#IndiaFightsCorona தமிழகத்தில் கொரோனா வைரஸ் பாதிப்பு தொடர்ந்து அதிகரிப்பு… பலி 45 ஆக உயர்வு.!

Read Time:4 Minute, 32 Second

தமிழகத்தில் நேற்று ஒரேநாளில் புதிதாக 526 பேருக்கு கொரோனா நோய் தொற்று உறுதி செய்யப்பட்டு உள்ளது. இதனால் மொத்த பாதிப்பு எண்ணிக்கை 6 ஆயிரத்து 535 ஆக உயர்ந்துள்ளது.


சென்னையில் பிறந்து 5 நாளேயான ஆண் குழந்தை உட்பட 18 குழந்தைகள் மற்றும் 261 பேர் பாதிக்கப்பட்டு உள்ளனர்.


வைரஸ் பாதிப்பினால் ஏற்பட்ட பலி எண்ணிக்கை 45 ஆக உயர்ந்து உள்ளது.


தமிழகத்தில் கொரோனா வைரசால் பாதிக்கப்பட்டோரின் எண்ணிக்கை தொடர்ந்து அதிகரித்து வருகிறது. டெல்லி இஸ்லாமிய மாநாட்டில் தொடர்புடைய 1,500-க்கும் மேற்பட்டோரை தொடர்ந்து, தற்போது தமிழகத்தில் சென்னை கோயம்பேடு மார்க்கெட்டுடன் தொடர்புடையவர்கள் மூலம் தொடர்ந்து கொரோனா நோய் தொற்றால் பாதிக்கப்பட்டு வருகின்றனர்.

சென்னையை தொடர்ந்து கடலூர், திருவள்ளூர், விழுப்புரம், செங்கல்பட்டு, காஞ்சீபுரம் ஆகிய மாவட்டங்களிலும் தொடர்ந்து கொரோனா வைரசினால் பாதித்தோரின் எண்ணிக்கை அதிகரித்து வருகிறது. கொரோனா வைரசால் உயிரிழப்புகளும் தற்போது அதிகரித்து வருகிறது. தமிழகத்தில் நேற்று கொரோனா வைரஸ் பாதிப்பு குறித்து சுகாதாரத்துறை வெளியிட்டுள்ள செய்திக்குறிப்பில்,

தமிழகத்தில் நேற்று ஒரே நாளில் புதிதாக 526 பேருக்கு கொரோனா நோய் தொற்று இருப்பது உறுதி செய்யப்பட்டு உள்ளது. இதனால் மாநிலத்தில் பாதிப்பு எண்ணிக்கை 6 ஆயிரத்து 535 ஆக உயர்ந்து உள்ளது. தமிழக மருத்துவமனையில் நேற்றைய நிலவரப்படி 4 ஆயிரத்து 664 பேர் கொரோனா வைரஸ் நோய் தொற்றால் பாதிக்கப்பட்டு சிகிச்சை பெற்று வருகின்றனர். மேலும், சிகிச்சை முடிந்து நேற்று ஒரே நாளில் 219 பேர் குணமடைந்து ‘டிஸ்சார்ஜ்’ செய்யப்பட்டு உள்ளனர். இதுவரையில் 1,824 பேர் சிகிச்சை முடிந்து குணமடைந்து ‘டிஸ்சார்ஜ்’ செய்யப்பட்டு உள்ளனர்.

தமிழகத்தில் நேற்று ஒரே நாளில் 4 பேர் கொரோனா நோய் தொற்றால் உயிரிழந்தனர். இதனால் பலி எண்ணிக்கை 44 ஆக உயர்ந்துள்ளது என தெரிவிக்கப்பட்டு உள்ளது.

மேலும், தலைநகர் சென்னையில் கொரோனாவின் பாதிப்பு அதிகரித்த வண்ணம் உள்ளது என்பதையும் அரசின் புள்ளி விபரம் தெரிவிக்கிறது. தமிழகத்தில் நேற்று பாதிக்கப்பட்ட 526 பேரில், பிறந்து 5 நாளேயான ஆண் குழந்தை உட்பட 18 குழந்தைகள் மற்றும் 261 பேர் சென்னையை சேர்ந்தவர்கள் ஆவர்.

விழுப்புரத்தில் 67 பேரும், செங்கல்பட்டில் 4 வயது பெண் குழந்தை உட்பட 3 குழந்தைகள் மற்றும் 37 பேரும், பெரம்பலூரில் 31 பேரும், திருவள்ளூரில் 26 பேரும், காஞ்சீபுரத்தில் 4 வயது பெண் குழந்தை உட்பட 3 குழந்தைகள் மற்றும் 14 பேரும், அரியலூரில் 16 பேரும், திருவண்ணாமலையில் 15 பேரும், ராணிப்பேட்டையில் 10 பேரும், நெல்லையில் 8 பேரும், திருப்பத்தூரில் 4 பேரும், கடலூரில் 3 பேரும், ராமநாதபுரம், தேனி ஆகிய மாவட்டங்களில் தலா 2 பேரும், திருச்சி, தஞ்சாவூர், நீலகிரி, நாமக்கல், திண்டுக்கல் மற்றும் கள்ளக்குறிச்சி ஆகிய மாவட்டங்களில் தலா ஒருவரும் கொரோனா வைரசால் பாதிக்கப்பட்டு உள்ளனர். தமிழகத்தில் நேற்று 20 மாவட்டங்களில் கொரோனா வைரசால் பாதிக்கப்பட்டவர்கள் கண்டறியப்பட்டு உள்ளது என அரசு தரப்பில் தெரிவிக்கப்பட்டு உள்ளது.

சென்னை ஸ்டான்லி மருத்துவமனையில் கொரோனாவுக்கு சிகிச்சைப் பெற்று வந்த ஒருவர் இன்று (மே 10) காலை உயிரிழந்தார். இதனால் தமிழகத்தில் பலி எண்ணிக்கை 45 ஆக உயர்ந்து உள்ளது.