#IndiaFightsCorona மதுரை மக்களை துரத்தும் கொரோனா வைரஸ்… பாதிப்பு 84-ஆக உயர்வு

Read Time:4 Minute, 38 Second

மதுரையில் முதல் முறையாக அண்ணா நகரை சேர்ந்த கட்டுமான ஒப்பந்ததாரருக்கு கொரோனா தொற்று உறுதியானது. இவரை தொடர்ந்து அவரது குடும்பத்தினர் உட்பட மதுரையில் அடுத்தடுத்து பலருக்கு கொரோனா உறுதி செய்யப்பட்டது. பின்னர் சில நாட்களாக மதுரை மாநகராட்சியில் கொரோனா தொற்றே கண்டறியப்படாத நிலை காணப்பட்டது.

ஏப்ரல் 22-ம் தேதிக்கு பின்னர் மதுரையில் கொரோனா வைரஸ் தொற்று வேகம் காட்ட தொடங்கியது. கொரோனா வைரஸ் தொற்று நோய் பரவாமல் இருக்க அரசு பல்வேறு நடவடிக்கைகளை மேற்கொண்டது.

அரசு தரப்பில், அனைவரும் சமூக இடைவெளியை கடைபிடிக்க வேண்டும். வீட்டை விட்டு தேவையில்லாமல் வெளியே செல்ல வேண்டாம் என்று கேட்டு கொண்டாலும் பொதுமக்கள் அதனை கடைபிடிப்பது இல்லை. காய்கறி மார்க்கெட், இறைச்சி, மீன் கடைகளில் மக்கள் அதிகமாக கூடினர். சிலர் தங்கள் பகுதியில் உள்ள கடைகளில் பொருட்கள் வாங்காமல், வேறு பகுதிகளுக்கு சென்றனர். பொதுமக்களின் ஒத்துழைப்பு இல்லாததால், கொரோனா சமூக பரவலாக மாறி விடுமோ என்ற அச்சம் எழுந்தது.

மதுரையில் கொரோனாவால் பாதிக்கப்பட்டு 79 பேர் சிகிச்சை பெற்றனர். இவர்களில் 40 பேர் பூரண குணமடைந்து வீடுகளுக்கு அனுப்பி வைக்கப்பட்டனர். இந்த நிலையில் 2 தினங்களாக புதியதாக யாருக்கும் கொரோனா தொற்று ஏற்படாமல் இருந்தது. இந்நிலையில் நேற்று மதுரையில் மேலும் 5 பேருக்கு கொரோனா உறுதி செய்யப்பட்டுள்ளது என அரசு தெரிவித்தது.

மதுரை புது விளாங்குடி பகுதியைச் சேர்ந்த 29 வயது பிரசவமான பெண்ணுக்கும், கீழ அனுப்பானடி பகுதியை சேர்ந்த 33 வயது பெண்ணுக்கும், கரிசல்குளம் பகுதியை சேர்ந்த 31 வயது ஆண் ஒருவருக்கும் ஏற்கனவே கொரோனா பாதிக்கப்பட்டவர்களிடமிருந்து இவர்களுக்கு பரவியதாக முதற்கட்ட தகவல்கள் தெரிவிக்கின்றன. மதுரை அரசு மருத்துவமனையில் ஒப்பந்த அடிப்படையில் பணியாற்றும் 42 வயது பெண் சுகாதார பணியாளர். இவருக்கும் நேற்று கொரோனா உறுதி செய்யப்பட்டது. கொரோனா வார்டில் பணிபுரியும் இவருக்கு, அங்கு சிகிச்சை பெறும் கொரோனா நோயாளியிடம் இருந்து நோய்த்தொற்று பரவியதாக சுகாதாரத் துறையினர் தெரிவித்து உள்ளனர்.

மற்றொருவர் 26 வயதுடைய பேரிடர் மீட்பு படையை சேர்ந்த வீரர் ஆவார். இவர்களுடன் தொடர்பில் இருந்த சிலருக்கும் கொரோனா தொடர்பான பரிசோதனை செய்யப்பட்டு வருகிறது. மதுரையில் கொரோனாவால் பாதிக்கப்பட்டவர்களின் எண்ணிக்கை 84-ஆக உயர்ந்து உள்ளது. சிலருக்கு யாரிடம் இருந்து தொற்று பரவியது என்பதை உறுதி செய்ய முடியாத நிலை ஏற்பட்டுள்ளது. அதனால் மதுரையில் கொரோனா சமூக பரவல் நிலையை அடைந்துவிட்டதோ? என்ற அச்சம் ஏற்பட்டுள்ளது.

மதுரையில் மக்கள் வீடுகளை விட்டு வெளியே வருகிறார்களா? என்பதை போலீசார் உதவியுடன் ‘ட்ரோன்’ கேமரா மூலம் கண்காணிக்க ஏற்பாடு செய்யப்பட்டு உள்ளது. நோய் எதிர்ப்பு சக்தி அதிகரிக்க வீடு, வீடாக கபசுரக் குடிநீர் விநியோகம் செய்யப்படுகிறது. தெருக்களில் கிருமி நாசினி தெளிக்கப்படுகிறது. மாநகராட்சி கட்டுப்பாட்டு அறைகளுக்கு வரும் புகார்களுக்கு உடனடியாக தீர்வு காணப்படுகிறது மாநகராட்சி ஆணையர் விசாகன் கூறியுள்ளார்.

கொரோனா ஒழிப்புக்கு மக்களின் ஒத்துழைப்பு மிகவும் அவசியமாகும். எனவே, இனி வரும் நாட்களில் அரசின் வழிமுறைகளை பின்பற்றி நடக்க வேண்டும். இல்லையென்றால் வீட்டிற்குள் இன்னும் பல நாட்கள் முடங்கி கிடக்க வேண்டிய நிலை மக்களுக்கு ஏற்பட்டுவிடும்.