ஊரடங்கு முடிந்ததும் 50 சதவீத பயணிகளுடன் அரசு பேருந்துகள் இயக்கப்படும் – போக்குவரத்துத் துறை அறிவிப்பு

Read Time:5 Minute, 1 Second

பேருந்தில் பயணிகள் ஏற்றும் அளவில் 50 சதவீதம் பேரை மட்டுமே பயணிக்க அனுமதி அளிக்கப்படும்.


சமூக இடைவெளியை பின்பற்றும் அளவில் இருக்கைகள் மற்றும் நிற்கும் இடங்களில் குறியீடுகள் வரையப்படும்.


ஒவ்வொரு பயணம் முடிந்த பிறகும் பேருந்தை கிருமிநாசினி மூலம் சுத்தம் செய்ய வேண்டும் என மாநில போக்குவரத்துக் கழக மேலாண்மை இயக்குனர்களுக்கு உத்தரவிடப்பட்டு உள்ளது.


தமிழகத்தில் கொரோனா வைரஸ் பரவை கட்டுப்படுத்தும் வகையில் கொண்டுவரப்பட்ட ஊரடங்கு முடிவுக்கு வந்த பிறகு அரசு பேருந்துகள் 50 சதவீத பயணிகளுடன் இயக்கப்படும் என போக்குவரத்துத் துறை அறிவித்து உள்ளது. கொரோனா வைரஸ் கிருமி அதிக நேரம் வாழ முடியாத வகையில் ஏ.சி. உபயோகத்தை நிறுத்தி வைக்க வேண்டும் என கேட்டுக்கொள்ளப்பட்டு உள்ளது.

பேருந்துகள் இயக்கப்படுவது தொடர்பாக போக்குவரத்துத் துறையின் முதன்மைச் செயலாளர் தர்மேந்திர பிரதாப் யாதவ், அனைத்து மாநில போக்குவரத்துக் கழக மேலாண்மை இயக்குனர்களுக்கு அனுப்பிய சுற்றறிக்கையில், கொரோனா கட்டப்பாடு ஊரடங்கு உத்தரவு நீக்கப்பட்ட பிறகு மக்களின் தேவைக்கு ஏற்ப பேருந்துகளை குறிப்பிட்ட கால இடைவெளியில் இயக்க வேண்டும். அதில் மாற்றம் தேவைப்பட்டால் அதன் பின்னர் பரிசீலனை செய்யலாம்.

சாதாரண நாட்களில் பேருந்து இயக்கப்பட்ட முந்தைய தகவல்களை வைத்து மிக அதிக தேவையுள்ள இடங்களுக்கு முடிந்தால் அதிக பேருந்துகளை இயக்க நடவடிக்கை எடுக்கலாம்.

பேருந்தில் மொத்த பயணிகள் ஏற்றும் அளவில் 50 சதவீதம் பேரை மட்டுமே பயணிக்க அனுமதிக்க வேண்டும். சமூக இடைவெளியை பின்பற்றும் அளவில் இருக்கைகள் மற்றும் நிற்கும் இடங்களில் குறியீடுகள் வரையப்பட வேண்டும். ஒவ்வொரு பயணம் முடிந்த பிறகும் பேருந்தை கிருமிநாசினி மூலம் சுத்தம் செய்யப்பட வேண்டும். கிருமி அதிக நேரம் வாழ முடியாத வகையில் ஏ.சி. உபயோகம் நிறுத்தி வைக்கப்பட வேண்டும்.

பரிந்துரைகள்


* காற்றில் சிறிது நேரம் மட்டுமே கொரோனா வைரஸ் வாழும் என்பதால், பேருந்துக்குள் இருக்கும் காற்று உடனடியாக வெளியேறி புதுக்காற்று வந்துகொண்டிருக்கும் வகையில் அனைத்து ஜன்னல்களையும் திறந்து வைக்க வேண்டும்.


* முகக்கவசம் அணியாத பயணிகளுக்கு பேருந்தில் அனுமதி கிடையாது.


* பேருந்துகளில் ஏறி, இறங்கும் வாசல்களை சரியாக பயன்படுத்தி, குறிக்கப்பட்ட இடத்தில் அமரவோ, நிற்கவோ வேண்டும்.


* பேருந்து நிறுத்தங்களிலும், பேருந்துகளில் நிற்கும்போதும், அதிலிருந்து இறங்கும்போதும் மற்ற பயணிகளிடம் இருந்து 6 அடி இடைவெளியை பராமரிக்கப்பட வேண்டும்.


* பேருந்துகள் இயக்குவதற்கு முன்பு ஓட்டுனர், நடத்துனர் உள்ளிட்ட அதன் ஊழியர்களுக்கு உடல் வெப்ப பரிசோதனை செய்யப்பட வேண்டும். அவர்கள் முகக்கவசம், கையுறைகள் அணிய வேண்டும். பேருந்தில் ஓட்டுனர்களின் இருக்கும் இடம் திரையிடப்பட்டு தனிமைப்படுத்தப்பட வேண்டும்.


* நடத்துனர் சானிடைசரை பயன்படுத்தி டிக்கெட்கள் வழங்க வேண்டும். பேருந்துக்குள் இருக்கும் கூட்டத்தை ஒழுங்குபடுத்தும் பணியையும் நடத்துனர் சேர்த்து கவனிக்க வேண்டும்.


* பயணிகளின் கூட்ட நெரிசலை கட்டுப்படுத்தும் விதத்தில் டெப்போக்கள், முனையங்களில் பேருந்துகளை 5 மீட்டர் இடைவெளியில் நிறுத்தி வைக்கப்பட வேண்டும். கூடுதல் பணியாளர்களை வைத்து பயணிகள் நெருக்கடியை ஒழுங்குபடுத்த வேண்டும்.


* டிக்கெட்டுக்காக சில்லரைகளை மாற்றும் பழக்கத்தை பயணிகள், நடத்துனர்கள் தவிர்க்கலாம். தினசரி, மாத பாஸ்களை வாங்கி பயன்படுத்தலாம். பேருந்துகளில் ஏற வரிசையில் நிற்கலாம். பே டிஎம்., கூகுள் பே, ஜியோ பே மற்றும் கியூஆர் கோட் இருக்கும் கட்டணம் செலுத்தும் வசதிகளை பயன்படுத்தலாம் என கூறப்பட்டுள்ளது.