#Coronavirus கொரோனாவினால் அந்தோ பரிதாப நிலையில் அமெரிக்கா… பாதிப்பு 10 லட்சத்தையும், பலி 55 ஆயிரத்தையும் நெருங்கியது…!

Read Time:2 Minute, 5 Second

கொரோனா வைரஸ் தொற்று விவகாரத்தில் அமெரிக்காவின் நிலை இப்போது அந்தோபரிதாபம் என்றாகி விட்டது.

அமெரிக்காவை கண்ணுக்கு தெரியாத கொரோனா வைரஸ் இந்த நிலைக்கு கொண்டுவந்து உள்ளது என்பதுதான் மிகப்பெரிய சோகமாக அமைந்து உள்ளது.

அமெரிக்காவில் கொரோனாவினால் புதியதாக பாதிக்கப்படுபவர்கள் மற்றும் உயிரிழப்பவர்கள் எண்ணிக்கை தொடர்ந்து அதிகரித்துக் கொண்டே செல்கிறது. அமெரிக்காவில் வைரஸ் பிடியில் சிக்கித்தவிப்போர் எண்ணிக்கை 960,896 ஆக உள்ளது. இந்த எண்ணிக்கை ஸ்பெயின் , இத்தாலி, பிரான்ஸ், ஜெர்மனி, இங்கிலாந்து, துருக்கி ஆகிய 6 நாடுகளில் பாதிக்கப்பட்டோர் எண்ணிக்கையை விட அதிகமாக உள்ளது. அமெரிக்காவில் பலியானோர் எண்ணிக்கை 54,265 ஆக உயர்ந்து உள்ளது.

உலகளவிலான பலி 2 லட்சத்தை கடந்து உள்ளது. உலகளவிலான உயிரிழப்பில் நான்கில் ஒருவர் அமெரிக்கர் என்பது அந்த நாட்டுக்கு பேரிழப்பாக அமைந்து உள்ளது. அமெரிக்க மருத்துவமனைகளில் எல்லாம் மரண ஓலத்தைத்தான் கேட்க முடிகிறது. எங்கு பார்த்தாலும் குவியல் குவியலாக பிணங்களை இறுதிச்சடங்குக்காக அள்ளிச் செல்லப்படும் பரிதாப நிலையே புகைப்படங்களாக வெளியாகி வருகிறது. இதுவரையில் அந்த நாட்டில் நிகழ்ந்திராத ஒன்றாக அமைந்து உள்ள சம்பவமாக கொரோனாவின் தாக்கம் உள்ளது.

உலகின் நிதித்தலைநகரம் என்ற சிறப்புக்குரிய நியூயார்க் கொரோனாவின் தலைநகரமாகி உள்ளது. அங்குமட்டும் 288,313 பேர் கொரோனாவினால் பாதிக்கப்பட்டு உள்ளனர். 21,908 பேர் பலியாகியுள்ளனர்.