#IndiaFightsCorona தமிழகத்தில் சென்னை, மதுரை உள்பட 12 மாவட்டங்களை சிவப்பு மண்டலமாக மத்திய அரசு அறிவித்தது…

Read Time:4 Minute, 58 Second

மத்திய அரசு கொரோனா வைரஸ் தொற்று பாதிப்பு நிலவரத்தின் அடிப்படையில் குறிப்பிட்ட பகுதியை நிறங்களின் அடிப்படையில் பிரிக்கிறது. சிவப்பு, ஆரஞ்சு மற்றும் பச்சை நிறங்களில் பிரிக்கிறது.

மத்திய சுகாதாரத்துறை அமைச்சகத்தின் வழிகாட்டுதல்களின்படி, அதிகமான கொரோனா வைரஸ் நோயாளிகளை கொண்ட மாவட்டங்கள் மற்றும் வேகமாக தொற்று பரவும் மாவட்டங்கள் சிவப்பு மண்டலங்களின் கீழ் வகைப்படுத்தப்படுகின்றன. கணிசமான அளவு கொரோனா வைரஸ் தொற்று நோயாளிகளை கொண்ட மாவட்டங்கள் மற்றும் தொற்றில் வேகம் இல்லாத மாவட்டங்கள் ஆரஞ்சு நிறத்தில் வகைப்படுத்தப்படுகிறது. வைரஸ் பாதிப்பு இல்லாத மாவட்டங்கள் பச்சை மண்டலங்களாக வகைப்படுத்தப்படுகிறது.

இந்தியாவில் உள்ள மாவட்டங்களில் கொரோனா வைரஸ் பாதிப்பு நிலவரம் அடிப்படையில் மத்திய அரசு தற்போது எந்த மாவட்டம் எந்த மண்டலங்களில் வருகிறது என்பதை திருத்தப்பட்ட பட்டியலை வெளியிட்டுள்ளது. இதுதொடர்பான விபரங்களை மத்திய அரசு, மாநில தலைமைச் செயலாளர்கள், சுகாதாரத்துறை செயலாளர்களுக்கு அனுப்பியுள்ளது. புதியதாக திருத்தப்பட்ட பட்டியலின் அடிப்படையில் இந்தியாவில் மொத்தம் 130 மாவட்டங்கள் சிவப்பு மண்டலத்தில் வருகின்றன. தமிழகத்தில் சென்னை உள்பட 12 மாவட்டங்கள் சிவப்பு மண்டலத்தின் கீழ் வகைப்படுத்தப்பட்டு உள்ளது.

சிவப்பு, ஆரஞ்சு மற்றும் பச்சை ஆகிய மூன்று மண்டலங்களில் ஒரு மாவட்டத்தை இணைக்கும் விவகாரத்தில் பின்பற்றப்படும் விதிமுறைகள் என்ன? என்பதையும் மத்திய அரசு, மாநிலங்களுக்கு தகவல் தெரிவித்து உள்ளது.

கொரோனா வைரஸ் பாதிப்பு அதிகம் கொண்ட மாவட்டங்கள் சிவப்பு மண்டலமாக வகைப்படுத்தப்படுகிறது. அதாவது வைரஸ் பாதிப்பு தொடர்ந்து இரட்டிப்பாகும் போது சிவப்பு மண்டலமாக மாற்றப்படுகிறது. 21 நாட்கள் புதியதாக வைரஸ் தொற்று பாதிப்பு இல்லை என்றால் பச்சை மண்டலத்திற்கு மாறும். மத்திய அரசின் விதிமுறைகளின் படி தமிழகத்தில் 12 மாவட்டங்கள் சிவப்பு மண்டலமாக அறிவிக்கப்பட்டு உள்ளது.

சென்னை (906 பேர் பாதிப்பு), மதுரை (84), நாமக்கல் (61), தஞ்சாவூர் (55), செங்கல்பட்டு (78), திருவள்ளூர் (55) ), திருப்பூர் (112), ராணிப்பேட்டை (40), விருதுநகர் (32), திருவாரூர் (29) ஆகிய மாவட்டங்கள் சிவப்பு மண்டலத்தில் உள்ளன.

மேலும், 24 மாவட்டங்கள் ஆரஞ்சு மண்டலங்களாகவும், ஒரு மாவட்டம் பச்சை மண்டலமாகவும் மத்திய அரசால் குறிப்பிடப்பட்டு உள்ளது. தேனி, தென்காசி, நாகப்பட்டினம், திண்டுக்கல், விழுப்புரம், கோயம்புத்தூர், கடலூர், சேலம், கரூர், தூத்துக்குடி, திருச்சி, திருப்பத்தூர், கன்னியாகுமரி, திருவண்ணாமலை, ராமநாதபுரம், திருநெல்வேலி, நீலகிரி, சிவகங்கை, பெரம்பலூர், கள்ளக்குறிச்சி, அரியலூர், ஈரோடு, புதுக்கோட்டை மற்றும் தருமபுரி மாவட்டங்கள் ஆரஞ்சு மண்டலங்களாக வகைப்படுத்தப்பட்டுள்ளது. இதுவரையில் கொரோனா வைரஸ் பாதிப்பு ஏற்படாத கிருஷ்ணகிரி மாவட்டம் மட்டும் தமிழகத்தில் பச்சை மண்டலத்தில் இடம்பெற்று உள்ளது.


இதற்கிடையில் தமிழக அரசு மாநிலத்தின் 26 மாவட்டங்களை மாறுபட்ட விதிமுறையின்படி (மண்டலங்களை பிரிப்பதில் மாறுபட்ட விதிமுறைகள் பின்பற்றுகிறது) சிவப்பு மண்டல மாவட்டங்களாக வகைப்படுத்தி உள்ளது. மாநில அரசின் விதிகளின்படி 15-க்கும் அதிகமானோர் கொரோனாவினால் பாதிக்கப்பட்டு இருந்தாலோ, 4 நாட்களில் கொரோனாவினால் பாதிக்கப்பட்டவர்கள் எண்ணிக்கை இரட்டிப்பானாலோ அம்மாவட்டம் சிவப்பு மண்டலமாக வகைப்படுத்தப்படும். 15 பேருக்கும் குறைவானவர்களுக்கு மட்டும் தொற்று இருந்து புதியதாக 14 நாட்கள் யாருக்கும் தொற்று ஏற்படவில்லை என்றால் அம்மாவட்டம் ஆரஞ்சு மண்டலமாக அறிவிக்கப்படுகிறது. 28 நாட்களாக பாதிப்பு எதுவும் பதிவாகாத மாவட்டங்கள் பச்சை மண்டலமாக அறிவிக்கப்படுகிறது.