#IndiaFightsCorona சிவப்பு, ஆரஞ்சு மண்டலங்களில் ஊரடங்கு நீட்டிப்பு…?

ஏப்ரல் 27-ம் தேதி மாநில முதல்-அமைச்சர்கள் உடனான உரையாடலில், பிரதமர் நரேந்திர மோடி மே 3-ம் தேதிக்கு பின்னர் கொரோனா வைரஸ் பரவலை கட்டுப்படுத்துவதற்காக அமல்படுத்தப்பட்டுள்ள ஊரடங்கை சிவப்பு மற்றும் ஆரஞ்சு மாவட்டங்களில் நீட்டிக்கலாம் என்பதை சுட்டிக்காட்டினார் என செய்திகள் வெளியாகியது.

பிரதமர் மோடி கொரோனா ஆபத்து நிலையில் “நிலையான விழிப்புணர்வுடன்” இருப்பதன் முக்கியத்துவத்தை அடிக்கோடிட்டுக் காட்டியிருந்தார். கொரோனா வைரஸ் பாதிப்பு நிலையை அடிப்படையாக கொண்டு சிவப்பு மண்டலங்களை ஆரஞ்சு மண்டலங்களாக மாற்றுவதற்கும், பின்னர் பச்சை மண்டலமாக மாற்றவதற்கும் மாநிலங்கள் முயற்சிகளை மேற்கொள்ள வேண்டும் என்றார்.

இந்நிலையில் கொரோனா வைரசுக்கு எதிரான போர்க்களத்தில் நிற அடிப்படையில் மண்டலங்கள் (தமிழகத்தில் மாவட்ட அடிப்படையில் பிரிக்கப்பட்டு ஒவ்வொருநாளும் தகவல் வெளியிடப்பட்டு வருகிறது.) பிரிப்பது தொடர்பான தகவல்களை தெரிந்துக்கொள்ளலாம்.

சிவப்பு மண்டலங்கள் என்றால் என்ன? இவை ‘ஹாட்ஸ்பாட்கள்’ போன்றவையா…?

சிவப்பு மண்டலங்கள் என்பது பெரிய அளவில் கொரோனா வைரஸ் பாதிப்பு ஏற்பட்ட பகுதிகளாகும். மத்திய சுகாதார மற்றும் குடும்பநல அமைச்சகம் (MOHFW) வழங்கிய வழிகாட்டுதலின் படி இந்த மாவட்டங்கள் அல்லது குறிப்பிட்ட இடங்கள் ‘ஹாட்ஸ்பாட்களாக’ கருதப்படுகின்றன. 4 நாட்களில் கொரோனாவினால் பாதிக்கப்பட்டவர்களின் எண்ணிக்கை இருமடங்காக உயரும் இடங்கள் இவ்வாறு வகைப்படுத்தப்படுகிறது. இந்தியாவின் முக்கிய நகரங்களான டெல்லி, மும்பை, கொல்கத்தா, சென்னை, பெங்களூரு மற்றும் ஐதராபாத் இவை அனைத்தும் சிவப்பு மண்டலங்களாக (மாவட்டங்களாக) கருதப்படுகின்றன.

ஆரஞ்சு மண்டலம் எவ்வாறு வகைப்படுத்தப்படுகிறது…?

குறைந்த அளவு கொரோனா வைரஸ் பாதிப்பு கொண்ட மண்டலமாகும் (மாவட்டங்களாகும்). கொரோனா வைரஸ் தொற்று வேகமாக அதிகரிக்காத பகுதியாகும். ஒருபகுதியில் 14 நாட்கள் தொடர்ச்சியாக புதிய தொற்று ஏற்படவில்லை என்றால் சிவப்பு மண்டலத்தில் இருந்து ஆரஞ்சு மண்டலமாக மாற்றப்படும். கடந்த 8 நாட்களாக தூத்துக்குடி மாவட்டத்தில் புதிதாக யாருக்கும் கொரோனா வைரஸ் தொற்று ஏற்படவில்லை. இது தொடரும் பட்சத்தில் சிவப்பு மண்டலத்தில் இருந்து ஆரஞ்சு மண்டலமாக தூத்துக்குடி மாவட்டம் மாறும்.

