத்திய குழுக்களை (Interministerial Central Teams) அமைத்துள்ளது. இவற்றில் ஐந்து குழுக்கள் அகமதாபாத், சூரத் (இரண்டும் குஜராத் மாநிலம்), தானே (மராட்டியம்), ஐதராபாத் (தெலுங்கானா) மற்றும் சென்னை (தமிழகம்) ஆகிய இடங்களில் சோதனையில் ஈடுபடுத்தப்பட்டு உள்ளன.

முன்னதாக, அமைக்கப்பட்ட குழுக்கள் மும்பை, புனே (மராட்டியம்), இந்தூர் (மத்தியப் பிரதேசம்), ஜெய்ப்பூர் (ராஜஸ்தான்) மற்றும் மேற்கு வங்காளத்தில் (கொல்கத்தா மற்றும் அதனை ஒட்டிய மாவட்டங்களுக்காக ஒரு குழுவும், மற்றொன்று வட மேற்கு வங்காளம்) பணியாற்றி வருகிறது என தெரிவிக்கப்பட்டு உள்ளது.

சுகாதார ஆபத்து

மத்திய உள்துறை அமைச்சகத்தின் அறிக்கையில், நாட்டின் சில பகுதிகளில் அமலில் உள்ள ஊரடங்கு விதிமுறை நடவடிக்கைகளை மீறுவது பொதுமக்களுக்கு கடுமையான சுகாதார ஆபத்தை ஏற்படுத்துவதாகவும், இது கொரோனா வைரஸ் பரவுவதற்கு வழிவகுக்கும் என தெரிவிக்கப்பட்டுள்ளது.

நாட்டின் சில மாவட்டங்களில் வைரஸ் பரவலை கட்டுப்படுத்தும் விதமாக அமல்படுத்தப்பட்ட ஊரடங்கு நடவடிக்கைகளில் பல மீறல்கள் பதிவாகி உள்ளது. இது, கடுமையான சுகாதார விளைவுகள் மற்றும் COVID-19 கொரொனா பரவுவதற்கான அபாயத்தை ஏற்படுத்தியுள்ளது, இது பொதுமக்களின் பொது சுகாதார நலனுக்கு எதிரானது. ஊரடங்குகள் விதிமீறல்களில் முன்னணி சுகாதார வல்லுநர்கள் (மருத்துவர்கள்) மீதான வன்முறை தாக்குதல், காவல்துறை ஊழியர்கள் மீதான தாக்குதல்கள், சந்தை போன்ற இடங்களில் சமூக விலகல் விதிமுறைகளை மீறுதல் மற்றும் தனிமைப்படுத்தப்பட்ட மையங்களை அமைப்பதற்கான எதிர்ப்பை தெரிவித்தல் மற்றும் பல சம்பவங்கள் அடங்கும்.

ஹாட்ஸ்பாட் மாவட்டங்கள் மற்றும் வளர்ந்து வரும் ஹாட்ஸ்பாட்கள் அல்லது பெரியதாக கொரோனா வைரஸ் பரவல் அல்லது கொத்து, கொத்தாக பாதிப்பு ஏற்படும் என எதிர்பார்க்கப்படும் இடங்களில் எந்தவிதமான தடுப்பு நடவடிக்கைகளும் இல்லாமல் இதுபோன்ற விதிமீறல் சம்பவங்களை நடக்க அனுமதிக்கப்பட்டால், அது நாட்டு மக்களுக்கு கடுமையான சுகாதார ஆபத்தை ஏற்படுத்தும் என உள்துறை அமைச்சகம் எச்சரிக்கை விடுத்து உள்ளது.

மத்திய குழுவின் பணிகள்

மத்திய குழுக்கள் (ஐ.எம்.சி.டி.) மத்திய அரசின் நிபுணத்துவத்தை பயன்படுத்துவதோடு, கொரோனா வைரஸ் பரவலை திறம்பட எதிர்த்து போராடுவதற்கும் கட்டுப்படுத்துவதற்கும் மாநில அரசுகளின் செயல்பாட்டிற்கு உதவியாக இருக்கும் என உள்துறை அமைச்சகம் தெரிவித்து உள்ளது.

இந்த குழுவின் பணி தொடர்பாக உள்துறை அமைச்சகம் வெளியிட்டுள்ள அறிக்கையில் விளக்கம் அளிக்கப்பட்டுள்ளது. அதில், மத்திய குழுக்கள் கொரோனா வைரஸ் பாதிப்பு நிலைமையை பாதிக்கப்பட்ட இடங்களில் மதிப்பீடு செய்து, அதனை சரிசெய்ய மாநில அதிகாரிகளுக்கு தேவையான வழிமுறைகளை வழங்கும் மற்றும் பொது மக்களின் பெரிய பாதுகாப்பு நலனுக்காக தங்கள் அறிக்கையை மத்திய அரசிடம் சமர்ப்பிக்கும்.

பேரிடர் மேலாண்மைச் சட்டம் 2005 இன் கீழ் வெளியிடப்பட்ட வழிகாட்டுதல்களின்படி, ஊரடங்கு நடவடிக்கைகளுக்கு இணங்குதல் மற்றும் விதிமுறைகளை செயல்படுத்துதல், அத்தியாவசிய பொருட்கள் கிடைப்பதை உறுதி செய்தல், வீடுகளுக்கு வெளியே மக்கள் நடமாட்டத்தில் சமூக விலகலை உறுதி செய்தல், சுகாதார உள்கட்டமைப்பு, மருத்துவமனை வசதிகள் உள்ளிட்ட பல்வேறு விஷயங்களில் மத்திய குழு கவனம் செலுத்தும். சுகாதார நிபுணர்களின் (மருத்துவ துறையினர்) பாதுகாப்பு, சோதனை கருவிகள், பிபிஇக்கள், முகக்கவசங்கள் மற்றும் பிற பாதுகாப்பு உபகரணங்கள்; தொழிலாளர்கள் மற்றும் ஏழை மக்களுக்கான நிவாரண முகாம்களின் நிலைமைகளை மத்திய குழுக்கள் கவனிக்கும் என தெரிவிக்கப்பட்டு உள்ளது.

0 0
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %