#IndiaFightsCorona சென்னையில் தனது பிடியை வலுப்படுத்துகிறது கொரோனா வைரஸ்…! தொற்று எண்ணிக்கை 2328 ஆக அதிகரிப்பு.!

Read Time:3 Minute, 34 Second

தமிழகத்தில் கொரோனா வைரஸ் தொற்றின் தாக்கம் நாளுக்கு நாள் அதிகரித்து வருகிறது.

இந்திய அளவில் கொரோனா வைரஸ் பாதிப்பில் 6-வது இடத்தில் இருந்த தமிழகம், தற்போது 4-வது இடத்துக்கு சென்றுள்ளது. கடந்த மாதம் வரை கொரோனா வைரஸ் பரவும் வேகம் கட்டுக்குள் இருந்தது. இம்மாதத்தின் தொடக்கத்தில் இருந்து மிகவும் வேகமாக பரவ தொடங்கியது.

தமிழ்நாட்டில் கடந்த 3 நாட்களில் மட்டுமே 1,806 பேர் கொரோனாவால் பாதிக்கப்பட்டு உள்ளனர். மக்களின் வாழ்வாதாரம் மற்றும் பொருளாதாரத்தை கருத்தில் கொண்டு ஊரடங்கு தொடர்பான பல கட்டுப்பாடுகள் கொண்டுவரப்பட்டு உள்ளது. இது கொரோனா வேகமாக பரவுவதற்கு ஒரு காரணம் என்று கூறப் படுகிறது.

இதுபோக தலைநகர் சென்னையில் கொரோனா தன்னுடைய பிடியை வலுப்படுத்துகிறது என்பதை அரசின் புள்ளி விபரங்கள் தெரிவிக்கின்றன. சென்னையில் மட்டும் கடந்த 3 நாட்களில் 879 பேர் பாதிக்கப்பட்டு உள்ளனர். இவர்களில் 650-க்கும் மேற்பட்டவர்கள் கோயம்பேடு மார்க்கெட்டுடன் தொடர்பு உடையவர்கள். சென்னையை, தொடர்ந்து கடலூர், விழுப்புரம் உள்ளிட்ட மாவட்டங்களிலும் கோயம்பேடு மார்க்கெட்டுடன் தொடர்பில் இருந்த பலருக்கு கொரோனா வைரஸ் தொற்று உறுதி செய்யப்பட்டு இருக்கிறது.

தமிழகத்தில் நேற்று ஒரே நாளில் 771 பேர் கொரோனா நோய் தொற்றால் பாதிக்கப்பட்டு உள்ளனர் என தமிழக சுகாதாரத்துறை தகவல் வெளியிட்டுள்ளது. இதனால் மாநிலத்தில் பாதிக்கப்பட்டோர் எண்ணிக்கை 4,829 ஆக உயர்ந்து உள்ளது. மேலும், கொரோனா தொற்றால் பாதிக்கப்பட்டு சென்னை மருத்துவமனையில் சிகிச்சை பெற்று வந்த 2 பேர் உயிரிழந்து உள்ளனர்.

இதனால் மாநிலத்தில் உயிரிழப்பு எண்ணிக்கை 35 ஆக உயர்ந்து இருக்கிறது. இவர்களில் 22 பேர் சென்னையை சேர்ந்தவர்கள். தமிழகத்தில் இதுவரை 3,320 ஆண்கள், 1,507 பெண்கள், இரண்டு 3-ம் பாலினத்தவர் கொரோனா நோய் தொற்றால் பாதிக்கப்பட்டு உள்ளனர் என தெரிவிக்கப்பட்டு உள்ளது. தமிழகத்தில் நேற்று பாதிக்கப்பட்ட 771 பேரில் 324 பேர் சென்னையை சேர்ந்தவர்கள். இவர்களில் 1½ வயது பெண் குழந்தை உள்ளிட்ட 25 குழந்தைகளும் அடங்குவார்கள் என தெரிவிக்கப்பட்டு உள்ளது.

இதனால் சென்னையில் 2004 ஆக இருந்த தொற்று எண்ணிக்கை 2328 ஆக அதிகரித்து உள்ளது.

கொரோனா வைரஸ் தொற்றால் பாதிக்கப்பட்ட 3,275 பேர் மருத்துவமனைகளில் சிகிச்சை பெற்று வருகின்றனர். இதுவரையில் 1,516 பேர் குணம் அடைந்து வீடு திரும்பி இருக்கிறார்கள். நேற்று ஒரே நாளில் 31 பேர் குணம் அடைந்து வீடு திரும்பி உள்ளனர். இப்போது, மருத்துவமனைகளில் 3,381 பேர் கண்காணிப்பில் வைக்கப்பட்டு உள்ளனர் என அரசு வெளியிட்டுள்ள தகவலில் குறிப்பிடப்பட்டு உள்ளது.