Coronavirus cases in India

#IndiaFightsCorona கொரோனா பாதிப்பில் இந்தியா இதுவரை காணாத உச்சம்… கடந்த 24 மணி நேரத்துக்குள் 2,293 பேர் பாதிப்பு, 71 பேர் உயிரிழப்பு

Read Time:3 Minute, 55 Second

இந்தியாவில் கொரோனா வைரஸ் தொற்றால் பாதிக்கப்படுபவர்களின் எண்ணிக்கை தொடர்ந்து அதிகரித்த வண்ணம் இருக்கிறது. தினந்தோறும் இந்த வைரஸ் தொற்றால் சுமார் 1,500-க்கும் அதிகமானோர் பாதிக்கப்பட்டு வருகின்றனர்.

கொரோனா பாதிப்பு அதிகம் உள்ள (ஹாட்ஸ்பாட்) மாவட்டங்கள் சிவப்பு மண்டலமாகவும், சுமாரான பாதிப்பு உள்ள மாவட்டங்கள் ஆரஞ்சு மண்டலமாகவும், பாதிப்பு இல்லாத மாவட்டங்கள் பச்சை மண்டலமாகவும் வகைப்படுத்தப்பட்டு உள்ளது. தமிழகத்தில் 12 மாவட்டங்கள் உள்பட நாடு முழுவதும் 130 மாவட்டங்கள் கொரோனா பாதிப்பு அதிகம் உள்ள சிவப்பு மண்டலமாக அறிவிக்கப்பட்டு உள்ளது.

இந்தியாவில் கொரோனா வைரஸ் பரவல் தொடரும் நிலையில் மே 3-ம் தேதிக்கு பின்னரும் இரண்டு வாரங்களுக்கு ஊரடங்கு நீட்டிக்கப்பட்டு உள்ளது.

இந்நிலையில் இந்தியாவில் இதுவரையில் இல்லாத வகையில் 24 மணி நேரங்களில் கொரோனாவினால் பாதிக்கப்படுபவர்கள் எண்ணிக்கை உயர்ந்து உள்ளது.

இந்தியாவில் கொரோனாவினால் பாதிக்கப்பட்டவர்கள் எண்ணிக்கை 37 ஆயிரத்தை கடந்துவிட்டது என காலை மத்திய சுகாதாரத்துறை அமைச்சகம் வெளியிட்ட புள்ளிவிவரம் தெரிவிக்கிறது. கடந்த 24 மணி நேரத்துக்குள் இந்த வைரஸ் தொற்றால் 71 பேர் உயிரிழந்து இருப்பதாகவும் தெரிவிக்கப்பட்டுள்ளது. இதனால் கொரோனாவுக்கு பலியானோர் எண்ணிக்கை 1,218 ஆக உயர்ந்துள்ளது. 24 மணி நேரங்களில் புதியதாக 2293 பேர் பாதிக்கப்பட்டு உள்ளனர். இதனால் மொத்தமாக பாதிக்கப்பட்டவர்கள் எண்ணிக்கை 37,336 ஆக உயர்ந்து உள்ளது என தெரிவிக்கப்பட்டு உள்ளது.

கொரோனா கோரதாண்டவம் ஆடி வரும் மராட்டியத்தில் மட்டும் 11 ஆயிரத்துக்கும் அதிகமானோருக்கு நோய்த்தொற்று உறுதியாகியுள்ளது. அங்கு இந்த கொரோனாவினால் 11,506 பேர் பாதிக்கப்பட்டு உள்ளனர். 485 பேரின் உயிரையும் காவு வாங்கி விட்டது.

குஜராத்தில் கொரோனாவால் பலியானவர்கள் எண்ணிக்கை 236 ஆக உயர்ந்து உள்ளது. மேலும் அங்கு இந்த வைரஸ் தொற்றால் 4,721 பேர் பாதிக்கப்பட்டு உள்ளனர். டெல்லியில் கொரோனா தனது கோரப்பிடியால் 3,738 பேரை பாதிக்கச் செய்துள்ளது. ராஜஸ்தானில் பாதிப்பு 2,666 ஆகவும், மத்திய பிரதேசத்தில் 2719 ஆகவும் உயர்ந்து உள்ளது.

தமிழகத்தில் இதுவரை இல்லாத அளவில் கொரோனா வைரஸ் நேற்று உச்சபட்சமாக ஒரே நாளில் 200-க்கும் அதிகமானோரை பாதிப்புக்கு உள்ளாக்கி இருக்கிறது. இதனால் பாதிக்கப்பட்டவர்கள் எண்ணிக்கை 2,526 ஆக உயர்ந்து உள்ளது. புதுச்சேரியில் புதிதாக ஒருவருக்கு கொரோனா பாதிப்பு உறுதியாகி உள்ளதால், மொத்தம் அங்கு வைரஸ் தொற்றால் பாதிப்புக்கு உள்ளானவர்களின் எண்ணிக்கை 10 ஆக அதிகரித்து உள்ளது.

உத்தரபிரதேசத்தில் 2,328 பேரும், ஆந்திராவில் 1,463 பேரும், தெலுங்கானாவில் 1,039 பேரும், மேற்கு வங்காளத்தில் 795 பேரும், கர்நாடகாவில் 589 பேரும், பஞ்சாபில் 480 பேரும், கேரளாவில் 497 பேரும் கொரோனா வைரஸ் தொற்றால் பாதிக்கப்பட்டு உள்ளனர்.