பச்சை மண்டலம் எவ்வாறு வகைப்படுத்தப்படுகிறது…?

கொரோனா வைரஸ் பாதிப்பு இல்லாத மாவட்டங்கள் பச்சை மண்டலமாக வகைப்படுத்தப்படுகிறது. மத்திய சுகாதாரத்துறை அமைச்சகத்தின் தகவலின்படி, ஒரு ஹாட்ஸ்பாட் மாவட்டத்தில் 28 நாட்களாக எந்தவொரு கொரோனா வைரஸ் பாதிப்பும் ஏற்படவில்லை என உறுதி செய்யப்பட்டால் அது பச்சை மண்டலமாக மாறும். எடுத்துக்காட்டாக, சென்னையில் 14 நாட்களுக்கு புதியதாக ஒருவருக்கு கொரோனா வைரஸ் பாதிப்பு ஏற்படவில்லை என்றால் அது ஆரஞ்சு மண்டலத்திற்கு கொண்டு செல்லப்படும். பின்னர், அதிலிருந்து 14 நாட்களில் எந்தவொரு நேர்மறையான கொரோனா பாதிப்பும் ஏற்படவில்லை என்றால் பச்சை மண்டலமாக மாறும்.

தமிழகத்தில் ஈரோடு மாவட்டத்தில் 14 நாட்களாக புதியதாக யாருக்கும் கொரோனா வைரஸ் பாதிப்பு ஏற்படவில்லை. பாதிக்கப்பட்டவர்களும் குணமடைந்து வீடு திரும்பினர். இங்கு மேலும் 14 நாட்களுக்கு வைரஸ் தொற்று யாருக்கும் புதியதாக ஏற்படவில்லை என்றால் பச்சை மண்டலமாக மாற்றப்படும்.

நீங்கள் இருக்கும் பகுதி எந்த மண்டலத்தில் வருகிறது என்பதை எப்படி தெரிந்துக்கொள்ளலாம்…?

சிவப்பு, ஆரஞ்சு மற்றும் பசுமை மண்டலத்தின் பரந்த பட்டியல் கடந்த ஏப்ரல் 17-ம் தேதி மத்திய அரசால் வெளியிடப்பட்டது. இது தொடர்பாக மாநில அரசு வெளியிடும் வகைப்பாடு தான் உங்களுக்கு மிகவும் பயனுள்ளதாக இருக்கும். ஒவ்வொரு வாரமும், மாவட்ட மாஜிஸ்திரேட் தங்களின் அதிகார எல்லைக்குள் உள்ள பகுதிகள் மற்றும் அந்தந்த மண்டலங்களின் பட்டியலை வெளியிடுகிறார்.

Next Post

#IndiaFightsCorona இந்தியாவில் 33,050 பேருக்கு நோய்த்தொற்று, பலி எண்ணிக்கை 1,074 ஆக உயர்வு.!

Thu Apr 30 , 2020
உலகம் முழுவதும் வேகமாக பரவி வரும் கொரோனா வைரஸ் சுமார் 31 லட்சத்துக்கும் மேற்பட்டோரை நோய்த்தொற்றுக்கு உள்ளாக்கியதுடன், 2 லட்சத்துக்கும் அதிகமானோரின் உயிரையும் பலி வாங்கிவிட்டது. இந்தியாவிலும் இந்த கொடூர கொரோனா வைரஸ் 33,050 பேரை பாதிப்புக்கு உள்ளாக்கிவிட்டது. மத்திய சுகாதாரத்துறை அமைச்சகம் இன்று காலை வெளியிட்ட புள்ளி விவரத்தில், இந்தியாவில் ஒரே நாளில் 1,718 பேருக்கு கொரோனா தொற்று உறுதியாகி உள்ளதாக தெரிவிக்கப்பட்டு உள்ளது. இதனால் முந்தைய நாள் […]

அதிகம் வாசிக்கப்பட்டவை