தமிழகத்தில் கொரோனா பாதிப்பு எண்ணிக்கை 10 ஆயிரத்தை தாண்டியது; வெளி மாநிலங்களில் இருந்து வருபவர்களுக்கு தொற்று உறுதி…!

Read Time:4 Minute, 16 Second

தமிழகத்தில் கொரோனா வைரஸ் தொற்றினால் பாதித்தோரின் எண்ணிக்கை 10 ஆயிரத்தை தாண்டியுள்ளது.

இதனால் இந்தியாவில் கொரோனா பாதித்தவர்களின் எண்ணிக்கையில் மராட்டியத்திற்கு அடுத்தப்படியாக தமிழகம் 2-வது இடத்தில் உள்ளது.

மாநிலத்தில் கொரோனா வைரஸ் பாதிப்பை கட்டுப்படுத்த பல்வேறு நடவடிக்கைகள் எடுத்தபோதிலும் தொடர்ந்து பாதிக்கப்படுகிறவர்களின் எண்ணிக்கை அதிகரித்து வருகிறது. நேற்று (மே 15) தமிழகத்தில் கொரோனா பாதிப்பு குறித்து சுகாதாரத்துறை வெளியிட்டுள்ள செய்திக்குறிப்பில், தமிழகத்தில் ஒரே நாளில் 434 பேர் கொரோனா தொற்றால் பாதிக்கப்பட்டிருப்பது கண்டறியப்பட்டுள்ளது.

இதனால் பாதிக்கப்பட்டவர்களின் எண்ணிக்கை 10 ஆயிரத்து 108 ஆக உயர்ந்து உள்ளது. நேற்று பாதிக்கப்பட்டிருப்பவர்களில் 385 பேர் தமிழகத்தில் இருந்தவர்கள். மேலும் 40 பேர் மராட்டிய மாநிலத்தில் இருந்தும், 6 பேர் மாலத்தீவில் இருந்தும், 2 பேர் குஜராத்தில் இருந்தும், ஒருவர் கர்நாடகாவில் இருந்தும் தமிழகம் வந்திருப்பது தெரியவந்து உள்ளது.

மருத்துவமனையில் சிகிச்சை பெற்றவர்களில் 359 பேர் நேற்று குணமடைந்து ‘டிஸ்சார்ஜ்’ செய்யப்பட்டு உள்ளனர். இதுவரை 2 ஆயிரத்து 599 பேர் டிஸ்சார்ஜ் செய்யப்பட்டு உள்ளனர். நேற்று ஒரே நாளில் கொரோனா நோய் தொற்றால் பாதிக்கப்பட்ட 5 பேர் சிகிச்சை பலனின்றி உயிரிழந்துள்ளனர். இதனால் தமிழகத்தில் உயிரிழந்தவர்களின் எண்ணிக்கை 71 ஆக அதிகரித்து உள்ளது.

தமிழகத்தில் நேற்று 18 மாவட்டங்களில் பாதிப்பு ஏற்பட்டுள்ளது. சென்னையில் அதிகப்பட்சமாக மாலத்தீவில் இருந்து வந்த ஒருவர் உட்பட 310 பேர் பாதிக்கப்பட்டு உள்ளனர் என தெரிவிக்கப்பட்டுள்ளது.

இரண்டாவதாக நெல்லையில், மராட்டிய மாநிலத்தில் இருந்து வந்த 22 பேருக்கு பாதிப்பு ஏற்பட்டுள்ளது. திருவள்ளூரில் 21 பேரும், செங்கல்பட்டில் 20 பேரும், காஞ்சீபுரத்தில் 11 பேரும், தூத்துக்குடியில் மராட்டிய மாநிலத்தில் இருந்து வந்த 10 பேரும், மதுரையில் மராட்டிய மாநிலத்தில் இருந்து வந்த 5 பேர் உட்பட 11 பேரும், தேனியில் 6 பேரும், திருவண்ணாமலையில், மராட்டிய மாநிலத்தில் இருந்து வந்த ஒருவர் உட்பட 4 பேரும், கன்னியாகுமரியில், மாலத்தீவில் இருந்து வந்த 4 பேரும், கடலூரில் 3 பேரும், ராணிப்பேட்டையில், குஜராத்தில் இருந்து வந்த 2 பேரும், திண்டுக்கல், தென்காசி, மராட்டிய மாநிலத்தில் இருந்து வந்த ஒருவர் உட்பட 2 பேரும், விருதுநகரில், கர்நாடக மாநிலத்தில் இருந்து வந்த ஒருவர் உட்பட 2 பேரும், பெரம்பலூரில் 2 பேரும், தஞ்சாவூரில் ஒருவரும் கொரோனா நோய் தொற்றால் பாதிக்கப்பட்டு உள்ளனர்.

தமிழகத்தில் நேற்று 28 குழந்தைகளும், 38 முதியவர்களும் கொரோனா நோய் தொற்றால் பாதிக்கப்பட்டு உள்ளனர் என்று தெரிவிக்கப்பட்டுள்ளது. இந்தியாவில் கொரோனாவால் அதிகமாக பாதிக்கப்பட்ட மாநிலங்கள் பட்டியலில் மராட்டியம் முதலிடத்தில் உள்ளது. மராட்டியத்தில் மட்டும் 29,100 பேர் வைரஸ் தொற்றால் பாதிக்கப்பட்டு உள்ளனர். இதற்கு அடுத்தப்படியாக தமிழகத்தில் 10,108 பேர் பாதிக்கப்பட்டு உள்ளனர் என்பது குறிப்பிடத்தக்கது.